Der Bulle von Tölz: Wiener Brut
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Wiener Brut |
| Produktionsland | Deitschland |
| Originalsproch | Deitsch/Boarisch/Weanarisch |
| Läng | 92 Minutn |
| Oitasfreigob | FSK 12 |
| Einordnung | Staffel 13, Foig 4 62. Foig insgesamt |
| Easchdausstrohlung | 20. Meaz 2007 auf ORF 1 |
| Stab | |
| Regie | Wolfgang F. Henschel |
| Drahbuach | Cornelia Willinger |
| Produktion | Ernst von Theumer junior |
| Musi | Jo Barnikel, Stephan Wildfeuer |
| Kamera | Thomas Meyer |
| Schnitt | Michael Breining |
| Bsetzung | |
| |
Wiener Brut is a deitscha Feansehfuim van Wolfgang F. Henschel ausm Joar 2007 noch an Drahbuach vo da Cornelia Willinger. Es is de 62. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 20. Meaz 2007 af ORF 1 ausgstroit worn.
Handlung
[Werkeln | Am Gwëntext werkeln]D’Resi Berghammer wead vo iara Freindin Gerda Feuereisen noch Wean eiglodn. Deara ia Tochta Fanny – da Berghammerin ia Patnkind – hod in da Hofburg ian Obschlussball. In da Nocht vorm Ball findt da Professor Feuereisen, a renommiata Neurolog, sei Frau tod af; se is duach Rotzngift ums Lem kemma, des wo se zwischad sieme und ochte afd Nocht eignumma hom muass. Ia Tochta hod a Alibi duach ia amerikanischs Gspusi Max Behn, dea wo im Grand Hotel a Praktikum mocht, des wo da Professor Feuereisen eam vamittlt hod.
Da Benno Berghammer rauscht in großa Sorg af Wean, wei sei Muada seitm Tod vo iara Freindin spualos vaschwundn is, obwoi sei Kollegin Nadine Richter mid af Wean gfoarn is und af de Berghammerin afpassn soid.
Da Oberstleutnant Prantl vo da Weana Moardkommission steht unta Druck, wei innahoib vo oana Woch drei Frauan aus untaschiedliche Schichtn duach Rotzngift umbrocht worn san: zeascht de Kaffeehausbsitzarin Rita Reiter, donn de gejdige Gerda Feuereisen und schliaßli de Pfoarraskechin Erna Schinabeck.
Da Professor Feuereisen bitt an Benno Berghammer, doss ea bei da Afklearung van Moard on seina Frau huift. Da Berghammer wui oba nochm Aftaucha vo seina unvasehrtn Muada af da Stej hoamfoarn. Wei de oba koa Auskunft iba ia Vaschwindn gem wui, grots in Kroas vo de Vadächtign und deaf Wean ned valossn.
In da Nadine Richter flammt de oide Liab zun Profiler Major Joe Gabler wieda af. Vo eam eafoarts wichtige Details iba de Giftmoard, de wo da Oberstleutnant Prantl seine Däiza Kollegen ned varodn wui.
Da Berghammer und de Richter findn außa, doss olle drei Opfa Calciumkapseln vo da Firma Klauber gega Osteoporose eignumma hom und sowoi de Gerda Feuereisen wia ra de Pfoarraskechin Schinabeck im Kaffeehaus vo da Rita Reiter ei- und ausgonga san. Außadem woar d’Resi Berghammer mid on schnauzbeartigen Mo und da Gerda Feuereisen friah afd Nocht vor deara ian Tod in dem Lokal. Da Benno Berghammer kaft Calciumkapseln in on Drogeriemoarkt in da Näh und ibaredt an Oberstleutnant Prantl, doss ea se röntgn losst, wei festgstejd wean soi, ob Tallium drinad is, wia’s bei Rotzngift da Foi is. Tatsächli san mehrane Kapsln mid Rotzngift präpariert worn; aft wead des Produkt in gonz Östareich ausm Handl gnumma.
