Der Bulle von Tölz: Mord im Kloster
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Mord im Kloster |
| Produktionsland | Deitschland |
| Originalsproch | Deitsch/Boarisch |
| Läng | 90 Minutn |
| Oitasfreigob | FSK 12 |
| Einordnung | Staffel 12, Foig 4 56. Foig insgesamt |
| Easchdausstrohlung | 30. Novemba 2005 auf Sat.1 |
| Stab | |
| Regie | Wolfgang F. Henschel |
| Drahbuach | Michael Lerchenberg |
| Produktion | Ernst von Theumer junior |
| Musi | Uli Kümpfel |
| Kamera | Thomas Meyer |
| Schnitt | Michael Breining |
| Bsetzung | |
| |
Mord im Kloster is a deitscha Feansehfuim van Wolfgang F. Henschel ausm Joar 2005 noch on Drahbuach van Michael Lerchenberg. Es is de 56. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 30. Novemba 2005 af Sat.1 ausgstroit worn.
Handlung
[Werkeln | Am Gwëntext werkeln]S Kriminoikommissariat Däiz kriagt on anonyman Hiweis af Unreglmäßigkeitn ban Todesfoi vo nara Schwesta im Klosta St. Ehrentraud. Fia de Botschoft is a Bladdl vo on Rezeptblock heagnumma worn. Da Benno Berghammer und de Sabrina Lorenz gengan zun Klosta und redn mid da Mutter Maria Ancilla, da interimistischn Priorin. Se zoagt eana an Todnschein vo da Schwesta Maria Apollinaris, oba seng deafans de Leich ned. De Priorin sogt, doss de Gelübdeschwesta a weng gliddn hod, vielleicht oba ra an Lem in Gebet und Buaß ned gonz gwochsn woar.
Da Stootsanwoit Dr. Georg Lenz is fossungslos, wei de Kommissar ohne sein Aftrog eamittlt hom, und eakleart an Foi fia obgschlossn, wei laut Todnschein a natialiche Todesuasoch vorliegt. Außadem kriangs a Eamittlungsvabot, wei Ordn und Klesta untan bsundan Schutz vo da boarischn Stootsregierung stengan. Da Dr. Lenz sogt no dazua, doss de Priorin fei de Tochta van ehemolign Kultusminista Schödl is.
Da Benno Berghammer wui jetzad eascht recht eamittln, wei de Hondschrift afm Totnschein identisch mid dera van anonyman Hiweis is und van Dr. Lukas Fischer stammt. De Sabrina Lorenz wui zeascht ned neizong wean, ko’s donn oba doh ned lossn.
Da Dr. Fischer gibt zua, doss ea aus Valengheit a natialiche Todesuasoch ogem hod, obwoi ea si an gachn Tod vo deara jungan, gsundn Schwesta Maria Apollinaris ned eaklean ko. Fia eam is oafoch ned vorstejboar, doss ea bei ara Klostafrau in olle Lecha neischaugt. Da Kommissar Berghammer schlogt vor, doss da Dokta an neian Todnschein ausstejd, wo „Todesursache unbekannt“ okreizld wead; donn dadad ea de Soch vagessn. Da Dokta hot koa Woi ned und willigt ei.
Duach on Trick kriagt da Berghammer van Stootsanwoit telefonisch gschafft, doss ea de Leich in d’Grichtsmedizin bringa losst. Wia an Dr. Lenz dämmad, doss da Kommissar ned irgad oane Leich moant, sondan de Klostaschwesta, wui ea an Berghammer zruckpfeifa, oba dea hod scho afglegt. Ban nächstn Zammtreffa droht da Stootsanwoit eam mid ara Vasetzung zua Grenzpolizei in da hintastn Obapfoiz, wonn de Obduktion nix dagibt.
Da Benno Berghammer leant im Pfoarrhof ban Mittogessn de Pastoralreferentin Maria Mittendorfer kenna. Wia da mysteriöse Todesfoi im Klosta zua Sproch kimmt, rennts naus und geht speim. Da Kommissar eafoart vo ia, doss se zammad mid da Maria Apollinaris Novizin im Klosta St. Ehrentraud woar.
De Sabrina Lorenz findt außa, doss de gstorbne Schwesta eigentli Johanna Angermeier ghoaßn hod und alloanige Eabin van „Café Waldstüberl“ woar, nochdem si iare Ejtan bei on Autounfoi darennt hom. Zun Café ghean etliche Grundstick und Gejd af da Bank. Wei’s in dem Klosta zu de Grundsätz gheat, doss de Schwestan in Armut Lem, miassns a Testament zugunstn van Klosta vafossn. Oiso eabt St. Ehrentraud jetzad des Vameng.
Bei da Obduktion stejd si außa, doss as Opfa mid Schwoarzem Bilsenkraut vagift worn is, todesuasächli woarn oba Pfaffenhütchensamen, vaobreicht in on Miasli. Da Grichtsmedizina Dr. Robert Sprung moant, doss da Täta oda de Tätarin a Fochwissn in Biologie oda Pharmazie hom deafad, und gibt an Berghammer a poar eischlägige Biacha mid.
