Robert Lowie

Der Artikl is im Dialekt Owaöstareichisch gschrim worn.

Da Robert Harry Lowie (* 12. Juni 1883 in Wean; † 21. September 1957) is a US-amerikanischa Anthropolog und Etnolog gwesn. Ea woa a Expeate fia d'Uaeinwohna vu Noadamerika und a wichtiga Mãu fia'd Entwücklung vu mearare modeane anthropologische Theorien.

Seine Öitan woan ungarische Judn, de in Wean glebt håm. 1883 is da Lowie åis Robert Heinrich Löwe auf'd Wöid kemma. 1893 is a mid da Familie in'd USA kemma, wo a sein englischspråching Nãum kriagt håd. Da Lowie håd dãun ãugfãnga beim Franz Boas ãn da Columbia-Uni z'studian, wo a 1908 in Ph.D. gmåcht håd. 1909 is a Assistenz-Kurator ãm Amerikanischn Museum fia Natuagschicht woan, wo a in Clark Wissler kenna gleant håd, dea eam insofean beeinflusst håd, dass a si späda auf de Uaeinwohna vu Amerika spezialisiad håd. Vu 1921 bis 1950 woar a Anthropologie-Professoa ãn da Berkeley-Uni, wo a wia da Alfred Kroeber, dea aa a Schüla vum Boas woa und wia da Lowie und da Boas an deutschspråching Hintagrund ghåbt håd, a wichtige Figua in da Leah vu da ANthopologie vu da dåmåling Zeid woa.

Da Lowie håd mearare Expedizionen in de Großn Emna gmåcht, wo a bei mearare indigene Gsöischåftn wia de Absarokee, Arikaree, Hidatsa, Mandan und Schoschonen ethnografische Föidfoaschungen gmåcht håd. Kiazare Foaschungen håd a aa im Südwestn vu de USA und in Südamerika gmåcht. Bei a boa vu seine Åaweitn håd a si drauf konzentriad, dass a schnöi nu Datn vu Vöika zsãmmsãmmit, de wås schãu in da Gfåah gwesn san, dass's aussteam, damid denen eana Lemsweis aa nu dokumentiad wiad (den Zuagãng zua Foaschung nennt ma aa wüide Vöikabeschreiwung ,„salvage ethnography“).

De theoretische Richtung, zu dea ma in Lowie zöihn kãu, is im Großn und Gãnzn aa de, zu dea da Boas, sei Leahra, zum rechna is. Da Lowie is zöihd åiso zum Kuituarelativismus, dea si voa oim geng an viktorianischn Kuituaevoluzionismus gstöid håd. Wia beim Boas låssn si aa beim Lowie Einflüsse vu de deitschn Philosophn Immanuel Kant, Georg Hegel und Johann Gottfried Herder feststöin. Im Gengsåtz zum Boas håd si da Lowie åwa vüi mea fia historische Komponentn intaressiad und fia'd Vaändalichkeit. Sei Ãnnãhm woa, dass Kuituan nämli koane feating Konstrukte san, sondan wås, wås si vaändan kãu und dass si si gengseitig beeinflussn.

A wichtige Figua is da Lowie aa gwesn in da Gschicht vu da etnosoziologischn Foaschung. Ea håd a System entwückid, mid dem si vaschiedene Vawãndtschåftsteaminologien untaschein låssn. Ea teud in seim Schema de Teaminologien in 4 Systeme ei, de jeweus a åndare Åat und Weis kennan, wia ma de Vaãndtn vu da Öitangenarazion nennt. Ea håd a lineals System (wia mia: Våta, Muata, Onkin, Tantn), a genarazionals (Muata und Tantn wean gleich gnennt, Våta und Onkin aa), a bifurcate collateral (Onkin auf da Seitn vum Vådan wean ãndas gnennt wia auf da Seit vu da Muata; Tantn emso) und a bifurcate merging-System (a Öitanteu und seine Gschwista vum söim Gschlecht wean gleich gnennt, d'Gschwista vum ãundan Gschlecht jeweus ãundas) untaschiedn. Des Schema is netta nu vum George Murdock a weng vaändat woan, dea im Lowie sei bifurcate merging-System weida untateud håd. Da Rest vum Lowie seim System wiad heid nu so heagnumma, netta hãm de Nãmen, de eana da Murdock neich gem håd.

Ähnli wia'd Ruth Benedict, a ãndare Anthropologin vum Lowie seina Zeid, håd s'US-Büro fia Kriagsinfoamazion aa im Lowie im Zweitn Wöidkriag in Auftråg gem, dass a a Biachi schreibt üwa an vu de Feinde vum Kriag. D'Benedict håd in iahm Biachi Chrysantheme und Schweat d'japanische Kuitua bschrim, ohne dass's aa netta oa Måi in Japan gwesn wa; da Lowie åwa håd in deitschspråching Raum nu vu seina Zeid in Wean kennt. In seim Biachi The German People („s'deitsche Voik“) woar a desweng aa vaosichtiga wia d'Benedict und håd drauf bestãndn, dass aa ea ned woaß, wås si in seina åidn Hoamad gråd tuad. Wia da Kriag wieda aus woa, is a imma wieda fia a Zeidl zruck kemma in dn deitschspråching Raum.

wichtige Biacha vu eam

• Societies of the Arikara Indians (1914)
• Dances and Societies of the Plains Shoshones (1915)
• Notes on the Social Organization and Customs of the Mandan, Hidatsa and Crow Indians (1917)
• Culture and Ethnology (1917)
• Plains Indian Age Societies (1917)
• Myths and Traditions of the Crow Indians (1918)
• The Matrilineal Complex (1919)
• Primitive Society (1919)
• The Religion of the Crow Indian (1922)
• The Material Culture of the Crow Indians (1922)
• Crow Indian Art (1922)
• Psychology and Anthropology of Races (1923)
• Primitive Religion (1924)
• The Origin of the State (1927)
• Ancient Society (1930)
• History of Ethnological Theory (1937)
• The German People (1945)
• Towards Understanding Germany (1954)

Weblinks

• Literatur vo und iwa Robert Lowie bei DNB und Bibliotheksverbünden: DNB; BVB (nur vo)
• Da Robert Lowie auf mnsu.edu
• Beitråg üwa'n Lowie auf americanethnography.com

D Artike basiat auf ara frein Ibasetzung vom söim Artike in da Wikipedia auf Deitsch in da Version vom 17. Aprüi 2008, dreiviadl Drei Nãumittågs. A Listn mid de Autorn vo drentn konst da do aa oschaugn.