Fian Prantl gibt’s jetzad foigade Vadächtige: da Beppi Reiter, dea wo s Kaffeehaus vo seina Frau eabt; d’Fanny Feuereisen, de Alloaeabin van Millionanvameng vo iara Muada; de Feuereisen eana Haushäitarin Grimpelstätter, de wo 10.000 Euro eabt; und donn kannt’s aa no on bishea unbekonntn Pharma-Eapressa gem. De Grete Domenika Klauber, de 76-jährige Fiamengrindarin, de wo an Betrieb ned on ian mehra wia 50 Joar oidn Buam ibaschreim wui, is fossungslos und fiacht an Ruin van Untanehman. Se schliaßt kategorisch aus, doss bei de hohen Sichaheitsstandards Rotzngift in iare Produktion kemma is, und se bstreit, doss dapresst worn is.
De Maridi Steiger und da Beppi Reiter wean wegan Vadocht af dreifochn Moard festgnumma; de Steigerin orbat bei da Fiama Klauber ois Laborantin und nemhea ois Aushuif in da Reiterin ian Kaffeehaus. Se hod oiso problemlos Rotzngift in de Kapsln schmuggln kinna. Da Berghammer und de Richter glam olladings ned on d’Schuid vo de zwoa, wei nua a poar Schochtln präpariat woaren und es a z großa Zuafoi gwen warad, doss ausgrechnt de Rita Reiter vagifte Kapsln dawischt. Se vamuatn, doss da Professor Feuereisen etliche Packungan mid Rotzngift präpariat und ins Regal van Drogeriemoarkt zruckglegt hod – bis af oane, de wo ea fia sei Frau vorgseng hod. Bei on Unfoi zoid da Gerda Feuereisen iare Lemsvasicharung de dopplte Summe on ian Mo aus, nämli zwoa Millionan Euro – sowoi Serienmoard wia raa Eapressung vo ara Pharmafiama oda deara ia Schlamparei bei da Produktion gejtn ois Unfoi. Bei da Laboruntasuachung vo de vagiftn Kapsln san Partikl vo on Oignvanichtungsmiddl fia Siaßwossa-Aquarien gfundn worn. In da Praxis van Professor Feuereisen steht a Aquarium, und ban Präparian vo de Kapsln hoda gschlampad gorbat. De Beweislog is olladings so dinn, doss da Berghammer, de Richter und da Prantl in de Trickkistn greifn: D’Fanny Feuereisen wead zun Schein vahoft; aft gibt ia Voda an Moard zua. Ois Grund gibt ea o, doss ea sei Tochta aus de Kroin vo iara ibafiasorglichn Muada bfrein miassn hod; außadem hods as Haus vakafa, mid da Fanny noch Amerika geh und si scheidn lossn woin. Da Benno Berghammer widaspricht an Professor und wiaft eam vor, doss ea de dopplte Vasicharungssumme kassian woit und doss eam aus Gier, Greßnwahn und Hochmuat voikomman wuascht woar, wia vui Unschuidige drafgengan.
Hintagrund
[Werkeln | Am Gwëntext werkeln]Gfuimt worn is z Däiz und z Wean;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
[Werkeln | Am Gwëntext werkeln]De Programmzeitschrift TV Spielfilm schreibt: „Der Wiener Schmäh ist schon die halbe Miete: Wem Sätze wie ‚Ned dös Herrli beißen!‘ (‚Schön brav bleiben!‘) ein Lächeln ins Gesicht zaubern, der wird sich kaiserlich-königlich amüsieren.“ Fazit: „Die Wiener Luft tut dem Bullen gut.“[2]
Außadem
[Werkeln | Am Gwëntext werkeln]Ofong Meaz 2008 hod da ORF de easchte Wiedahoiung vo „Wiener Brut“ aus Pietätsgrind ausm Programm nausgschmissn, wei am 9. Feba da Buagamoasta vo Spitz an der Donau, da Hannes Hirtzberger, mid on Mon Chéri vagift worn is und bis zun 18. Meaz im kinstlichn Tiafschlof woar.[3]
Im Netz
[Werkeln | Am Gwëntext werkeln]- Wiener Brut in der Internet Movie Database (englisch)
- Wiener Brut bei Fernsehserien.de
Beleg
[Werkeln | Am Gwëntext werkeln]- ↑ Wiener Brut – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Wiener Brut – Filmkritik bei TV Spielfilm
- ↑ ORF wirft Wiener „Bullen“-Folge raus – oe24.at (Memento vom 18. Fewer 2020 im Internet Archive)
| Vorherige Foig 6. Meaz 2007: Schonzeit |
Episodnlistn | Nächste Foig 27. Meaz 2007: Krieg der Camper |