Der Bulle von Tölz: Der Weihnachtsmann ist tot

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlDer Weihnachtsmann ist tot
ProduktionslandDeitschland
OriginalsprochDeitsch/Boarisch
Läng90 Minutn
OitasfreigobFSK 12
EinordnungStaffel 12, Foig 5
57. Foig insgesamt
Easchdausstrohlung14. Dezemba 2005 auf Sat.1
Stab
RegieUdo Witte
DrahbuachSylvia Haider
ProduktionErnst von Theumer junior, Julia Bachmann
MusiUli Kümpfel
KameraJochen Radermacher
SchnittMichael Breining
Bsetzung
Episodnlistn

Der Weihnachtsmann ist tot is a deitscha Feansehfuim van Udo Witte ausm Joar 2005 noch on Drahbuach vo da Sylvia Haider. Es is de 57. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 14. Dezemba 2005 af Sat.1 ausgstroit worn.

Handlung[VE | Weakln]

De Susanne Kreuzer gibt ia Buzal Lukas fia kuaze Zeid in d’Obhuat vo on Weihnochtsmo, dea wo vorm „Bankhaus Bad Tölz“ Weabezeddl vateit. Se wui bloß schnej an Haustiaschlissl vo iam Mo Max obhoin, dea wo bei da Bank orbat. Wias kuaz draf wieda zruckkimmt, is as Baby ausm Kindawong vaschwundn – und mid eam da Weihnochtsmo. De Kriminala Benno Berghammer und Sabrina Lorenz schliaßn a Entfiahrung ned aus und fahndn nochm Weihnochtsmo. Es handlt si um an Studentn Christoph Mader, dea oba glabhoft vasichan ko, doss ea ned da Entfiahra is.

An Benno Berghammer sei Muada Resi suacht de Emma Kreuzer, de Muada van Kindsvoda, af und bitt se, doss se si um ian Sohn Max kimmad, dawei sei Frau im Kranknhaus is. Vo deara Entfiahrung zoagt de oide Kreuzerin si ned bsundas beeidruckt und moant, doss de Susanne sejba dro schuid is, weis as Kind on da Kejdn alloa glossn hod. Do heart de Berghammerin ausm Nemzimma s Drenzn vo on Buzal, vaschofft si Zuatritt und findt an kloanan Lukas. De Kommissar woin as gspannte Vahäitnis zwischad da Emma und an Max Kreuzer ned weida vaschlechtan und song zun Kindsvoda, doss sei Bua anonym im Polizeipräsidium obgem worn is.

Am nächstn Morgn liegt a toda Weihnochtsmo vor da Kapej am Kalvarienberg. As Opfa is da Valentin Obermaier, a schwar vaschuideta, spuisichtiga Gschäftsmo, dea wo sei Famij scho mehrane Moi fost ruiniat häd. Laut Grichtsmedizina Dr. Robert Sprung is de Todesursoch a Schädlbruch, heabeigfiahd duach mehrane Schläg mid on hoartn Gengstand afn Hintakopf.

Motive und Vadächtige gibt’s grod gnua: de Ehefrau van Opfa, de Margit Obermaier, de wo si scheidn lossn woit; donn an Obermaier sei Gschäftspartna und oida Spezl Leo Kainz, dea an Valentin nia vazeihn hod kinna, doss ea eam sei Gspusi Margit ausgspannt hod, und schliaßli da Margit ia Voda, da Herr Lutz, dem wo sei Schwiegasohn imma a Dorn im Aug woar. Oba de drei gem si gengseitig Alibis fia de Tatzeit.

Ban Todn wead a Prospekt van Bankhaus Bad Tölz mid da privatn Handynummer van Max Kreuzer gfundn. Da Ogstejde vo da Bank sogt dazua, doss da Valentin Obermaier eam um Afschub vo seine Kreditzinsn bedn hod und ois Sichaheit sei Haus obiadn, oba zeascht mid seina Frau driba redn woit. De Numma hod ea an Obermaier gem, wenn außahoib vo da Deanstzeit ebbs is; oba ea hod si neamma gmejdt.

An Obermaier sei sechsjährige Tochta Kathrin vazejhd da Kommissarin Lorenz, doss se si vo iam Papa z Weihnochtn a Babypuppn gwinscht hod, de wo richtig drenzn ko. A Quittung vo on Spuizeiggschäft bstätigt an Kauf, oba de Puppn is spualos vaschwundn.

