Der Bulle von Tölz: Freier Fall

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlFreier Fall
ProduktionslandDeitschland
OriginalsprochDeitsch/Boarisch
Läng90 Minutn
OitasfreigobFSK 12
EinordnungStaffel 9, Foig 3
40. Foig insgesamt
Easchdausstrohlung15. Jenna 2003 auf Sat.1
Stab
RegieWolfgang F. Henschel
DrahbuachAndreas Föhr, Thomas Letocha
ProduktionErnst von Theumer junior
MusiUli Kümpfel
KameraThomas Schwan
SchnittMichael Breining
Bsetzung
Episodnlistn

Freier Fall is a deitscha Feansehfuim van Wolfgang F. Henschel ausm Joar 2003 noch on Drahbuach van Andreas Föhr und an Thomas Letocha. Es is de 40. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 15. Jenna 2003 af Sat.1 ausgstroit worn.

Handlung[VE | Weakln]

Da Bauuntanehma Martin Grieser stiazt ban Foischiamspringa afn Jaguar vo sein Konkurrentn Anton Rambold und is sofort tod. Da Schiam is ned afgonga, offnboar is ea manipuliat worn. Kuaz draf fliagt da Peter Waiblinger, an Grieser sei Hausmoasta, ban Betretn vo ara Hittn van Fliagavarein in d’Luft. Olle Gashähn woarn afdraht, oiso woar aa des koa Unfoi ned. De Kriminala Benno Berghammer und Sabrina Lorenz san si oans, doss de zwoa Moard zammhängan. Se findn außa, doss an Grieser sei Witwe Sonja, de wo ia Lem da Woitätigkeit widmet, nembei a Vahäitnis midm Fluglehra Berthold Zauchner hod, dea wo an Grieser zu sein letztn Obsprung gflong hod. De Grieserin sogt aus, doss ia Mo vo iara Liabschoft midm Zauchner gwisst hod, oba se häd midm Gspusi eh grod Schluss gmocht.

De Anna Krams, wo si sejba a Hex nennt, und ia Enkl Joey ghean emfois zun Kroas vo de Vadächtign, wei da Martin Grieser se fian Bau vo ara zwoaten Stroß zun Sportflugblotz aus iam Haisl vatreim woit. De Anna Krams hod an Grieser noch oagne Ogom vafluacht, wos duach a vakoids Kreiz und a tods Giggal in de Trimma vo da explodiatn Hittn bstätigt wead. Gegan Joey liegt a Hoftbefej aus Hamburg vor, wei ea dort in da „Ritze“ fimf valetzte Gäst und on Sochschodn vo 2000 Euro hintalossn hod. Ea wui gseng hom, wia da Peter Waiblinger in de Hittn neigonga is. Wega de gschlossne Fenstalädn is’s stockdunkl gwen, trotzdem hod da Waiblinger koa Liacht ned gmocht. Noch 10 bis 20 Sekundn is donn ois in d’Luft gflong. Fia de Kommissar gibt’s nua de oane Eaklearung dafia, warum da Peter Waiblinger koa Liacht ned gmocht hod: Ea hod gwisst, doss de Hittn voi vo Gas is, wei ea’s sejba afdraht hod, wei ea sein Chef loswean woit. Oba wei dea kuazfristig umdisponiat hod, hot da Waiblinger an Foischiam manipuliat und hod s Gas obstejn miassn. De oidn, gnogltn Stiefe san eam schliaßli zun Vahängnis worn, weis afm Stoabodn Funka gschlong hom. Da Täta steht jetzad fest, oba ned sei Motiv.

De Marianne Waiblinger, de Witwe van Hausmoasta, wead wega ara Aungkrankheit friahra oda spata blind wean. A saudeire Operation in Amerika kannt iara s Aungliacht dahoidn, oba dazua fehjd s Gejd. Da Martin Grieser woit de hohen Kostn ned ibanehma, oba jetzad mocht de Sonja de nedign Middl locka. Olladings mechads ned, doss de Frau Waiblinger de Soch on de große Glockn hängt.

Da Benno Berghammer eafoart vo de Grieser eana Haushäitarin Jennifer, doss ia Chefin vorm Tod vo iam Mo d’Frau Waiblinger ums Varecka ned untastitzt hod. Fia de Kommissar schaugt’s aus, wia wonn de Frau Waiblinger ebbs gega de Grieserin in da Hond häd und se eapresst.

De Marianne Waiblinger eafoart, doss se 250.000 Euro aus da Lemsvasicharung vo iam Mo kriang soi, und mechad de Gejdspende zruckgem. Se vazejhd da Sonja Grieser, doss de Polizei an Peter vadächtigt, obwoi ea doh so a guada Mensch woar. Wia de Grieserin ia zuastimmt und sogoar zuagibt, doss se eam zu deara, iara Moanung noch gottgfällign Tat ogstift hod, is de Waiblingerin fossungslos und wui zua Polizei geh, oba de Grieserin schlogt se nieda, schleift se ins Badezimma und wui se datränka.

Dawei hom de Kriminala van Stodbaumoasta eafoarn, doss d’Finanziarung van neien Behindatnhoam af wogglige boana gstondn is, wei da Martin Grieser hinta s Vahäitnis vo seina Frau mid iam Fluglehra kemma is und ia drum an Gejdhahn zuadrahn woit. Jetzad liegt as Motiv fia de Eamittla af da Hond. Se pressian zu da Sonja Grieser und kinnan de Marianne Waiblinger grod no vorm Datrinkn rettn. Wia da Benno Berghammer de Grieserin vahoft, sogt de nua, doss de Polizei woi ned woaß, wos se do grod oricht; se glabt ned, doss de Behindatn und de Bediaftign van Landkroas af de tätige Huif vo Menschn wia se vazichtn kinnan. De Kommissarin Lorenz moant dazua nua, doss se, de Grieserin, a wundaboare Zej mid Sidfensta kriang wead.

Hintagrund[VE | Weakln]

Gfuimt worn is z Däiz und z Vogtareuth (Flugblotz);[1] ois Schaublotz fia de „Pension Resi“ homs as Hollerhaus Irschnhausn heagnumma.

Kritik[VE | Weakln]

De Programmzeitschrift TV Spielfilm schreibt: „Die schnurrige Gratwanderung zwischen Satire und Heimat-Trash nimmt diesmal den Kräuterglauben aufs Korn.“[2]

Im Netz[VE | Weakln]

Beleg[VE | Weakln]

  1. Freier Fall – derbullevontoelz.de
  2. Der Bulle von Tölz: Freier Fall – Filmkritik bei TV Spielfilm