Grofanau

De boarische Stod Grofanau (amtlich: Grafenau) ligt im Landkroas Freyung-Grofanau im Regierungsbezirk Nidabaiern. Da staatlich oerkannde Luftkurort im Boarischn Woid ligt am Goldna Steig, hot 1376 de Stodrechte erlangt und is somit de äteste Stod vom Boarischn Woid.

Eadkund

Geografische Log

De Stod ligt im Mittlgebirg Boarischa Woid auf ana Heah zwischn 600 und 700 Meta iba NHN unmittlbar am Nationalpark Boarischa Woid. Endlang vom eastlichn und südlichn Stodrand fliasst de Kloane Ohe (Grofanaua Ohe), a Quejfluss vo da Ilz. Sie speist an 1976 kinstlich oglegtn See im Spoat- und Erholungspark vo da Stod. Grofanau ligt in da Moldanubischn Region vom kristallinen Grundgebirg in da Landschoft vom hintern Boarischn Woid. Des da ogsprochane nordbairische Grundgebirg is da westliche Teil vo da Bemischn Masse. Dozui ghearn de Londschaftn vom Boarischn Woid, vom Obapfaiza Woid, dem Fichtlgebirg und dem Franknwoid. De Einheit vo da Bemischn Masse buildt den Ostteil vom europäischn variszischn Orogens. De variszische (aa varistische oder variskische) Gebirgsbuildung voizog se hauptsächle in de Periodn vom Devon und Karbon im Erdzeitoida vom Paläozoikum. Devorherrschndn Gesteine san vo mächdige Granitkearpa durchdrungane Gneis, De Zuiordnung Grofanaus zum Hintern Boarischn Woid werd durch sei Lag (unmittlbor) eastlich vo da Störungszona vom Grossn Pfoi reglamendiert.

Klima

De Temparatur betrogt im Joahresmittl 7-8 Grod Ceisius. Groafanau erfuillt seit 1965 - nochgwiesn durch ständig erneierte und kontrollierte Guadachtn durch den Deitschn Wedadianst - de bioklimatischn und lufthigienischn Voraussetzunga zum Fuahrn vo dem Prädikat Luftkuaort. In da näharn Umgebung wern vom Deitschn Wedadienst foigende Wedastationa obgruafa:

Sankt Oswoid-Riadlhütte
Saldnburg-Entschenreuth
Woidhaisa (Nationalpark)
Mauth-Finstaau
Spiegelau-Klingabrunn

Gschicht

Bis zum 19. Joahrhundart

Da erste schriftliche Nochweis iba Grofanau stammt aus'm Joahr 1255. Im Joahr 1376 hot da Kaisa Karl IV. sie zur erstn Stod vom Boarischn Woid erhobm, da de Stod dodurch des Recht erhoiltn hot a Stodmaua zu errichtn und somit da Soizhandl mit Behmengsichart worn is. Grofanau is am Goldna Steig gleng wecha a Handlsvabindung zwischn Eastareich, Baiern und Behmen dorsteit. Kurz zuvor, im Joahr 1375, is des Gebiet um Grofanau, vawoalt vom Schloss Bärnstein aus, noch dem Aussterm vo de Grafn vo Hois an den Landgroaf Johann I. vo Leichtnberg gfoin. 1417 is an den Groaf Etzel vo Ortnburg kema und 1438 an de Wittlsbacha.

1450, 1468 und 1504 is Grofanau vo Behmen ibafoin worn und de Gulden Strass unbasierbar gmacht worn. Im 16. Joahrhundart is da Soizhandl zruckganga und somit hot Grofanau an wirtschaftlicha Bedeidung valorn. No heit erinnart des jahrliche Säumafest, des 1976 zur 600-Joahr-Feia vo da Stod erstmois vaanstoidet worn is, an de Säuma gnennde Soizhandla. 1521 hot Grofanau sei ersts Radhaus erhoidn. Scho 1523 is Grauenaw in der vo Johannes Aventinus ogfertigtn erstn Londkartn vo Baiern ausgwiesn worn. Im Joahr 1634 grassiede de Best in da Foig vo Einquatierunga fremda Truppn im Dreißgjahrign Kriag und 1742 plindartn de Pandurn (ungarische Husarn) Grofanau. In de Joahr 1504, um 1545, zwischn 1550 und 1572, 1639, 1832, 1844 und 1850 ham Stodbrend gwidt. Denno is de Stod imma wieda nei aufbaut worn. Die Guldnstrass is bis 1772 imma wieda repariert worn. 1845/46 is auf dem Stodplotz des Markante oide Radhaus mit seim zierlichn Tiarmal an da Stej friahrara Radhaisa entstandn.

