Der Bulle von Tölz: Der Zauberer im Brunnen
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Der Zauberer im Brunnen |
| Produktionsland | Deitschland |
| Originalsproch | Deitsch/Boarisch |
| Läng | 92 Minutn |
| Oitasfreigob | FSK 12 |
| Einordnung | Staffel 14, Foig 4 67. Foig insgesamt |
| Easchdausstrohlung | 3. Juni 2008 auf ORF 1 |
| Stab | |
| Regie | Wolfgang F. Henschel |
| Drahbuach | Andreas Föhr, Thomas Letocha |
| Produktion | Ernst von Theumer junior |
| Musi | Jo Barnikel, Stephan Wildfeuer |
| Kamera | Thomas Meyer |
| Schnitt | Michael Breining |
| Bsetzung | |
| |
Der Zauberer im Brunnen is a deitscha Feansehfuim van Wolfgang F. Henschel ausm Joar 2008 noch on Drahbuach van Andreas Föhr und an Thomas Letocha. Es is de 67. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 3. Juni 2008 af ORF 1 ausgstroit worn.
Handlung[Werkeln | Am Gwëntext werkeln]
Da Zaubakinstla Hans Kaminsky wead vo seina Lemsgfährtin Martha Beyer tod im ocht Meta tiafn Brunna entdeckt. Laut an Grichtsmedizina Dr. Robert Sprung is da Kaminsky umara oans bei da Nocht midm Kopf voro in an Schocht gstiazt. Wei ned ausgschlossn wean ko, doss ebba nochghoifa hod, fongan da Kommissar Benno Berghammer und sei Kollegin Nadine Richter s Eamittln o, und findn aa glei mehrane Vadächtige. Do is znächst da Wiat Udo Kettner. Dem sei Tochter Viola hod in Kaminsky a Oart Easotzvoda gseng, dea wo ia mehr Freiheitn ois ia Voda eigramd hod. Im Beisei vo seina Tochta hod da Kettner an Zaubakinstla om Voromd zammgschlong und eam droht, doss ea eam umbringt, wonn ea ned seine Finga vo da Viola losst. Aa de Martha Beyer woar ned bsundas davo begeistat, doss ia Lemsgfährte as Madl ständi zu seine Aftritt midgnumma hod.
Da Foi wead no mysteriösa, wia si außastejd, doss de Lemsgfährtin van Zaubara a Gspusi ghobt hod. Se sogt oba, doss’s da Kaminsky sejba is und doss’s a Spui is, doss se si jedn Deansda in on Lenggriasa Hotej treffan.
Vo drei ehemolige Weggfährtn van Hans Kaminsky und an Udo Kettner eafoart d’Nadine Richter, doss de zwoa zstriddn san, seit an Kettner sei Frau bei da Gebuat vo da Viola gstorm is. Da Kettner hod kuaz danoch an Kaminsky umbringa woin, oba s Vafoarn is wega Beweismangl eigstejd worn. Da Stootsanwoit Dr. Georg Lenz is ibazeigt, doss im aktuejn Foi de Beweis glangan, und bsorgt on Hoftbefej gegan Udo Kettner. An Lenz pressiad’s a weng, wei grod a Dokumentation iba Stootsanwäit afm Land drahd wead. Do mechad ea gean aa glei an Täta präsentian.
De Kriminala frong d’Viola Kettner, obs ebbs iban Vableib van Zaubamantl und vo de Goidring woaß, de wo laut da Martha Beyer vaschwundn san. D’Viola moant, doss da Kaminsky de Sochan vielleicht wega seina Schuidn vakaft hod. Aft beobocht da Polizist Schmidt d’Viola Kettner, bis se eam zun Vasteck vo de vaschwundnan Sochan fiahd. Se sogt, doss da Kaminsky ia an Zaubamantl und an Schmuck kuaz vor sein Tod vamocht hod, wia wonn ea gahnd häd, doss eam ebbs zuastoßn wead.
Da Hans Kaminsky hod seit on Joar a Numma im Programm ghobt, wo ea af da Bühne vaschwindt und kuaz draf im Zuaschauaraum wieda aftaucht. Ban Sichtn vo ara Videoafzoachnung van Zaubatrick foid an Benno Berghammer af, doss de Peason, de wo af da Bühne vaschwindt, ondane Ohrn hod ois wia dejenige, de wo im Publikum wieda dascheint. Da Grichtsmedizina Dr. Sprung vagleicht de Buida midm Todn und stejd fest, doss dea identisch mid deara Peason is, de wo vo da Bühne vaschwundn is.
Wia de Kommissar d’Martha Beyer mid da Dopplgänga-Theorie konfrontian, gibts schliaßli zua, doss se a Gspusi mid on gwissn Walter Sailer hod, dea wo iam Lemsgfährtn zun Vawechsln ähnli schaugt. Se und da Hans Kaminsky hom eam z Minga vo da Stroß ghoit und ban Zaubatrick eigsetzt, und irgadwonn hod’s zwischad ia und an Sailer gfunkt. Seit an Kaminsky sein Tod hods mid an Sailer bloß no oamoi Kontakt ghobt, wia ra se in ara SMS drum bedn hod, doss se da Polizei nix sogt.