Da Leo Kainz wead festgnumma, wei si außastejd, doss da Valentin Obermaier eam a unsaubas Grundsticksgschäft vamassln woit, wos a easchtklassigs Tatmotiv doarstejd, oba ea is im froglichn Zeitraum in vaschiedne Goststättn gseng worn.

Am Gwand van Opfa wead a fremds Bluad festgstejd, des wo an Lutz, oiso sein Schwiegavoda, zuagordnt wean ko. Ea gibt an Moard zua, oba ban Lokaltermin stejd si außa, doss ea van Tatheagang koa Ahnung ned hod und bloß sei Tochta schitzn woit.

Da Benno Berghammer hod si in de letztn Dog etliche Moi mid da Thea Wild – a oids Gspusi vo eam – troffa. Wias eam frogt, ob ea se heiradn wui, behaptet ea, doss ea scho vaheiradt is. Aft schimpfts eam on Ehebrecha und ziagt ogfressn ob. Vor iara Hoamroas mechads eam oba doh no oamoi seng. Zua Vaobredung nimmt da Benno sei Kollegin Sabrina mid und borgt si an kloanan Lukas aus, dea wo in da Resi Berghammer iara Obhuat is. Ea schickt d’Sabrina midm Kind voraus ins Lokal und zoagt ara Kioskbesitzarin de Faistling van Buzal, de wo se am Monogramm ois dejenign wiedadakennt, de wo da Valentin Obermaier am Tatdog in da Mantltoschn ghobt hod. Jetzad stejd si de Kriminala d’Frog, wia de Faistling an Weg zun Valentin Obermaier und zruck zun Lukas gfundn hom. Da Max Kreuzer moant, doss de Handschuach im Briafkostn woarn; da Obermaier kannts noch da Entfiahrung am Bodn gfundn und eigworfn hom.

Wia d’Mejdung einakimmt, doss on da Isar a Kindaleich ogschwemmt worn is, san de Kommissar gschockt; bei da Beagung stejd si oba außa, doss’s de vaschwundne Puppn is. Zruck im Kommissariat, kriagt de Sabrina Lorenz a Packl; se hod fia de kloane Kathrin a Easotzpuppn bstejd. Wia da Polizist Anton Pfeiffer am Ofong glabt, doss ea’s mid on echtn Baby z doa hod, dämmad an Benno Berghammer, doss’s on vazweifltn Kindsvoda raa so geh kannt. Da Max Kreuzer daboggd an Eamittlungsdruck neamma länga und legt a Gständnis ob. Ea sogt aus, doss da Obermaier eam ogruafa und Lösegejd gfordad hod. S Gejd hoda ausm Bankdresor ausborgt. Bei da Ibagob is duach a Missgschick van Eapressa as vamoantliche Baby afn Bodn gfoin. Aft hoda duachdrahd und is eascht wieda zu si sejba kemma, wia da Obermaier bluadibastremt vor eam gleng is.

Nemhandlung[VE | Weakln]

Weis a Gejd spoarn wui, haut d’Resi Berghammer im Woid on Christbaam um. Da Fearsta Meixner dawischts af frischa Tat und zoagts o. Da Polizist Anton Pfeiffer wui eam davo obbringa, oba es huift ois nix. Es braucht mehrane Olaif, bis da Pfeiffer an richtign Aungblick dawischt, wo ea an Benno Berghammer iba de Soch in Kenntnis setzn ko. Da Kommissar lobt an Polizisten fia sei Loyalität und vahandlt midm Meixner iba ra Entschädigung. Schliaßli gibt si da Fearsta mid on Zwonzga zfrin und moant, doss da Baam eh a schiacha Hund woar.

Hintagrund[VE | Weakln]

Gfuimt worn is z Däiz und bei da Pestkapej z Wackersberg;[1] ois Schaublotz fia de „Pension Resi“ homs as Hollerhaus Irschnhausn heagnumma.

Kritik[VE | Weakln]

De Programmzeitschrift TV Spielfilm schreibt: „Wirr, aber mei: Da rieselt Schnee drüber.“[2]

Im Netz[VE | Weakln]

Beleg[VE | Weakln]

  1. Der Weihnachtsmann ist tot – derbullevontoelz.de
  2. Der Bulle von Tölz: Der Weihnachtsmann ist tot – Filmkritik bei TV Spielfilm