Weanawoid

Aus Wikipedia
Der Artikl is im Dialekt Ostestarreichisch gschriem worn.
Weanawoid
Da Weanawoid bei Spoaboch
Da Weanawoid bei Spoaboch

Da Weanawoid bei Spoaboch

Höchster Gipfel Schepfe (Schöpfl) (893 m i. A.)
Lage Niedaöstareich, Wean
Teil der Noadoipn
Koordinaten 48° 5′ N, 15° 55′ OKoordinaten: 48° 5′ N, 15° 55′ O
Gestein Flyschzone/Koichoipn
Besonderheiten UNESCO-Biosphärenpark]

Da Weanawoid (deitsch: Wienerwald) is da noadestliche Ausleifa vo de Noadoipn in Niedaestareich und Wean. Ea is a 45 km langs und 20–30 km braads Middlgebiag, des wos zum gresstn Teu bewoided is. Außadem is ar aans vo de wichtigstn Noheaholungsgebiet vo de Weana.

Blick vom Weanawoid (Hocha Lindkogl) af Wean (links)

.

Geologie[Werkeln | Am Gwëntext werkeln]

Geologisch gseng is da Weanawoid in zwaa große Zonan aufteut: in Flysch-Weanawoid und in Koich-Weanawoid. Danebn gibt’s aa no klaane Teule vo da Molassezone im Noadraund und tertiäre Becknoblogarungan im Ostn. Duatn im Ostn findt mar aa de Thermanlinie, de natialiche Grenz zwischn Weanawoid und Weana Beckn.

Da Flysch-Weanawoid ziagt si vo Klostaneubuag owe duachn Westn vo Wean und daun iwan grestn Teu vo da niedaestreichischn Seitn vom Weanwoid. De Staana im Flysch-Weanawoid san recht vüüfötig, zmeist sans a Koichmeagl, a Tonmeagl odar a Saundstaa. Typisch fian Flyschweanawoid san saunfte Laundschoftsfuaman und a teuweis recht saura Bodn, es kaun owa trotzdem oft koichhoitige Insln dazwischn gebm. Da Untagrund nimmt oft nua schlecht Wossa auf, es kau sei wauns regnt, dass a Haung ins Rutschn aufaungt.

Da Koich-Weanawoid laungt vom Zugbeag in Liesing iwa die Beagkettn vom Höllnstaa, Anninger und Lindkogl bis zum Peustaa im Sidwestn. Ea setzt si zmeist aus Koich und Dolomit zsaumm und is vüü truckana ois wia da Flysch-Weanawoid, weu s Wossa duachs de Karbonat-Staana schnöö duacherinnd. De Higln im Koich-Weanawoid haum oft recht steule und schroffe Häng.

Woid[Werkeln | Am Gwëntext werkeln]

Da Flysch-Weanawoid is za 77 % a Laubwoid, vuar oim Buachn, Oachn und Haabuachn. Danebm gibt’s, zmeist aupflaunzt Fichtn, Taunnan und Lärchn. Im Siidostn da Koich-Weanawoid is za 46 % Nodlwoid, und zwoa in easchta Linie Schwoazfährabaam. Da Schwoazfährawoid vo de Noadostoipm is a bsundara Lebmsraumtyp, in dem bsundare Pflaunzn und Viecha lebm und dens in dera Ausprägung nuar in Wean und Niedaestarreich gibt. De Schwoazfährabaam hod ma friacha fia s Bechn heagnumma.

Da Weanawoid is fia launge Zeid a Bannwoid und a adligs Jogdrevia gwest. A letzta Rest vo dera Zeid is da Lainza Tiergoatn in Wean, dea wos heid a effentlich zuagänglicha Wüdpark is. In de Joa 1870 bis 1872 is da Weanawoid duachn Josef Schöffel, in spodan Buagamasta vo Mödling knopp voa da Obhoizung grett worn. Heit is da Weanawoid gsetzli gschitzt. Ea is Teu vom Biosphärenpark Wienerwald und auf große Flächn Natura 2000 Schutzgebiet. Ziaka 20% vum Weana Gmoagebiet is bewoidt.

Kuitualaund[Werkeln | Am Gwëntext werkeln]

Im Weanawoid gibts 23 vaschiedane Oatn vo Wiesn, vo recht fette Glotthofawiesn iwa Feichtwiesn bis hii zu steppnoatige Trocknrosn. Friacha woan aa Huatweidn recht heifig, se san owa duachn Struktuawaundl in da Launwiatschoft zmeist aufgebm wuan und zweng dem daunn mit Woid zuagwochsn. Auf de letzn Restln vo de Huatweidn schickt ma heitzdog wieda a Viech, zmeist Schoof, auf dass da uaspringliche Charakta vor dera Laundschoft dahoidn bleibt. De Osthäng vom Weanawoid, auf da Thermenlinie, san a bekaunntes Weibaugebiet.

Im Netz[Werkeln | Am Gwëntext werkeln]

 Commons: Weanawoid – Sammlung vo Buidl, Videos und Audiodateien