Der Bulle von Tölz: Malen mit Vincent

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlMalen mit Vincent
ProduktionslandDeitschland
OriginalsprochDeitsch/Boarisch
Läng92 Minutn
OitasfreigobFSK 12
EinordnungStaffel 9, Foig 4
41. Foig insgesamt
Easchdausstrohlung23. Jenna 2003 auf Sat.1
Stab
RegieNikolaus Leytner
DrahbuachFranz Xaver Sengmüller
ProduktionErnst von Theumer junior
MusiUli Kümpfel
KameraHermann Dunzendorfer
SchnittLydia Wimmer
Bsetzung
Episodnlistn

Malen mit Vincent is a deitscha Feansehfuim van Nikolaus Leytner ausm Joar 2003 noch on Drahbuach van Franz Xaver Sengmüller. Es is de 41. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 23. Jenna 2003 af Sat.1 ausgstroit worn.

Handlung[VE | Weakln]

Da eafoiglose Kunstmola Vincent Förnbacher gibt in seina Beagbauanhittn Seminare fia Hobbykinstla. Sei Bruada Cornelius, dea wo a Kunstgalerie hod, greift eam imma wieda finanziell unta de Oarm. Da aktuelle Molkurs zejhd vier Teinehma: de Webdesignarin Katja Schön, de ban Vincent vagebli zun Landn vasuacht; de Immobilienmaklarin Hanna Würzinger, de wo ausm sejbn Grund scho zun drittn Moi midmocht; de Bibliothekarin Irmgard Mosig, de wo si dro steart, doss de Katja Schön si mehra fia de Monna ois wia fias Moin intressiat; und schliaßli da Herbert Kaindl, a Fabrikant im Ruhestond, dea wo leidnschoftlich Kunstweak sammlt.

Ban Moin in freia Natua findt de Hanna Würzinger am Fuaß vo ara Fejswond de Katja Schön, de wo 20 Meta obgstiazt is und si darennt hod. De Kommissar Benno Berghammer und Sabrina Lorenz stejn fest, doss’s a Unfoi oda a Moard gwen sei ko.

Da Oarzt Dr. Werner Hölscher is ahnungslos iba d’Nocht vo Wiesbodn noch Däiz gfoarn; ea woit sei Valobte Katja Schön mid sein Bsuach ibaroschn. Vo eam eafoart de Kommissarin Lorenz, doss de Katja ned Webdesignarin, sondan Gemälderestauratorin woar. Warum sei Valobte on an soichn Seminar teinehma woit, hods eam ned song woin.

Da Benno Berghammer findt außa, doss an Cornelius Förnbacher sei Lemsgfährtin Eva Mansfeld a Vahäitnis mid dem sein Bruada hod. Wia raa da Cornelius davo Wind kriagt, foart ea granti zun Vincent, wiaft eam seine Buidln vor d’Fiaß und draht eam an Gejdhahn zua. D’Hanna Würzinger siagt ia Schaas kemma und biat an Vincent finanzielle Unterstützung o, wonn ea se a liabt, oba da Mola hod bloß oa Gliabte: de Kunst.

De Kriminala woin mid da Eva Mansfeld redn, oba de is weda dahoam no in da Galerie. Da Cornelius Förnbacher wui grod de Galerie zuamocha; ea wui de Villa vakaffa und Däiz valossn. Vo eam eafoarn se, doss sei Lemsgfährtin zun Vincent zong is.

Dawei is de Hanna Würzinger vaschwundn; ia Auto steht in on kloanan Woid unweit vo an Vincent seina Hittn. D’Resi Berghammer, de inzwischn on da Katja Schön iara Stej am Kurs teinimmt, hod as Foarzeig zammad midm Herbert Kaindl entdeckt und schickt eam zua Oimhittn; ea soi ian Sohn Benno telefonisch hearuafa. Daweis ban Auto woart, siagts, wia da benochboarte Baua Martin Scharrer mid ara Leich afm Hänga vorbeifoart. Wia de Kommissar eam afspian, vasenkt ea grod de Hanna Würzinger in ara eilig ausghomnan Gruam. Ea sogt, doss ea de Leich in sein Haus gfundn hod und se loswean woit.

Da Dr. Tölscher is in da Zwischnzeit af Wiesbodn gfoarn und hod in da Post vo seina Valobtn as Schreim vo an wissnschoftlichn Institut gfundn. Drinnad steht, doss a Gemälde, des wo de Katja Schön restaurian soid, a Fejschung is. Da Bsitza hod’s in da Galerie van Cornelius Förnbacher kafft. Aft lossn de Kriminala olle Buidln in da Wohnung vo da Hanna Würzinger ibapriafn, de wo aa aus deara Galerie kemman. Wia si außastejd, doss des emfois Fejschungan san, bsorng si de Kommissar on Duachsuachungsbefej fia an Vincent Förnbacher sein Hof.

De Eva Mansfeld bstätigt de Vamuatung vo de Kriminala, doss se und da Vincent vo Ofong o vabandld woarn und de Eifasuchtszene nua gspuid woar, dmid da Cornelius on plausiblen Grund dafia ghobt hod, doss ea Däiz an Ruckn keaht. So häd ea midm eagaunatn Gejd unaffällig vaschwindn kinna. Wia da Cornelius Förnbacher mid an Eagebnis vo da Genanalyse konfrontiat wead, gibt ea zua, doss ea d’Hanna Würzinger dadrosslt hod; an Moard on da Katja Schön schreibt ea sein Bruada zua. Da Vincent streit de Tat ob, oba de Eva Mansfeld sogt dageng, doss da Cornelius de Woahrheit sogt. De zwoa Frauan hom steam miassn, wei de Katja Schön an Betrug afdecka woit, und de Hanna Würzinger, weis im Kella de Fejschaweakstott entdeckt hod und van Cornelius Förnbacher dawischt worn is.

Hintagrund[VE | Weakln]

Gfuimt worn is z Däiz und z Rottach-Egern;[1] ois Schaublotz fia de „Pension Resi“ homs as Hollerhaus Irschnhausn heagnumma.

Im Netz[VE | Weakln]

Beleg[VE | Weakln]

  1. Malen mit Vincent – derbullevontoelz.de