20. Joahrhundart

Im Zwoatn Wejtkriag is Grofanau unbeschädigt blim. Im Gengsatz zur Nachborgmoa Scheanberg is es in Grofanau aa beim Eimarsch vo de Amerikana ned zu kriagarische Handlunga kemma, do da Stodpfarra Rankl mit seine Nichtn de Truppn mit ana weissn Fahna entgengganga is und eahna de Kapitulation vo da Stod Grofanau obon hot. Am 3. Februar 1946 ham de erstn Gmoawoihln noch'm Zwoatn Weltkriag stattgfundn. Sei 1965 is Grofanau a staatlich anerkannta Luftkuiort. Ned zlezt aafgrund vo da Integration zoahlreicha Flichtling und Vatriemne is in de Nochkriagsjoahr a intensiva Wohnungsbau erfoilgt. De Zoahl vo de Gebäude is vo 186 im Joahr 1945 auf 562 am 31. Dezemba 1978 (ohne Eigemeindunga) ogsting. Am 6. Septemba 1967 hot in da Stod die offizielle Grindungsvasammlung vom Zweckvaband zua Feadarung vo dem Projekt vo am Nationalpark Boarischa Woid stattgfundn. Bis 1972 war Grofanau Kroasstod. Im Zug vo da Kroasreform hot sie den Status valorn. Durch de Zammlegung vo de beidn Oidlandkreis Grofanau und Woifstoa is da Landkroas Freyung entstandn, ab'm 1. Mai 1973 Landkroas Freyung-Grofanau, mit dem Vawoiltungssitz in Freyung. Bis 1974 is in Grofanau die ''Brasiltobakfabrik Bongstätter betriem worn. Znachst in Perlesreut, unweit vo Grofanau, is de Tobakfabrik bis zum Beginn vom Earstn Wejtkriag mit ana Dieslmodoranlag betriem worn, de gleichzeite den Oat mit Strom vasorgt hot. Mit da Vaknappung vo Roheal währand de Kriagsjoahr is de Anlag ab Herbst 1915 noch Grofanau in de ehemolige Mittamui am Venusbeag valegt worn um da de Produktion - aus heitiger Sicht ihra Zeit voraus - bis zur Stilllegung vo da Fabrik oltanadiv mit Wassakraft aufrechtzumdahoiltn. De Schnupftobakfirma Alois Pöschl hot de Firma kaaft und domit a de Rezepte. No heit werd da Schaizla Perlesreuta Waidla Fresko vo da Firma Bogenstätter vo da Firma Pöschl mit unvaändata Rezeptua hergstellt und vatriem.

Eingemeindunga

Am 1. Aprui 1971 is de bis dohi sejbschtändige Gmoa Rosenau eigliedart worn. Am 1. Januar 1972 is Großarmschlog dazua kema. Neidorf foigte am 1. Januar 1974. De Gmoa Schlog und Gebietsteile vo da aafgleastn Gmoa Haus im Woid san am 1. Januar 1978 dazuakema. Zu Grofanau ghern 52 Oartsteile:

