Der Bulle von Tölz: Liebespaarmörder

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlLiebespaarmörder
ProduktionslandDeitschland
OriginalsprochDeitsch/Boarisch
Läng93 Minutn
OitasfreigobFSK 12
EinordnungStaffel 8, Foig 1
34. Foig insgesamt
Easchdausstrohlung23. Jenna 2002 auf Sat.1
Stab
RegieWerner Masten
DrahbuachRalph Werner
ProduktionErnst von Theumer junior
MusiUli Kümpfel
KameraRainer Lauter
SchnittMichael Breining
Bsetzung
Episodnlistn

Liebespaarmörder is a deitscha Feansehfuim van Werner Masten ausm Joar 2002 noch on Drahbuach van Ralph Werner. Es is de 34. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 23. Jenna 2002 af Sat.1 ausgstroit worn.

Handlung[VE | Weakln]

On an kloanan Badesee liegn de Leichn vo da Julia Bammer und van Felix Nowak. Des junge Paarl is daschossn und mid on Kroas aus Rosnbladdl umrahmt worn. Da Moard weckt in an Kommissar Benno Berghammer Eainnarungan on an ähnlichn Foi vor zehn Joar. Domois hod ma an geisti zruckblimnan Lois Flicker vauateit. In da Zwischnzeit is ea wieda frei, wei da Grichtspräsident Dr. Berthold Schwaninger si domois fia a muids Uatei fian Meada vo da Freindin vo sein Sohn eigsetzt hod. Da Flicker zejhd ois bekonnta Spanna afs Neie zu de Vadächtign, oba aa da Julia ia Ex-Gspusi Tom Reif kimmt in Frog; dea wui oba an gonzn Omd in ara Disco gwen sei.

Da Berghammer hoit de oidn Aktn no amoi ausm vastaubtn Archiv und stejd fest, doss wichtigs Beweismaterioi untaschlong worn is. Sei Vorgänga, da Kommissar Kilian, ibagibt eam a Sackal mid Hoar, de wo in da Hond vo oan vo de domolign Opfa gfundn worn san. Da Kilian hod de Hoar ois Sichaheit dahoam afghom; jetzad is ea oba krank und wead neamma Long lem; drum hod ea koa Angst neamma vor meglichn Konsequenzn. Da Grichtspräsident Schwaninger hod nämli seinazeit an Kilian sein Vorruhestond eigfadld und dafia valongt, doss ea de Hoar vaschwindn losst.

An Tom Reif sei Alibi stejd si ois foisch außa; ea woar ned ununtabrochn in da Disco. Außadem is de Sportpistoin vo sein Voda vaschwundn.

De Kommissarin Sabrina Lorenz bsorgt si da Julia Bammer ia Togebiachl und stejd fest, doss as Diandl olle Freind mid Vornaman gnennt hod, nur on gwissn H. W., vo dem, wo se glabt, doss ea in se valiabt is, hods Obkiazt. Vo da Julia iara bestn Freindin Birgit Hauser eafoarn de Kriminala, doss H. W. da Nochhuifelehra Hans Weickl is. Se glabt ned, doss dea in d’Julia valiabt woar; ea hod si unwoi gfuid, wonn ea aa bloß kuaze Zeit mid da Julia alloa woar.

Es stejd si außa, doss da Hans Weickl vor fimf Joar on Unfoi ghobt hod und mehrane Wochan im Kranknhaus woar. Sei Unfoigegna woar da Dr. Horst Bammer, da Voda vo da Julia. Laut seina Aussog is da Weickl eam bei da Nocht midm Foarradl af da foischn Stroßnseitn entgengkemma; ea hod eam z spat gseng und so is’s hoid passiat. Da Weickl hod si joarelong duach olle Instanzn kämpft, oba eam is ibaroi a Teischuid zuagsprochn worn, zletzt vor drei Monat. Da Dr. Bammer moant, doss noch sein Wissnsstond de Dekta an Weickl wieda guad zammgflickt hom. De Marianne Kornmann, de Ex-Valobte van Hans Weickl, sogt dageng, doss da Unfoi sei Karriere ois Schirennlaifa und aa sei Lem kaputt gmocht hod. Ea hod si total obkapslt. Se hod si vo eam trennt, dmids ned sejba dro zbricht.

De Stootsanwäitin Dr. Zirner is mid de Fortschritt vo de Eamittlungan ned zfrien. Se hod an Lois Flicker im Visier, wei da aktuelle Foi und da Dopplmoard vo vor zehn Joar unbestreitboare Parallelen afweisn. De Zirnerin ibanimmt kuazahond sejba de Befrogung und kriagt goar a Gständnis van Lois Flicker.

Wia si außastejd, doss de ausgrissnan Hoar van Liebespaarmoard vor zehn Joar ned van Lois Flicker san, setzt da Kommissar Berghammer an Franz Hauswirth deamoßn unta Druck, doss dea eiknickt und zuagibt, doss ea an Grichtspräsidentn Schwaninger sein Sohn Roland domois a foischs Alibi gem hod. Aft wead a DNA-Test gmocht. Da Richter Schwaninger rodt sein Sohn, ea soid d’Aussog vaweigan, oba dea wui si vo sein Oidn nix mehr song lossn und gibt zua, doss ea sei Freindin und ian Liabhoba aus Eifasucht daschossn hod. Doss de Tatwoffn nia identifiziat worn is, kimmt davo, doss as Jogdgwahr vo sein Voda on austauschboarn Laff hod.

De Sportpistoin van Tom Reif sein Voda wead in dem Badesee gfundn, wo aa de Moard passiat san; es hondlt si oadeiti um de Tatwoffn, oba da Tom Reif streit imma no ois ob. Schliaßli stejd si außa, doss an Tom sei Bruada Nochhuif van Hans Weickl kriagt, monchmoi aa dahoam. Bei oana vo dena Glengheitn deafad da Lehra de Woffn midgnumma hom.

De Marianne Kornmann bstätigt an Vadocht vo de Kommissare, doss da Hans Weickl ban Unfoi sei „Manneskraft“ valorn hod und des da woahre Grund fia de Trennung woar. Se gengan zun Nochhuifelehra und weafn eam vor, doss ea si on an Dr. Bammer grächt hod. Wia da Weickl de Tat weida obstreit, greift da Benno Berghammer in de Trickkistn und sogt, doss a Nochboarin gseng hod, wia ea in da froglichn Nocht aufm Radl weggagfoarn und eascht Stundn Spada zruckkemma is. Da Weickl streit aa des ob, oba wia de Sabrina Lorenz eam sogt, doss gonz sicha a Spua vo eam gfundn wead, gibt ea si gschlong. Ea sogt, ea häd joarelong af den Moment gwoart, wo da Bammer so leidn muass und nia wieda glickli sei wead.

Hintagrund[VE | Weakln]

Gfuimt worn is z Däiz und am Kirchsee;[1] ois Schaublotz fia de „Pension Resi“ homs as Hollerhaus Irschnhausn heagnumma.

Kritik[VE | Weakln]

De Programmzeitschrift TV Spielfilm schreibt: „TV-Krimi, der mal so richtig gut funktioniert.“ Fazit: „One-Man-Show mit interessantem Fall.“[2]

Im Netz[VE | Weakln]

Beleg[VE | Weakln]

  1. Liebespaarmörder – derbullevontoelz.de
  2. Der Bulle von Tölz: Liebespaarmörder – Filmkritik bei TV Spielfilm