Der Bulle von Tölz: Schonzeit
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Schonzeit |
| Produktionsland | Deitschland |
| Originalsproch | Deitsch/Boarisch |
| Läng | 92 Minutn |
| Oitasfreigob | FSK 12 |
| Einordnung | Staffel 13, Foig 3 61. Foig insgesamt |
| Easchdausstrohlung | 6. Meaz 2007 auf ORF 1 |
| Stab | |
| Regie | Wolfgang F. Henschel |
| Drahbuach | Sabine Bühring |
| Produktion | Ernst von Theumer junior |
| Musi | Jo Barnikel, Stephan Wildfeuer |
| Kamera | Thomas Meyer |
| Schnitt | Michael Breining |
| Bsetzung | |
| |
Schonzeit is a deitscha Feansehfuim van Wolfgang F. Henschel ausm Joar 2007 noch on Drahbuach vo da Sabine Bühring. Es is de 61. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 6. Meaz 2007 af ORF 1 ausgstroit worn.
Handlung
[Werkeln | Am Gwëntext werkeln]Da 18-jährige Gymnasiast Georg Ott wead on da Isar tod afgfundn. Laut an Grichtsmedizina Dr. Robert Sprung hod a afgsetzta Schuss mid ara kloakalibrign Woffn ins Heaz zun Tod gfiahd. Außadem hod de Leich a kloans Hämatom am Obaoarm und Schmauchspuan on de Händ und im Gsicht.
De Kriminala Benno Berghammer und Nadine Richter findn außa, doss an Georg sei Schuikolleg und besta Freind Vinzenz Thalbach am Tatomd midm spadan Moardopfa gstriddn hod. A Hausduachsuachung eagibt, doss aus da Woffnsammlung vo sein Voda a Pistoin fejhd, de wo ogebli bei da letztn Jogd valorn gonga is. Da Otto Thalbach und sei Frau gem an Vinzenz a Alibi: Ia Bua woar dahoam. Se sejba san zwoar z Minga in da Oper gwen, oba se woin d’Vorstejung scho in da Pause valossn hom.
Da Voda van Opfa, da Professor Günter Ott, sogt aus, doss ea an Georg van Billardlokal obhoin woit, oba sei Radl neamma dort gwen is. Oiso is ea wieda hoamgfoarn und gega Mittanocht okemma.
An Benno Berghammer sei oida Schuifreind Walter Bruckner, dea wo oiwei ois Indiana untawegs is, hod kuaz noch Mittanocht on da Landstroß bei da Ortstofl vo Däiz on Schuss gheard, a poar Aungblick spada is a suibafoarbna Sportwong mid Däiza Kennzoachn on eam vorbeigrauscht. Wia si außastejd, gheard des Foarzeig an Lateinlehra Klaus Stadler, oba fian Moard kimmt ea ned in Frog, wei de Entfeanung zwischad Tatort und Ortstofl und da zeitliche Obstond zwischad Schuss und Vorbeifoart ned zammpassn woin. Wei in sein Auto a Hoarspangal gfundn worn is, gibt da Lehra zua, doss ea an Vinzenz sei Freindin Mona Brunner on d’Isar brocht hod, weis ia Radl obhoin woit. Da Lehra vazejhd weida, doss des midm Radl nua ra Vorwand vo da Mona woar, doss se eam Avancen gmocht hod, dene wo ea si natiali entzong hod. und doss da Georg Ott se zwoa im Auto gsen hod und weggaglaffa is. Aft hoda an Buam vafoigt und am Ufa midm Vinzenz Thalbach redn gseng. Ea is zun Auto zruckgonga, und wei d’Mona vaschwundn woar, is ea alloa afm Fejdweg Richtung Landstroß gfoarn; do hoda an Schuss gheard. Da Stadler is sicha, doss da Vinzenz Thalbach da Mearda is.
Da Professor Ott wead ogschossn und schwar valetzt. Da Stootsanwoit Dr. Georg Lenz is davo ibazeigt, doss da Vinzenz Thalbach dahinta steckt, wei dea Buasch amoi de Lehrarin Anita Köstler am Krong boggt und se a Schnoin ghoaßn hod. Da Professor Ott hod ban Kuitusminista intaveniat, wei da Thalbach dafia koan Schuivaweis ned kriagt hod. De Kommissar eafoarn vo da Köstlerin, doss se seit ebba oan Joar a Vahäitnis midm Professor Ott hod. Se sogt, doss ea bei ia woar, wia da Georg daschossn worn is. An Benno Berghammer foid ei, doss da Professor im Beisei vo seina Frau gsogt hod, doss ea gega Mittanocht dahoam gwen is. Duach des woar fia d’Vera Ott kloar, doss ia Mo nemnaus geht. Wia de Kriminala se wegan vasuachtn Moard on ian Mo festnehman, leists koan Widastond ned.
D’Mona Brunner kriagt Gwissnsbiss und vazejhd an Berghammer, doss da Georg Ott seinazeit de Pistoin gnumma und samt Munition in an Thalbach seina Jogdhittn vasteckt hod. Aa stejd si an Vinzenz Thalbach sei Alibi ois foisch außa; seine Ejtan hom as Parkhaus z Minga eascht kuaz noch Mittanocht valossn.
Wia da Berghammer außafindt, doss da Lateinlehra Stadler an Georg Ott fia ra eiwondfreie Ibasetzung on Sechsa neidruckt hod, wei dea sei Banknochboarin Mona Brunner obschreim lossn hod, wead eam kloar, doss da Schuibua si sejba s Lem gnumma hod, wei ea scho zun zwoatn Moi duachgfoin warad, wos sei Aus ban Gymnasium ghoaßn häd. Wei da Vinzenz Thalbach kuaz vorm Schuss zammad midm Georg Ott gseng worn is, ko ma si denga, doss ea de Woffn in d’Isar gschmissn und jetzad wieda außagfischt hod, wei de Suacharei Eagebnislos valafft. De Kommissar pressian zun Klaus Stadler und treffn dort an Vinzenz Thalbach o, dea wo sein Lehra mid da Pistoin bedroht. Da Bua ruckt de unglodne Woffn außa und gibt ois Grund fia sei Schweign o, doss ea ned woit, doss da Lehra Stadler oafoch so davokimmt. Da eigentliche Plan van Vinzenz Thalbach und da Mona Brunner woar, doss se zwoa an ibakorrektn Lehra a Falle stejn. As Diandl soid eam in a vafängliche Situation bringa und so dafia sorng, doss da Stadler ban Georg a Aug zuadruckt und eam on Viara gibt, dmid ea ned duachfoid.
Hintagrund
[Werkeln | Am Gwëntext werkeln]Gfuimt worn is z Däiz, z Gaißach und am Erzbischöflichen St.-Ursula-Gymnasium Schloss Hohenburg z Lenggrias;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
[Werkeln | Am Gwëntext werkeln]De Programmzeitschrift TV Spielfilm schreibt: „Erinnert an die guten Anfänge der Serie.“[2]
Im Netz
[Werkeln | Am Gwëntext werkeln]- Schonzeit in der Internet Movie Database (englisch)
- Schonzeit bei Fernsehserien.de
Beleg
[Werkeln | Am Gwëntext werkeln]- ↑ Schonzeit – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Schonzeit – Filmkritik bei TV Spielfilm
| Vorherige Foig 27. Feba 2007: Feuer und Flamme |
Episodnlistn | Nächste Foig 20. Meaz 2007: Wiener Brut |