Religion

De Gschicht vo da katholischn Sejsorg in Grofanau is ent mit'm benochbartn Sankt Oswoid-Riedlhütte vaknipft. am 14. Juni 1389 is de Kirch in St. Oswoid eigweiht worn. Siem Joaht spada, am 5. August 1396, is de Grindung vom PaulinerKloasta St. Oswoid beurkundt. Sowoi Kirch wia a Kloasta san Stiftunga vo Landgrofn Johannes I. vo Leichtnbeag. Iba den Zeitpunkt vo da Errichtung vo da Stodpfarrkirch und da Pfarrei in Grofanau is nix bekannt. Grofanau is znachst ois Säkularpfarrei vom Kloasta St. Oswoid seelsorgerisch betreut. In da Stiftungsurkundn vom Kloasta is vo da Kürchen und Pfarr unser liabn Frau Marie Gottes Mutter in da Groafanau, die unsa rechts Erv is... zu lesn. Ende des 16. Joahrhundarts is des Kloasta St. Oswoid aafgrund seina hoa Vaschuidung ois Probstei vo da Abtei Niedaoida (bei Degndorf) ibanomma wordn. Ab 1604 is de Sejsorg Grofanaus oam dem Kloasta St. Oswoid oageahringa Vikar ovadraut worn. 1806 is Grofanau erneit Stodpfarrei. Grofanau gheart zum Bistum Bassa. Da katholische Stodpfarra vo Groafanau is Dekan Kajetan Steinbeißer, sei evangelische Kollegin is Pfarrarin Sonja Schuster. De Gschicht vo da evangelischn Sejsorg in Grofanau und da Umgebung beginnt mit da Privatisierung vo de Gloshüttn und da Industrialisierung vo da Hoizgwinnung. Fränkische und Sächsische Untanehma ham greaßtnteils de Industriezweig ibanomma und ham evangelische Focharbeita aus ihrana Hoamat nochghoit. 1901 is de Martin-Lutherkirch eigweiht worn und 1934 die Grofanauer Hoizkirch. Noch'm Kriag san vui evangelische Flichtling kema und 1969 is die bedeitnd greaßare Christuskirch, sowia die Dietrich-Bonhofferkirch Schönbeag eigweiht worn. Seit 1948 is de evangelische Gmoa Groafanau a eigenständige Gmoa. Zu ihr ghearn Spiegelau, Schönbeag, Klingenbrunn, Innernzell und des Umland. De Gmoa is Teil vom Dekanat Bassa. Kirchan vo da Stod:

Kapelln in Woihaiser (betreut de Pfarrei Grofanau)
katholische Stodpfarrkirch Mariä Himmefohrt. Des neubarocke Bauwerk is 1905 bis 1907 noch Plänen vo Architekt Michael Kurz entstandn. De Altäre stamman aus da Zeit um 1730, zoareiche Figurn aus da Zeit vo da Gotik und vom Barock.
katholische Filialkirch Herz Jesu (Neudorf)
katholische Filialkirch Mariaä Unbefleckte Empfängnis(Großarmschlog)
katholische Gmoakirch Hl. Herz Jesu (Haus im Woid)
Spitoikirch Hl. Dreifaltigkeit (1769)
evangelische Christus-Kirch(1969)
evangelische Martin-Lutherkirch (1901) (Spiegelau)
evangelische Dietrich-Bonhoefferkirch (1968) (Schönbeag)
Woillfahrtskirch Brudersbrunn (1842), danem Gedächtniskapelln, de 1952 Paula Holzhäuser aus dem Oatsteil Elsenthal fia ihran im KZ ermordatn Voda errichtn hot lassn.

Politik

Bügamoasta

1. Bügamoasta is Max Niedermeier (CSU). In da Stichwoi vom 3. Juni 2012 is er gega Wolfgang Kunz (SPD) mit 60,6 % zu 39,4 % zum Nochfoiga des erkranktn Helmut Peter gwejlt worn.

Stodrad

Der Stodrad in Grofanau hot 20 Sitz. De teiln se noch da Kommunalwoil am 16. März 2014 so aaf

CSU: 9 Sitz
SPD: 7 Sitz
UWG: 4 Sitz

Wappn

Des Wappn Grofanaus built an teildn Schild ob, welcha im obarn Teil weiße und blaue Rautn zoagt. Im undan Teil befindt se a scharza Bär zwischn Zinnen, welcha de Burg Bärnstoa symbolisiern soi. De Wehrhaftigkeit Grofanaus soi durch de Zinnenmaua doagstejt wern. Des Stodarchiv vafiagt iba de Orginoiurkundn zua Valeihung vo dem Stodwappn aus'm Joahr 1508.

