Der Bulle von Tölz: Berliner Luft

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlBerliner Luft
ProduktionslandDeitschland
OriginalsprochDeitsch/Boarisch
Läng90 Minutn
OitasfreigobFSK 12
EinordnungStaffel 9, Foig 5
42. Foig insgesamt
Easchdausstrohlung2. Aprui 2003 auf Sat.1
Stab
RegieWolfgang F. Henschel
DrahbuachPeter Ertel
ProduktionErnst von Theumer junior
MusiUli Kümpfel
KameraThomas Schwan
SchnittMichael Breining
Bsetzung
Episodnlistn

Berliner Luft is a deitscha Feansehfuim van Wolfgang F. Henschel ausm Joar 2003 noch on Drahbuach van Peter Ertel. Es is de 42. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 2. Aprui 2003 af Sat.1 ausgstroit worn.

Handlung[VE | Weakln]

Da Bauuntanehma Anton Rambold organisiat a Roas fia ehemolige Mitglieda van Däiza Knabenchor. Mid vo da Partie is aa d’Resi Berghammer, de wo am Zuiort, da boarischn Landesvatretung z Berlin, fias leibliche Woi vaontwortlich is. Da offizielle Zweck vo da Vaonstoitung is, de Bundeshaptstädta de boarische Kultua näha z bringa; in Wiaklichkeit hofft da Rambold af on lukrativn Bauaftrog.

Wia da Bus obgfoarn is, kimmt da Loata van Däiza Stodarchiv ins Kommissariat und wui on Eibruchsdiabstoi mejdn. Am ehestn kimmt a schwoarz gwandade und vaschleiade Frau in Frog, de wo kuaz vorm Eibruch as Archiv bsuacht und woahrscheinli auskundschoft hod. Wei da Polizist Anton Pfeiffer af on Kongress vo da Polizeigweakschoft z Berlin is, wui da Benno Berghammer de Soch ons Eibruchsdezernat weidaloatn. Oba ea hod no ned amoi de easchtn Schritt gsetzt, do eafoart da Kommissar, doss da Polizist Pfeiffer im Berliner Hotej im Voirausch nem ara dadrossltn Leich vorgfundn und wega Moardvadocht festgnumma worn is. As Opfa is de Ulla Kleinecke, a Ogstejde van Bauuntanehma Rambold, de wo 1989 aus da DDR noch Däiz kemma is. vorhea woar se Sekretärin vo on gwissn Herrn Bordirsky.

Wei ea sein Kollegn Pfeiffer koan Moard ned zuatraut und da Oberkommissar Kruse ibazeigt is, doss ea an Täta dingfest gmocht hod, foart da Benno Berghammer af Berlin, wo ea zammad mid da Kollegin Sabrina Lorenz af oagne Faust eamittln wui.

Da Kruse vabitt si jede Oart vo Eimischung und vafoigt aa koane ondan Spuan ned. Van Zimmamadl Irina eafoart da Berghammer, doss se gseng hod, wia ebba an fost bewusstlosen Polizistn Pfeiffer ins Zimma van Opfa brocht hod. Außadem findt ea außa, doss as Opfa a Tochta ghobt hod, und bsuacht de z Köpenick. Wei ea oba z Berlin ned polizeilich eamittln deaf, woin de Tochter Gabriele und deara ia Freind Stefan Kastenbauer nix song. An Kastenbauer dawischn da Benno Berghammer und de Sabrina Lorenz kuaz draf ban Vakauf vo oide Dokumente und bringan eam dazua, doss ea an Eibruch zammad mid seina Freindin z Däiz zuagibt, wei eam des a Alibi fian Moard vaschofft. An Aftrog zun Eibruch wui ea vo da Ulla Kleinecke kriagt hom, de wo an Pfeiffer ogrom hod, dmids fia de Tat a Alibi hod.

Da Benno Berghammer leant de fesche Kunsthistorikarin Dr. Beatrice Schinkel kenna und zoagt ia s Weabeplakat vo Däiz. De zwoa valiam se af da Stej und se vaobredn si fia an Rambold sein Empfong. Dort eafoart da Bauuntanehma van Bundesdogsobgordnetn Hans Meidenbauer, doss da Ministerialbeamte Bordirsky, dea wo fia de Vagob vo effentliche Bauafträg zuaständig is, si scho vor a poar Wochan fia on Konkurrentn entschiedn hod, nämli a Fiama, on dea wo da Bordirsky sejba beteiligt is.

