Der Bulle von Tölz: Palermo ist nah

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Foig der Serie Der Bulle von Tölz
OriginaltitlPalermo ist nah
ProduktionslandDeitschland
OriginalsprochDeitsch/Boarisch
Läng92 Minutn
OitasfreigobFSK 12
EinordnungStaffel 1, Foig 4
4. Foig insgesamt
Easchdausstrohlung4. Feba 1996 auf Sat.1
Stab
RegieWalter Bannert
DrahbuachHartmut Grund, Horst Vocks
ProduktionErnst von Theumer junior
MusiKristian Schultze
KameraHanuš Polak
SchnittIngrid Träutlein-Peer
Bsetzung
Episodnlistn

Palermo ist nah is a deitscha Feansehfuim van Walter Bannert ausm Joar 1996 noch on Drahbuach van Hartmut Grund und an Horst Vocks. Es is de viate Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 4. Feba 1996 af Sat.1 ausgstroit worn.

Handlung[VE | Weakln]

In an obbrenntn Heistodl van Bauan Anton Lang wead a vakoite Leich ohne Schädl und ohne Händ gfundn. Ois Opfa kimmt da Martin Lang, da Sohn van Bauan, in Frog, wei dea spualos vaschwundn is, seit ea mid sein Voda gstrittn hod. Wega deara Brutalität geht da Kommissar Benno Berghammer vo an Mafia-Moard aus. Bei da Obduktion stejt si aa außa, doss da Tode italienischs Gwand oghobt und italienischs Essn im Mong ghobt hod.

Da Biogärtna und Gmiashändla Giovanni Cimulai, dea wo a Spezl van Benno Berghammer is, hod an italienischn Kejna Mario Donizetti ois Mo fia sei 18-jährige Tochta vorgseng, oba de is in Puff-Betreiba Sigi Schröder valiabt. On an Omd meakt da Giovanni, doss d’Angela hoamli duachs Schlofzimmafensta as Haus valossn hod. Ea foart granti zun Schröder und randaliat so long, bis de Polizei eam midnimmt. Da Kommissar Berghammer losst eam frei und vaspricht, dossa eam sei Tochta zruckbringt.

Wia da Schröder d’Angela zua Prostitution zwinga wui, wehrt se si und beißt eam. Drafhi losst ea as Madl laffa, wei ea vo sein Gschäftsfiara eafoart, doss da Kommissar Berghammer droht hod, doss ea da Angela eanan Voda driba in Kenntnis setzn wead, wos fia an „Gschäft“ ea nochgeht, wenn as Madl um zwejfe am Middog no ned dahoam is.

De Kommissarin Sabrina Lorenz eafoart van Landeskriminalamt, doss da Mario Donizetti – an Giovanni sei Wunsch-Schwiegasohn – oana vo da sizilianischn Mafia is. Se glabt, doss aa da Giovanni Cimulai a Mafioso is, oba da Benno Berghammer wui des ned woahrhom. Ea frogt se, obs an Donizetti a weng unta d’Lupm nehma kannt.

Dawei hod a Hund an Schädl und d’Händ van Todn ausgrom. De Genanalyse zoagt, doss de Leich a Sidlända is. Jetzad san de Kriminala sicha, doss de Mafia im Spui is. Wias an Bauern Lang song woin, doss da Tode ned sei Bua is, kimmt da Martin Lang grod ausm Haus. Da Grund vo sein Vaschwinden woar a Streit mid sein Voda, dea wo gega de Umstejung van Hof af biologische Landwiatschoft woar; jetzad hod da Oide oba eiglenkt und an Junior an Hof ibaschriem.

Da Giovanni Cimulai daschiaßt – noch oagne Ogom in Notwehr – an ondan Italiena. Wei da Gmiashändla koa Schutzgejd ned zoid, fiacht da Benno Berghammer oimähli, doss sei Spezl eam wos vaschweigt. A befreindeta Finanzbeamta losst an Kommissar in de Akte van Cimulai neischaung. Ea stejt fest, doss da Gmiashändla vui mehr vasteiat ois wia sei Gschäft obweafa ko. Da Giovanni sogt, doss ea as Gejd vo seina sizilianischn Famij in deitsche Immobilien olegt.

Da Benno Berghammer mocht de Angela Cimulai und an Martin Lang midanand bekannt. De zwoa vastengan si glei guad, wei boade af da Bio-Schiene untawegs san.

Da Berghammer eafoart vo on Informantn aus da Hotelbranche, doss mehrane Siziliana eicheckt hom, und fotografiats hoamli, wias ban Giovanni Cimulai aftauchan. As Landeskriminoiamt hod in da Zwischnzeit de Leich ausm Heistodl identifiziat und setzt de Kommissar an Eamittla Eustachius „Eusi“ Bernhard vor d’Nosn, wei da Tode a Profikilla vo da Mafia woar und da Mo, den wo da Cimulai daschossn hod, emfois a Mafioso woar. Da LKAla glabt, doss da Giovanni Cimulai da Vorstand vo da Famij fia Obabayern is; fix is fia eam oba, doss as Killakommando aus seine oagnan Reihen stammt. Ois Grund fian vasuachtn Moard on an Giovanni ko da Benno Berghammer si guad vorstejn, doss sei Spezl bei da Gejdwäsch in de oagne Toschn gwiatschaft hod.

De Angela Cimulai stejt eanan Voda an Martin Lang vor und sogt, doss eam heiradn wui, oba da Giovanni hod imma no koa Interesse on an deitschen Schwiegasohn ned und sogt, ea soi se af da Stej schleicha. De Angela losst si des ned gfoin und geht mid an Martin mid.

Mid an fingiatn Gständnis, gschrim van Benno Berghammer, wo da Giovanni Cimulai ogibt, doss ea an Mearda vo da vakoitn Leich kennt, konfrontian de Kriminala an Mario Donizetti. Wei dea koa Lust af lemslongs Gfängnis ned hod, mocht ea sei Mai af und sogt, doss da Giovanni da Mearda is.

Dawei d’Angela und da Martin im Schlofzimma af an Dochbodn san, kimmt da Giovanni Cimulai af an Hof van Bauan Lang und valongt lautstoark noch seina Tochta. Da Anton Lang lodt eam af a Brotzeit ei und moant, wonn ea sei Tochta bhoidn wui, muass ea se geh lossn. Wia da Giovanni obfälli iba an Martin redt, fordat da Anton Lang eam zu an Wettschiaßn außa. De Angela und da Martin hean de Schiaßarei und rennan naus. Zu eanara Ealeichtarung ballan de zwoa Oidn bloß af Floschn. De Treffsichaheit vo sein Kontrahentn ibazeigt an Giovanni und ea is midm Heiradn eivastondn.

Da Berghammer und de Lorenz setzn si dafia ei, doss da Giovanni Cimulai eascht noch da Valobungsfeia vo seina Tochta vahoft wead. Da LKAla is zwoar skeptisch, willigt oba ei. Trotzdem plotzt as Spezialeinsatzkommando middn ins Fest nei, wei de LKA-Zentrale eam on sofortign Zuagriff gschafft hod.

Hintagrund[VE | Weakln]

Gfuimt worn is z Däiz, ban Klosta Benediktbeiern (Gärtnarei) und z Gaißach (Goifblotz);[1] ois Schaublotz fia de „Pension Resi“ homs as Hollerhaus Irschnhausn heagnumma.

Im Netz[VE | Weakln]

Beleg[VE | Weakln]

  1. Palermo ist nah – derbullevontoelz.de