Städepartnaschaftn

Eastareich: Schärding (seit 1976)
Tschechei: Kasperské Hory (deitsch: Bergreichenstein; seit 1991)

Kuitua und Sengswiadigkeitn

Da Stodplotz steigt noch Nordn stark o. Do befindt se des neigotische, mit am Treppngiebe vasejngne, ehemalige Radhaus aus dem Joahr 1845, jetzt Nationalparkvawoltung. Am obarn End steht de Pfarrkirch Maria Himmefahrt. Ois Luftkuioat bestitz de Stod Grofanau a behoazt Welln-Freibod, an Kuipark und is am "Goafplotz am Nationalpark Boarischa Woid" beteiligt. Des weitarn vafügt Grofanau iba drei Museen. Grofanau zoagt an zwoa Standoatn eaffantlich aufgstejde Bronzeplastikn vom Kinstla Heinz Theuerjahr. Am Gymnasieum vo da Stod is da Auahahn zum seng, im Grofanaua Kuipark da Grosse Bär.

Parks

Museen

Des Stodmuseum untarichtet de Besucha iba de Gschicht vo Grafonau und beziagt dobei aa de Darstellung vo da fruahran Stodaapothekn mit ei. Des weitern wern historische Handwerkstraditionen dogstejt. Am Westeingang vom Kuipark befindt se des Bauernmöbemuseum (bestehnd aus zwoa Bauernhaisa, ana Wognremisn und am TroadkastnI, wechas de Malareikunst vo de Bauernmöbeaus'm 18. und 19. Joahrhundart im Boarischn Woid ausgstejt. Des weidarn zeing zoahlreiche zeitgnössische Gegenständ vom baierlichn Lebn. Des Schnupftobakmuseum is des wejtweit oanzige zu dera Thematik und gibt iba Gschicht, Herstellltun sowia Vabreitung vom Schnupftobak Auskunft. Do befindt se aa des greasste Schnupftobakglos da Wejt mit am Gwicht vo iba 30 Kilogramm.

Reglmäßige Vaanstoutunga

Am 1. Freidog im Juli beginnt des Traditionelle Voiksfest (Seit 1950)
Am 1. Samsdog im August findt des Säumerfest statt. (Seit 1976)
Rockfestival Lichtneck (1995-2014, 2018-)
Adventszeit: Weihnachtsmarkt am Stodplotz

Trivia

Unda da Regie vo Klaus Lemke ham unta andarm in Grofanau und Umgebung de Dreaarbeitn zum Fuim Arabische Nächte stottgfundn. Da Fuim is 1979 uraufgführt worn.

