Der Bulle von Tölz: Tod im Internat
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Tod im Internat |
| Produktionsland | Deitschland |
| Originalsproch | Deitsch/Boarisch |
| Läng | 94 Minutn |
| Oitasfreigob | FSK 12 |
| Einordnung | Staffel 1, Foig 2 2. Foig insgesamt |
| Easchdausstrohlung | 21. Jenna 1996 auf Sat.1 |
| Stab | |
| Regie | Walter Bannert |
| Drahbuach | Claus Peter Hant |
| Produktion | Ernst von Theumer junior |
| Musi | Kristian Schultze |
| Kamera | Hanuš Polak |
| Schnitt | Ingrid Träutlein-Peer |
| Bsetzung | |
| |
Tod im Internat is a deitscha Feansehfuim van Walter Bannert ausm Joar 1996 noch on Drahbuach van Claus Peter Hant. Es is de zwoate Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 21. Jenna 1996 af Sat.1 ausgstroit worn.
Handlung
[Werkeln | Am Gwëntext werkeln]Da Kommissar Benno Berghammer wead zun Buaminternat Schloss Lohenstein gruafa. De Anna Reindl, de 17-jährige Hausmoastatochta, is iba as schodhofte Zaunglanda vo ana Maua gstiazt und hod si darennt. Fian Polizistn Anton Pfeiffer steht fest, doss a Unfoi woar, und wui de Tode schnej wegbringa lossn. Da Berghammer schafft eam oba, doss d’Leich in de Grichtsmedizin brocht und da Fundort polizeilich obgsperrt wead.
De Baronin Victoria von Lohenstein, de Schlossherrin und Internatsleitarin, ibabringt de traurige Nochricht an Lehra und Schuibuam und setzt an Untaricht fia den Dog aus.
Da Grichtsmedizina findt außa, doss as Diandl scho vorn Obstuaz Prellungan an da Brust und Obschiafungan an de Knia ghobt hod – fian Berghammer Grund gnua, ob sofort in Richtung Moard z ermittln, wei de Valetzungan draf hideitn, doss d’Anna Reindl af an Parkblotz vo an Auto ogfoarn und iban Zaun gschleidat worn is. Oba sei Orbat wead vo mehrare Seitn untagrom: Da Pfeiffer is ned vo seina Unfoitheorie obzbringa und „vagisst“, de Spuansicharung ozruafa; as Glanda und da Zaun wean vo da Baufiama van Buagamoasta Franz Wegener repariat; und da Geländewong van Schloss wead umlackiat, obwoi ea fost nei is. Wea zua froglichn Zeit midm Wong gfoarn is, losst si ned außafindn; im Foartnbuach fejt de betreffende Seitn.
Wia da Berghammer eafoart, doss d’Anna Reindl schwonga gwen is, kimmt endli wieda Bewegung in de Ermittlungan. Da Hausmoasta Reindl gibt zua, doss ea in de Sochn vo seina Tochta gstebat und an Briaf gfundn hot, wo se an Wunsch eißat, weid wegzgeh. Ea hod da Baronin davo vazejhd, wei ea af a Huif vo eara ghofft hod. Da Kindsvoda soi da Julian Sprangenberg sei, da Sohn van Medienzar Dr. Georg Sprangenberg. Letztara woit an Diandl de Obtreibung zoin und hod iara a Prämie vo 100.000 Mark obodn. Wo dea Briaf jetzad is, woaß da Hausmoasta neamma.
De Victoria von Lohenstein wui vo da Schwongaschoft nix gwusst hom und geht vo an Sejbstmoard aus, wei as Madl in da letztn Zeit so vaschlossn woar. Aa da Georg Sprangenberg streit ois ob und losst seine Beziehungan spuin, wia da Berghammer sein Sohn festnimmt. De Stootsanwäitin Dr. Zirner ibanimmt as Verhör, oba da Julian Sprangenberg sogt nix und wead wieda freiglossn.
De Victoria von Lohenstein hod seit zwoa Joar a hoamliche Liabschoft midm Julian Sprangenberg, oba fia eam is de Baronin bloß a Gspusi; wiakli gliabt hod ea bloß de Anna Reindl. De Schlossherrin siagt des ondast und setzt eam mid da außagrissnan Seitn ausm Foartnbuach unta Druck. Ea soi ois Aktmodej fia eanan aktuejn molarischn Zyklus heahoidn.
