Der Bulle von Tölz: Abenteuer Mallorca

Aus Wikipedia
Der Artikl is im Dialekt Obaboarisch gschriem worn.
Foig der Serie Der Bulle von Tölz
OriginaltitlAbenteuer Mallorca
ProduktionslandDeitschland
OriginalsprochDeitsch/Boarisch
Läng92 Minutn
OitasfreigobFSK 6
EinordnungStaffel 14, Foig 6
69. Foig insgesamt
Easchdausstrohlung3. Feba 2009 auf ORF 1
Stab
RegieWolfgang F. Henschel
DrahbuachAndreas Föhr, Thomas Letocha
ProduktionErnst von Theumer junior
MusiJo Barnikel, Stephan Wildfeuer
KameraRandolf Scherraus
SchnittMichael Breining
Bsetzung
Episodnlistn

Abenteuer Mallorca is a deitscha Feansehfuim van Wolfgang F. Henschel ausm Joar 2009 noch on Drahbuach van Andreas Föhr und an Thomas Letocha. Es is de 69. und letzte Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 3. Feba 2009 af ORF 1 ausgstroit worn.

Handlung[Werkeln | Am Gwëntext werkeln]

D’Resi Berghammer betreibt af Mallorca am Strond a Imbissbudn. Wias a poar Eikaif Mocha wui, triffts zuafälli de Katja Flemisch, s Gspusi van Däiza Bauuntanehma Anton Rambold, de wo si af da Insl um a Restaurantprojekt kimmad. De zwoa Frauan wean afm Weg zu an Rambold seina Finca afghoidn und in a Vasteck vaschleppt. De Entfiahra valongan van Rambold a Million Euro Lösegejd und woarnan eam davor, doss ea de Polizei eischoit.

Zua gleichn Zeid wead z Däiz da Bundesdogsobgordnete Hans Meidenbauer mid ara Schrotflintn ogschossn. Da Politika vamuat an Umwejtaktivistn Jakob Ernst hinta dem Oschlog, wei ea si z Berlin fian Bau vo ara Autobahn duachn Landkroas eisetzt, oba da Ernst hod a Alibi. Den van Stootsanwoit Dr. Georg Lenz obodnan Peasonanschutz lahnt da Meidenbauer ob. Zu sein Missfoin wead an Polizistn Schmidt gschafft, doss dea an Meidenbauer ned aus de Aung losst. Draus dagem si Hiweis, doss da Kioskbsitza Karl Waldmüller an Meidenbauer beobocht hod. Aft ziagt da Obgordnete sei Ozoag zruck. Da Kommissar Benno Berghammer und da Polizist Schmidt findn außa, doss da Meidenbauer a Gspusi mid da Fischakenigin Emma Waldmüller ghobt hod. Jetzad vasteht da Meidenbauer an Oschlog ois Schuss vorn Bug und wui de Eamittlungan endguitig eigstejd wissn.

An Benno Berghammer sei Kollegin Nadine Richter vabringt grod ian Ualaub af Mallorca und suacht de Entfiahdn. Do learnts an Bootsbsitzer Enrique kenna, dea wo a Autopanne vortaischt, dmid ea on de Kommissarin drokimmt. Se is wegan Taischungsmaneva ned grod begeistat, oba seine Ortskenntnisse losst se si ned entgeh.

A hoaße Spua fiahd zun Bernd Pischner, on ehemolign Gschäftspartna van Rambold, dea wo seit drei Joar af Mallorca lebt und vor on hoim Joar af mysteriöse Weis sei Frau valorn hod. Es bsteht da Vadocht, doss da Pischner si on an Rambold rächa wui, wei dea eam iban Tisch zong hod. D’Nadine Richter mocht dem sei Owesn ausfindi und richt eam schene Griaß van Rambold aus. Wei da Pischner ia de Tia vor da Nosn zuaschlogt, dringts af ondane Weis ins Haus ei, wead oba entdeckt und haut ob. Wia da Pischner midm Auto weggafoart, vafoigts eam, foart oba vor Schreck in an Stroßngrom, wia da Enrique unvamittlt hintn im Wong aftaucht.

De Katja Flemisch und d’Resi Berghammer vasuachn dawei vageblich an Ausbruch aus iam Gfängnis; s Kontaktian vo ara Passantin scheitad emfois. De Berghammerin schreibt on Huiferuaf af a Tiachl und schmeißt’s ausm vagittadn Fensta. Wia raa des koan Eafoig ned bringt, sogts zua Katja Flemisch, se soi iam Bewocha s Stockholm-Syndrom vorgaukln. De spuid iare Roin so guad, doss ea ia de Fessln obnimmt. Se ko eam außa Gfecht setzn und zammad mid da Resi Berghammer flichtn.

D’Nadine Richter findt an Bernd Pischner sei Auto om Gstod valossn vor; laut Handy-Ortung muass da Bsitza oba in da Näh sei. Se findt as Tiachl, des wo d’Resi Berghammer ausm Fensta gschmissn hod, und geht weida zun Strond, wo se an Pischner mid seina quicklebendign Frau otrifft – da Seglunfoi und ia Vaschwindn woarn bloß vortaischt. De zwoa Pischner woin on Deal mid da Stootsanwoitschoft aushondln, oba da Dr. Lenz sogt eana wega da großn Zoi vo Delikt nua zua, doss ea iare Kooperationsbereitschoft meglichaweis bericksichtigen wead. So kriagt de Kommissarin Richter vo da Pischnerin de Auskunft, doss se ebban ruafa ghead hod, Wia se si in da Näh bei on Bootshaus afghoidn hod. Se hod oba aus Angst vor ara Entdeckung ned reagiat.

In da Zwischnzeid hod si da ibarumplte Entfiahra darapplt und mid sein Komplizn de Vafoigung vo de entlaffnan Weiba afgnumma. Grod wias de Berghammerin und de Flemisch eighoit hom, kimmt d’Nadine Richter dazua und ibawejtigt de Entfiahra. Oana vo dene is da Enrique, dea wo si nua um d’Nadine kimmad hod, dmid ea siagt, obs eana af da Spua is; da ondane hoaßt Pablo und is ois Bauorbata bschäftigt.

Da Anton Rambold gfreit si sakrisch: Sei Lemsgfährtin is ohne Lösegejdzohlung wieda frei; ea häd sunst mid großm Valust on Fonds vakaffa miassn.

Da Benno Berghammer hod bis zua Afklearung van Entfiahrungsfoi ban Rambold ibanocht und geht am nächstn Dog wieda in de Pension zruck. Ea staunt ned schlecht, wia ra dort sei Muada otrifft. Se hod gnua vo Mallorca; fia iare Imbissbudn hods on Pächta gfundn.

Hintagrund[Werkeln | Am Gwëntext werkeln]

Gfuimt worn is z Däiz und af Mallorca.[1] De Drahorbatn hom van 21. Juli bis zun 22. August 2008 dauad;[2] ois Schaublotz fia de „Pension Resi“ homs as Hollerhaus Irschnhausn heagnumma.

Im Netz[Werkeln | Am Gwëntext werkeln]

Beleg[Werkeln | Am Gwëntext werkeln]

  1. Abenteuer Mallorca – derbullevontoelz.de (Memento vom 29. Aprü 2016 im Internet Archive)
  2. „Der Bulle von Tölz“ Abenteuer Mallorca (TV Episode 2009) – Filming & Production – IMDb