Da Bordirsky, dea wo nemhea aa Kunst- und Antiquitätntandla is, wohnt in ara Villa z Wannsee. Da Berghammer und de Lorenz foarn dorthi und ibarumpln de Haushäitarin, a gwisse Frau Strack, mid da direktn Frog noch de Dokumente aus Däiz und stejn eansthofte Konsequenzn in Aussicht, wenns ned kooperiat. Do kimmt da Bordirsky hoam und wui de boarischn Kriminala nausschmeißn, oba de konfrontian eam mid an Moardvadocht, den wo ea entschiedn zruckweist; dazua hod ea a Alibi fia de Tatzeit. Zun Vadocht da Hehlarei sogt ea aus, doss de Ulla Kleinecke a Expeatise vo eam hom woit. Ea zoagt de Eamittla de Dokumente ausm Däiza Stodarchiv, kennt oba an Naman van Kafintressentn ned.

Ealeichtat iba de flotte Wiedabeschoffung vo de Dokumente, bsuachan de Kommissar an vasteartn Kollegn Pfeiffer im Gfängnis, dea wo dawei scho sejba glabt, doss ea a Mearda is. Se eamutign eam, ea soi si on den Omd eainnan, wo ea mid da Ulla Kleinecke on da Bar vasumpft is. Da Pfeiffer sogt, doss se ständig ebbs vo ara „Seekuh“ und vo ara „Geruchskonserve“ gredt hod.

Da Vadocht, doss „Seekuh“ a Decknam bei da ehemolign Stasi gwen sei kannt, bstätigt si. A Stasi-Offizia hod si an Naman fia de Ulla Kleinecke ausdenkt, und de „Geruchskonserve“ woar a trogna BH in on Eiweckglasl. Wea dea Offizia woar, bleibt oba dawei no a Rätsl.

Wia de Gabriele Kleinecke, de Tochta van easchtn Opfa, dawiagt afgfundn wead, woin de Däiza Kommissar de Leich seng; da Oberkommissar Kruse ealabt des oba nua da Sabrina Lorenz. Bei deara Glengheit sammlts hoamli a poar Hoar und Finganoglfragmente ei und losst an Kruse sei Handy midgeh. Dawei da Berghammer und de Lorenz in da Grichtsmedizin de Beweismittl untasuachn lossn, nimmt da Kruse an Stefan Kastenbauer fest. Midm Eagebnis vo de Ausweatungan konfrontians an Oberkommissar, wei dea hod ban Dawiang van Opfa, des wo si heftig gweaht hod, genetische Spuan hintalossn. Außadem hod de Gabriele Kleinecke eam vor da Tat ogruafa. Se woit eam eapressn, nochdems außagfundn hod, doss ea da Stasi-Offizia woar, dea wo iara Muada an Decknaman „Seekuh“ gem hod. Scho vorhea hod de Ulla Kleinecke eam mid dem Wissn eapressn woin und dafia midm Lem zoid.

Wia da Benno Berghammer noch Däiz zruckkimmt, steht de Dr. Beatrice Schinkel vor da „Pension Resi“. Ea gfreit si sakrisch iban Ibaroschungsbsuach vo seina „Bea“, nimmts mid ins Haus und biat ia a Zimma o. Sei Muada ruaft o und sogt, doss de Ausfligla eascht am nächstn Dog hoamfoarn kinna, wei da Bus vareckt is. Dawei de Bea in gamsige Dessous hinta eam steht, sogt da Benno am Telefon zu seina Muada, doss eh koane Gäst ned do san.

Am nächstn Dog bsuacht da Benno Berghammer mid da Bea as Däiza Stodarchiv, aa de Sabrina Lorenz kimmt dazua. Wia de Kunsthistorikarin si fia on Aungblick unbeobocht fuid, trennts a Bladdl ausm Gästebuach außa, oba de Lorenz hod ois gseng. Se nimmt da Dr. Schinkel as Papia ob und bschuidigt se, doss se de Aftroggebarin fian Eibruchsdiabstoi im Stodarchiv gwen is, nochdems vorhea ois auskundschoft hod. De Dr. Schinkel streit nix ob und losst si widastondslos obfiahn. Da Benno Berghammer is ogfressn; de Bea is ned s easchte Gspusi, wo ea af de Oart valiat.

Hintagrund[VE | Weakln]

Gfuimt worn is z Däiz und z Berlin;[1] ois Schaublotz fia de „Pension Resi“ homs as Hollerhaus Irschnhausn heagnumma.

Kritik[VE | Weakln]

De Programmzeitschrift TV Spielfilm schreibt: „Bulle gegen Bulle: drolliger Revierkampf.“[2]

Im Netz[VE | Weakln]

Beleg[VE | Weakln]

  1. Berliner Luft – derbullevontoelz.de
  2. Der Bulle von Tölz: Berliner Luft – Filmkritik bei TV Spielfilm