Wiatschoft und Infrastruktua

Tourismus

Am 24. Mai 1964 hot de offizielle Ereaffnung vom Berlina Feriendorfauf'm Grofanaua Schweimbeag durch Wilhelmine Lübke, da Gattin vom damalign Bundespräsidentn Heinrich Lübke stottgfundn. Zu dera Zeit war's mit 125 Bungalows des greasste und modernste Feriendorf in Europa. Finanziert worn is de Anlag durch de Stiftung Hilfwerk Berlinin Zammarbat mit da ARD-Fernselotterie ''Ein Platz an der Sonne''. Des Feriendorf war zletzt vo de holländischn Roompot-Holiday-Gruppn betriebn. Momantan is es gschlossn. Des Feriendorf is mittlaweile vo da Stod Grofanau erworm worn, um's an an Investor zu vakaffa. Da nächstglengne Campingplotz Camping am Nationalpark ligt im Nachbarort Spiegelau. Er is ganzjahrig göffnet und hot a Kapazität vo 100 Plätz (inklusiv Wohnmobile). Am Südrand vo da Stod zum benochbartn Stodteil Schlog ligt a Liftanlag mit zwoa Schlepplift. De werd in de schneelosn Monat zur Bobbahn (schienengführt) umfunktioniat. De Gsamtläng vo da Bahn hot iba 1000 Meta. Da Höhnuntaschied ligt bei knapp iba 100 Meta. Am eastlichn Rand vom Grofanaua Kuipark stehnan im Somma Aspholtstockbahnan zur Vafügung. Im Winta werd de Anlag ois Eishalle (Eislaffa und Eisstockschiassn) gnutzt. Fua Piloten vo Hängeleitarn befindt se in da Näh zu Grofanau am Beag Büchlstoa an Startrampn. Im August 2005 is da Goafclub am Nationapark Boarischa Woid e.V. aeaffnet worn. Die Anlag umfasst 90 ha mit 18 bespuibarn Leacha. Seit 2004 gibt's de Bognregion Boarischa Woid mit Sitz in Grofanau. Traditionella Bognsport konn a 3D Jagdpacua am Brudersbrunn mit 28 Zieln, am 3D Erlebnisparcui im Natursportzentrum Rosenau mit 24 Zieln, auf der 3D Bognwiesn am Kunsthof in Neudorf und in ana Halle am Kunsthof ausgübt wern. Am Grofanaua Langlaufzentrum Rosenau besteht de Meaglichkeit zum Einstieg in de Baiawoidloipn.

Vakeah

Stross

Duch des Stodgebiet führt ois oinzige Bundesstrass die B 533. De zweigt bei Elsenthal vo da B 85 Bossa - Cham ob und vabindt Freiung mit dem Autobahnanschluss an de A 3 (Europastrass E56) bei Hengersberg. Sie is de nächstglengne Bundesautobahn zu Grofanau. Drüba naus vabindt de Staatsstrass 2132 Grofanau mit Spiegelau und Zwiesl.

Zugvabindung

Mit da Ereaffnung vo da Bahnstreck Zwiesl-Grofanau am 1. Septemba 1890 erlangte Grofanau Oschluss an des Bahnnetz. Seit 2003 vakehrn de Züg vo da Woidbahn im Zwoastundntakt auf dera Streck mit Oschluss in Zwiesl noch Plattling, Boarisch Eisnstoa und Bodnmoas. De Bahnstreck is seitdem in des Nationalparkvakeahrskonzept Boarischa Woid integriert. Bis Dezemba 2018 soi die Streck fia an Stundntakt ausbaut wern. Im Zuge vo ana Modanisierung vom Bahnhofareal 2008 is da Bahnhof auf oa Gleis reduziert worn.

Oeffantlicha Nahvakeah

Da Grofanaua Busbahnhof werd vo da RBO und weidarn privatn Busunternehmarn bedient. De vabindn Groafanau mit Zuin in da Region. Donebn exastiert a Stodbus vo da Firma Sieghart Reisen, welcha Wochndogs zwischn ca. 7 und 18 Uhr im onähandn Stundntakt auf vier Linian vakehrt. Der werd währand dem Voiksfest um a täglichs Nochtliniennetz aaf zwoa Linien ergänzt. Grofanau is an de 'Igelbusse'vom Natiionalpark Boarischer Woid obundn. Da Busbahnhof ligt in unmittlbarer Nochbarschaft zum Bahnhof vo da Stod. Im Zug vo am 1,3 Milliona deiarn Umbau is des gsamte Bahnhofsgländ bis zum Joahr 2009 umbaut worn und a neia Busbahnhof erricht worn. Bis Novemba 2007 san zwoa Kreasvakeah, a Busholtestej sowia a Parkplotz nei oglegt worn. Im Stodgebiet Grofanau gult des Baierwoid-Ticket auf Regionalbuslinia der RBO. Seit dem 1. Mai 2010 is de Stod nebn weidaran Baierwoidgemeindn an dem GUTi-Gästeservice Umwejt-Ticket beteiligt, des seine Gäst kostnlose Befeadarung auf olle Bahn- und Busvabindunga im Baiawoid-Tiket-Tarifgebiet obietet. Des guit abweichnd a im Grofanaua Stodbus.

