Braundwidastaundsklassn

De Braundwidastaundsklassn oda Feiawidastaundsklassn (dt. Brandwiderstandsklasse bzw. Feuerwiderstandsklasse) san ned wia de Brennboakeitsklassn auf an Baustoff bezogn, sondan auf an Bautäu. Se ge'm au, wia dass se a Bautäu unta da Aunauhm vo da Eiheitstemperatuazeidkurvn bei an Braund vahoit. Aa do hod se de EU eigmischt, owa waun ma's oamoi vastaundn hod, is goa ned so schwaa.

Zruckzogane oide Norm (ÖNORM B 3800-2)[Werkeln | Am Gwëntext werkeln]

De Braundwidastaundsklassn woa nochm fuigandn Schema aufbaut:

F tt

F steht oafoch fia Feia. tt is de Zeid, in dea da Bautäu de Auswirkungan vom Braund aushoidn muass.

F30 ... braundhemmand (Braundwidastaund min. 30 min)
F60 ... hochbraundhemmand (Braundwidastaund min. 60 min)
F90 ... braundbständig (Braundwidastaund min. 90 min)
F180 ... hochbraundbständig (Braundwidastaund min. 180 min)

Güütige eiropäische Norm (ÖNORM EN 13501-2 bis -5)[Werkeln | Am Gwëntext werkeln]

De neiche Klassifiziarung is nochm fuigandn Schema zan aufstöön:

R E I W tt - M C S P G K

R ... steht fia Trogfähigkeit (résistance), de da Bautäu in da augeban Zeid ned valuisn deaf. Kriterien dofia san de Staundsichaheit, Duachbiegung, Dehnung und Stauchung.
E ... steht fia Raumohschluss (etanchéité), des haßt, es deafn koa Flauman oda Rauchgase duachn Bautäu duachdringan, sunstn kennt se da Braund in' Nebmraum ausbroadn.
I ... steht fia Wärmedämmung (isolation). Auf da braundohgwaundtn Seitn deaf de Temperatua ned so hoch wean, dass zua ana Sööbstentzündung im Nebmraum kummt.
- Fia olle Bautäu außa Braundschutztian, -klappn und Ohschlüss' vo Fördaaunlogn:

I ... Mittlwert: < 140 °C, Maximoiwert: < 180 °C.

Fia Braundschutztian, -klappn und Ohschlüss' vo Fördaaunlogn:

I₁ ... Mittlwert: < 140 °C, Maximoiwert: < 180 °C;

I₂ ... Mittlwert: < 140 °C, Maximoiwert: < 180 °C, außa im im Bereich vo da Zargn, duatn < 360 °C.

W ... Begrenzung vo da ohgstoidn Wärme.
tt ... is wieda de Zeid, in dea de aungeban Kriterien zan eafüün san. tt kau sein: 15, 20, 30, 45, 60, 90, 120, 180, 240 und 360 min. In Östareich san weidahin nua 30, 60, 90 und 180 min übli.
M ... Widastaund gegn mechanische Beaunspruchung (Stoßbeaunspruchung).
C ... Sööbstschliaßande Eignschoft vo ana Tia oda Klappn (close).
S ... Rauchdichtheit (smoke):
- S_a ... Rauchdichtheit bei Umgebungstemperatua;
- S_m...Rauchdichtheit bei Umgebungstemperatua und 200 °C.
P ... Erhoitung vo da Energievasuagung bei elektrischn Kobln (power).
G ... Widastaundsfähigkeit gegn Rußbraund.
K ... Braundschutzfunktion vo Waund- oda Decknvakleidungan, dass' de dahintaliagende Konstruktion vua Schädn schützt.

Beispü:

REI90 ... fiara Waund, de 90 min laung de drei Kriterien R, E und I eafüün muass.
R180 ... fiara Stützn, de 180 min laung des Kriterium R erfüin muass, wäu Raumohschluss büdts jo koan.
EI60 ... fiara nedtrogande Innanwaund.
EI₂30-C... fiara sööbstschliaßande Braundschutztia.

Zuasätzli gibt's aa no Indizes, z. B. ob de Kriterien nua vo außn noch innan oda umkeaht eafüüt wean miassn, owa de loss ma guad sei.

Schau aa[Werkeln | Am Gwëntext werkeln]