Im Schlosshotej Lohenstein, des wo vo da Hoibschwesta van Polizistn Pfeiffer betriem wead, findt da Benno Berghammer außa, doss da Georg Sprangenberg am Omd vor da Anna ian Tod mid da Baronin on an Tisch Vahandlungan gfiaht hod und spada as Diandl dazuagstoßn is. Ea beaftrogt sei Kollegin Sabrina Lorenz, an Medienzar vorzlodn. Wia dea si weigat, wead ea vo de Uniformiatn vorgfiaht. Ea gibt zua, doss ea mid da Baronin vaobredt woar; as Madl wui ea oba ned kennt hom.
Jetzad setzn de zwoa Kriminala eanare Hoffnungan in Briaf, den wo da Hausmoasta Reindl im Zimma vo seina Tochta gfunden hot, oba neamma gnau woaß, wo ea is. Dawei da Berghammer danoch suacht, ruaft da Polizeichef Matern eam o und sogt, doss ea de Ermittlungan sofort eistejn muas, wei's koa Indiz fia an Moard ned gibt. Da Kommissar teischt schlechtn Empfang vor und trennt de Vabindung.
Wia da Benno Berghammer an Julian Sprangenberg mid an Briaf konfrontiat und eam vorwiaft, doss ea bloß so tuat, wia wonn ea de Anna liam tadad, streit da Bua ois ob, sogt, doss ea Schluss mocha wui, und rennt weg. De Victoria von Lohenstein kimmt dazua und schmeißt an Kommissar naus. Danoch geht's an Julian Sprangenberg suacha und findt eam in iam Atelier im Kella. Ea wui mid iara Schluss Mocha, do valosst se an Raum und gibt duach de gschlossne Tia duach zua, doss de Anna Reindl umbrocht hot, weis ned obtreim lossn woit und so sei Lem zasteat häd. Und wei ea si mid dem Flitschal eilossn hot, muass ea jetzad a biaßn. Dmid losst se eam alloa im Kella zruck.
Nochm spualosn Vaschwindn van Julian Sprangenberg wead da Benno Berghammer vo da Stootsanwäitin Zirner beurlaubt; da Kommissar eamittlt oba hoamli weida. Ea bsuacht a Ausstellung vo da Schlossherrin. Dort siagt ea, doss da Hintagrund vo an Buidl a romanisches Kellagewölbe doarstejd. Ea schliaßt draus, doss im Schloss – im Gengsotz zua Aussog vo da Victoria von Lohenstein – doh a intakta romanischa Kella existiat. Ea wui, doss de Baronin eam varot, wo da Julian is, oba se sogt, doss se’s ned woaß.
Da Kommissar ko oide Plän van Schloss aftreim und vaschofft si an Zuagang zun Kellagewölbe. Dort findt ea an gschwächtn Julian und bringt eam naus. Wia de Victoria von Lohenstein an Buam lem siagt, steigts afn Schlossturm und wui obehupfn, oba da Berghammer ko se davo obbringa.
Hintagrund
[Werkeln | Am Gwëntext werkeln]Gfuimt worn is z Däiz und im Schloss Neibeian;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
[Werkeln | Am Gwëntext werkeln]De Programmzeitschrift TV Spielfilm schreibt: „Mit skurrilen Typen besetzt, ist der Film das reine Vergnügen. Und Fischer spielt souverän wie immer.“ Fazit: „Pfundiger Krimispaß mit einem Schuss Satire.“[2]
Im Netz
[Werkeln | Am Gwëntext werkeln]- Tod im Internat in der Internet Movie Database (englisch)
- Tod im Internat bei Fernsehserien.de
Beleg
[Werkeln | Am Gwëntext werkeln]- ↑ Tod im Internat – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Tod im Internat – Filmkritik bei TV Spielfilm
| Vorherige Foig 14. Jenna 1996: Das Amigo-Komplott |
Episodnlistn | Nächste Foig 28. Jenna 1996: Unter Freunden |