Luftvakeah

In etwa 4,5 Kilometa Entfernung (Luftlinie) zum Stodzentrum an da Obzweigung B 85/B 533 sidwestle vo da Stod ligt da Sondalandeplotz Flugplotz Elsenthal-Grofanau. Der is 1963 vo ana eartlichn Speditionsfirma aricht worn und spada vom Flugsportvarein Grofanau ibanomma worn. Er besitzt a 500 m lange Naturstart- und Landebahn.

Wiatschoft

In da zentraleartlichn Hierarchie rongschiert de Stod ois Mittlzentrum. Im Rahma vo da Regionalentwicklung ghert des Mittlzentrum Grofanau zur Planungsregion Doana-Woid.

Osässige Untanehma

AMF (Minaroifoasarn)
AVS Ing. J.C. Römer GmbH (Vetui, Amaturn)
Bucher Brai GmbH & Co. KG (Getränk)
BWmedien GmbH (Intanetdeanstleistunga)
elumeg GmbH (Elektrokabefabrikation)
Ludwig Baierer e.K. (Minaroioi, Brennstoff, Tankstej)
Sedlbauer AG (Elektronik)
SLE (Microelektronik)
Zambelli (Doachsystem)
Bognshop Binder (Bognspoart)
Spectaculum Historica (Eventmanagement)

Medien

Grofanaua Ozoaga (Lokalredaktion vo da PNP)

Eaffantliche Eirichtunga

Schuin

Des erste Schuihaus vo da Stod befindt se in da Scharrerstrass (Numma 35). De Ibalassung vo dem Gebäude zua Arichtung vo ana Schui is am 27. Juni 1610 vom Propst zu St. Oswoid, P. Laurentius Seyberer, beurkundt. Mit de Oastaferien 1945 endn znachst olle Untarichtsaktivitätn vo da Gmeinschoftsschui im Nationoisozialimus. Fortgführt werd da Schuiuntaricht in Grofanau erst wieda - antsprechand de Oweisunga und Vorgobn vom Militärgouverneur - ab dem 19. Septemba 1945. Am 1. Oktoba 1950 werd a dreiklassige Staatliche Mittlschui fua Knobn ois Vorlaifa vo da heitinga Reoischui aeaffnet. Am 7. Septemba 1965 werd des Gymnasium ois kommunale Schui gründt. De Schui is am 1. August 1967 vastaatlicht worn. Im Joahr 1993 hot sie ihran bis heit guiltgn Nama Landgraf-Leuchtenberg-Gymnasium erhoatn. Nebn de erwähntn Schuiartn is Grofanau Standort für Mittl- (Propst-Seyberer-Schui), Förder-(Don-Bosco-Schui), Grund-, Berufsfach-, Berufs-, Musik- und Voikshochschuin mit insgasamt duchschnittle 2300 Schuala.

Vawoitunga

De Stod beheabeagt seit 1976 im ehemolign Radhaus den Sitz vo da Vawoitung vom Nationoipark Boarischa Woid.

Gsundheitswesn

De Klinkn AM GOLDENEN STEIG vom Landkroas Freiung Grofanau GmbH betreibm in zentrala Lag a Krangahaus des mit am Helikoptalandeplotz ausgstatt is.

Perseanlichkeitn

Karl Alexander von Reichlin-Meldegg (geborn am 22. Februar 1801 in Grofanau, gstorm am 16. Februar 1877 in Heidlbeag), Philosoph, Theolog und Hochschuileahra.
Alfred Edel (geborn am 12. März 1932 in Abensbeag; gstorm am 17. Juni 1993 in Frankfurt am Moa), Schauspuia,; is in Grofanau beigsetzt worn.
Fredl Fesl (geborn am 7. Juni 1947 in Grofanau), Liadamacha und Kabarettist
Stephan Haering, (geborn am 15. Septemba 1959 in Grofanau), reamisch-katholischa Theolog, unta anderm Richta am Erzbisschheaflichn Konsistorium und Metropoitangricht Minga.