De Kriminala lossn an Walter Sailer sei Handy ortn und foarn af guad Glick zua Funkzej, wo des Gerät eigloggt is; do huift eana da „Kommissar Zufall“: Se seng d’Viola Kettner, de wo in deara Funkzej af iam Rolla untawegs is, und foign ia in sichara Entfeanung. Se beobochtn, wia de junge Frau voi Freid on Mo ind Oarm schliaßt. D’Nadine Richter wundad si, wos d’Viola Kettler mid an Walter Sailer z doa hod, oba da Berghammer hod de Eaklearung parat: Es is da Hans Kaminsky, dea wo aus Eifasucht sein Dopplgänga umbrocht hod und mid foischa Identität a neis Lem mid da Viola ofonga woit. Da Kaminsky wui si eascht dazua aißan, wonn ea mid sein Anwoit gredt hod. Ea bstätigt oba de Vamuatung vo da Kommissarin Richter, doss da Udo Kettner eam fian Tod vo seina Frau vaontwortli gmocht hod, wei da Zaubakinstla da Voda vo da Viola is.
Da Stootsanwoit Lenz is skeptisch, wia de Kriminala eam an Täta präsentian; seina Moanung noch is da Udo Kettner imma no hechst vadächtig. Da woahre Grund dafia, doss’s an Lenz mid da Afklearung af amoi neamma so pressiad, liegt dro, doss as Motto vo da Dokumentation jetzad „Dunkle Geheimnisse auf dem Land – die ungeklärten Fälle der Staatsanwaltschaft“ hoaßt, wei da Redakteur moant, doss klearte Fäi ned mysteriös gnua san.
Nemhandlung[Werkeln | Am Gwëntext werkeln]
An Benno Berghammer sei oida Spezl, da Bauuntanehma Anton Rambold, mechad an Bundesdogsobgordnetn Hans Meidenbauer dazua bringa, doss dea si dafia eisetzt, doss de Fiama Rambold mid an Neibau van Orbatsamt beaftrogt wead. Ois Gengleistung biat ea an Politika ra Gscheidle-Marke o. Da Meidenbauer, dea wo a leidnschoftlicha Briafmarknsammla is,wui sei Bests gem, wia ra oba des Schatzl seng mechad, sogt da Rambold, doss de Markn no ned gonz in sein Bsitz is.
Da Bauuntanehma gibt on Rocka an Aftrog, ea soi de Gscheidle-Marke aus an Kaminsky sein Haus zruckhoin, de wo da Zaubakinstla eam gstoin hod. Wei da Vasuach fejhschlogt, probiat’s da Rambold sejba – emfois eafoiglos, wei da Berghammer und de Richter eam stearn. Obwoi ea af da Flucht duachs Untahoiz Schramman obkriagt, streit ea vehement ob, doss ea ban Kaminsky eibrocha is. Wei oba da Rocka untan Druck van Berghammer an Eibruch zuagibt, ramt da Rambold schliaßli ei, doss ea an Aftrog dazua gem hod, oba bloß wei ea ebbs zruckhoin woit, wos eh eam gheart. Da Bauuntanehma bettld ban Berghammer, doss ea af rechtliche Schritt vazicht.
Wia da Moard afkleart is, bsuacht da Benno Berghammer an Rambold, im Gepäck de Mappn mid da Gscheidle-Marke. Dafia nimmt ea an Rambold as Vasprechn ob, doss ea de Kantine vo seina Fiama on de Frau Bollog vapacht, de wo – zu sein Leidwesn – vor kuazn ois Haushäitarin in da Pension vo seina Muada ogfonga hod und eventuej ois Pächtarin eisteing wui. Da Rambold sogt widawillig zua, do legt da Berghammer no oans draf: Des Bstechungsschreim on an Meidenbauer wead ea an Rambold eascht donn aushändign, wonn s Orbatsamt featigstejd is – olladings ohne d’Fiama Rambold.
Hintagrund[Werkeln | Am Gwëntext werkeln]
Gfuimt worn is z Däiz[1] und z Feldafing;[2] ois Schaublotz fia de „Pension Resi“ homs as Hollerhaus Irschnhausn heagnumma.
Kritik[Werkeln | Am Gwëntext werkeln]
De Programmzeitschrift TV Spielfilm schreibt: „Trotz ein paar netter Gags macht sich das Fehlen der vorgeblich nach Mallorca verreisten Bullenmama Resi schmerzhaft bemerkbar. – Darstellerin Ruth Drexel war schwer krank.“ Fazit: „Benno fehlt die Mama und dem Krimi Tempo.“[3]
Im Netz[Werkeln | Am Gwëntext werkeln]
- Der Zauberer im Brunnen in der Internet Movie Database (englisch)
- Der Zauberer im Brunnen bei Fernsehserien.de
Beleg[Werkeln | Am Gwëntext werkeln]
- ↑ Der Zauberer im Brunnen – derbullevontoelz.de (Memento vom 29. Aprü 2016 im Internet Archive)
- ↑ „Der Bulle von Tölz“ Der Zauberer im Brunnen (TV Episode 2008) – Filming & Production – IMDb
- ↑ Der Bulle von Tölz: Der Zauberer im Brunnen – Filmkritik bei TV Spielfilm
| Vorherige Foig 27. Mai 2008: Die Leonhardifahrer |
Episodnlistn | Nächste Foig 1. Juli 2008: Der Kartoffelkönig |