Behmischa Pråta
| Der Artikl is im Dialekt Weanarisch gschriem worn. |
Da Behmische Pråta (dt.: Böhmischer Prater) is a klana Vagnügungspark (ca. 5000 m²) aum Raund von Wean, dea wo z'saumman mit'n Laaer Berg a beliabt's Ausflugszüi füa Famülien is. Da Nauman is nåch'n groß'n Weana Prater entstaund'n.
Da Behmische Pråta liegt aum Laaer Berg glei neman Laaer Woid im 10. Weana Beziak Favoritn. Quea duach'n Pråta fiaht a Fuaßgängazone, links und rechts san de Schiassbud'n, Ringlg'spüla, Hutsch'n, Autodrom und Wiatshäusa. Da Mitt'lpunkt is des Tivoli, wo de Musi spüit, Festln g'feiat wea'n und Schauspüla auftret'n. Im Behmisch'n Pråta gibt's etliche Ringlg'spü und aundare Attraktiaunan, de wos bis zu 100 Jahrln oid san.
Entstaund' n is des Gaunze im 19. Joahrhundat. Aus ana uasprünglich'n Weakskantin vom Ziaglheastöla Wienerberger håt si 1882 des easchte Ausflugsgåsthaus auf'n Laaer Berg (von de Behm in Wean: „Lakopec“ g'hass'n[1]) entwick'lt. 1883 san daunn scho etliche Schaustölla-Famülien duat'n aug'sied'lt g'wes'n. Und weu sowoi de Oawata von da Ziaglfabrik ois wia'r aa de Schaustölla z'meist aus de östareichisch'n Kronlända Behmen und Mährn kumma san, woa'n's da Grund füa'n Nauman von dera neuch'n Weana Attraktiaun. Dass nämli da Pråta nåch de Ziaglbehm ois B'suacha benaunnt wua'n is, kaunn net gaunz stimma, weu de oaman Leitl'n füa'r a Ringlg'spü oda'r an Wiatshausb'suach vüi z'weng Göd g'håbt hättat'n.[2] In de näxt'n Joah is da Pråta imma gressa wua'n, owa wäahrend'n Zweit'n Wödkriag is a'r aum 11. Dezemba 1944 duach an Bomb'naugriff beinåh gaunz zastöat wua'n. Nåch'n Wiedaraufbau in de Nåchkriagsjoahr' håt a sei heutig's Aussehg'n kriagt.
So wia'r im groß'n Pråta gibt's aa im Behmisch'n Pråta a Ries'nradl. Es is 1988 baut wua'n, håt olladings nua'r an Duachmessa von 21 m und 14 klaane Gond'ln. A B'sundaheit von dem Ries'nradl is, dass' auf ana'r anzich'n Stitzn aufliagt.[3]
Amoi jed's Joahr wiad da Behmisch'n Pråta von Dutznd Weaklmänna und -frau'n b'suacht, de wo duat'n eahna'r Eiropa-Treff'n varaunstoit'n. Se kumman aus vüile Lända dahea, seit'n Foi vom Eisanan Vuahaung aa b'sunds gean aus'n ehemålich'n Ostblock.[4]
Vom Reumannplåtz aus fiaht a Radlweg direkt zum Behmisch'n Pråta.[5] Seit'n 1. Mai 2010 foaht aum Saumståg, Sunntåg und aun de Feiatåg an Autobus vom Reumannplåtz bis zum Pråta auffe und von duat'n nåch Simmaring weida.[6]
Literatua
[Werkeln | Am Gwëntext werkeln]- Wolfgang Slapansky: Das kleine Vergnügen an der Peripherie. Der Böhmische Prater in Wien. Picus Verlag, Wien 1992, ISBN 3-85452-235-5.
- Ernestine Stadler, Frank Taubenheim: Echt wienerisch: Über Leute und ihre Läden in Wien. Europäische Verlagsanstalt, Hamburg 2005, ISBN 3-434-50597-0.
- Karl Pufler: Wo der Ziegelböhm tanzte... Böhmischer Prater: Veranstaltungsort seit über 100 Jahren. Herausgeber: Kulturverband Böhmischer Prater. Verlag Milde, Wien 1999, ISBN 3-901205-07-1.
- Werner Schubert: Favoriten, Verlag Beziaksmuseum Favoritn, Wien 1992.
- Christine Klusacek/Kurt Stimmer: Favoriten. Zwischen gestern und morgen, Mohl Verlag, Wien 2004, ISBN 3-901781-38-1; S 107-109.
- Maria Kinz: Lebenswertes Favoriten, J&V Edition Wien, Wien 1992, ISBN 3-85085-083-0; S 118-120.
im Netz
[Werkeln | Am Gwëntext werkeln]
Commons: Behmischa Pråta – Sammlung vo Buidl, Videos und Audiodateien- Schausteller im Böhmischen Prater
- Böhmischer Prater – Fam. Jancura
- Böhmischer Prater – Familienausflugsziel mit Geschichte
- Veranstaltungszentrum Tivoli Wien X – Die Geschichte des Böhmischen Prater
- Eintrag über Behmischa Pråta im Lexikon der Wiener Sozialdemokratie
- Eindrog iwa Behmischa Pråta in: Austria-Forum, dem östareichischen Wissnsnetz – online (im Heimatlexikon)
Beleg
[Werkeln | Am Gwëntext werkeln]- ↑ Maria Kinz: Lebenswertes Favoriten, S. 118.
- ↑ Werner Schubert: Favoriten, S. 76.
- ↑ Riesenrad Böhmischer Prater
- ↑ Klusacek/Stimmer: Favoriten. Zwischen gestern und morgen, S. 109.
- ↑ Werner Schubert: Favoriten, S. 119.
- ↑ [1] – Shuttlebus Böhmischer Prater
Koordinaten: 48° 9′ 54″ N, 16° 23′ 51″ O