Im Aftrog van Stootsanwoit quartiat si de Sabrina Lorenz im Klosta zun Eamittln ei, wei nua se ois Frau on freian Zuatritt hod. Dort eafoarts, doss de Schwesta Maria Fidelis midm Opfa befreindet woar, und wui mid ia redn, wei se mid de sejbn Symptome wia bei da Maria Apollinaris vor ian Tod im Kranknzimma liegt. Oba de Schwesta is scho a poar Stund obgängi. Dawei de Suachaktion lafft, findt de Kommissarin in da Wäsch vo da Maria Fidelis on Liabesbriaf vo da Johanna alias Maria Apollinaris, dea wo af a gleichgschlechtlichs Vahäitnis hideit, oba ned af a Motiv. Schliaßli wead de Schwesta Maria Fidelis tod afgfundn; se hod si de Puisodan afgschnittn und midm Bluad a „A“ on d’Wond gschriem. Wei mehrane Ordnsnaman in St. Ehrentraud mid on A ofongan, huift des de Kriminala ned weida. Zwischad de Untaleibaln vo da Maria Fidelis wead a Sackal mid Pfaffenhütchensamen gfundn, des wo laut Kommissarin Lorenz no ned do woar, wo se de Wäsch duachsuacht hod. Da Stootsanwoit Lenz is oba sicha, doss de Schwesta Maria Fidelis iare Mitschwesta Maria Apollinaris vagift hod, und eakleat da Mutter Maria Ancilla und an Prälatn Hinter gengiba an Foi fia obgschlossn.
Vo da Maria Mittendorfer eafoarn de Kommissar, doss de Schwestan Maria Apollinaris und Maria Fidelis a Oart stille Post betriem hom, und zwoar in Form vo om Togebiachl, vasteckt afm Speicha, wo de Koffa vo de Schwestan glogad wean. De Pastoralreferentin schlogt vor, doss se zammad mid da Sabrina Lorenz bei da Nocht iba d’Klostamaua kraxlt und des Biachl hoit.
In da Schwester Maria Apollinaris ian Togebiachl steht, doss as Klosta valossn und ia Vameng on Heim fia obdachlose Jugadliche spendn wui, und doss de Mutter Maria Ancilla ia dafia de Hej vasprocha hod.
Wia de Sabrina Lorenz ian Kollegn driba informiat und omeakt, doss as Klosta ban Austritt vo da Schwesta Maria Apollinaris pleite gwen warad, grod jetzad, wo umfangreiche Saniarungsorbatn laffan, sogt da Berghammer, doss ea scho woaß, wea an Moard begonga hod, und liest an Titl vo on Buach vor, des wo da Dr. Sprung eam midgem hod: „Dr. Angelika Schödl: Über die Heilkunde der bayerischen Klöster im Mittelalter“. De Mutter Maria Ancilla alias Dr. Angelika Schödl hod zwoar im Foch Voikskunde promoviat, oba fia on Giftmoard hod des Wissn locka glangt.
Da Berghammer und de Lorenz woin de Priorin im Klosta festnehma, oba de is afs Baugrist kraxlt. De Kommissar steing aa nauf und woins zun Afgem ibaredn. oba de Mutter Maria Ancilla siagt si vorn Heagod im Recht und entziagt si da irdischn Grichtsboarkeit mid on Sprung in de Tiafn.
Da Stootsanwoit Lenz wiaft an Berghammer vor, er häd a SEK ofordan miassn. Desmoi wui da Dr. Lenz eam a Disziplinarvafoarn und a Vasetzung in de Obapfoiz neidrucka, ruadad oba zruck, wia da Prälat Hinter on eam appelliat, ea soi so guad sei und de Soch af si beruhn lossn – ned zun Ausdenga, a Moardprozess gega de Priorin vo oan vo de ejtestn Ordn van christlichn Abendland, de wo aa no de Tochta vo on ehemolign Minista is.
Fia d’Maria Mittendorfer und an Benno Berghammer, de wo si inanonda valiabt hom, hoaßt’s jetzad Obschied nehma, wei da Prälat Hinter de Pastoralreferentin fia ra Joar in de bolivianische Mission schickt. D’Maria zoagt af on Stean am Omdhimme und moant, se kanntn jo iba eam „telefonian“, wonn ea do und se in Bolivien draf schaugt.
Hintagrund
[Werkeln | Am Gwëntext werkeln]Gfuimt worn is z Däiz und z Burghausn (Klosta Raitenhaslach);[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
[Werkeln | Am Gwëntext werkeln]De Programmzeitschrift TV Spielfilm schreibt: „Gags von gestern um fromme Schwestern.“[2]
Im Netz
[Werkeln | Am Gwëntext werkeln]- Mord im Kloster in der Internet Movie Database (englisch)
- Mord im Kloster bei Fernsehserien.de
Beleg
[Werkeln | Am Gwëntext werkeln]- ↑ Mord im Kloster – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Mord im Kloster – Filmkritik bei TV Spielfilm
| Vorherige Foig 16. Novemba 2005: Ein erstklassiges Begräbnis |
Episodnlistn | Nächste Foig 14. Dezemba 2005: Der Weihnachtsmann ist tot |