Der Bulle von Tölz: Ein erstklassiges Begräbnis

Aus Wikipedia
Der Artikl is im Dialekt Obaboarisch gschriem worn.
Foig der Serie Der Bulle von Tölz
OriginaltitlEin erstklassiges Begräbnis
ProduktionslandDeitschland
OriginalsprochDeitsch/Boarisch
Läng90 Minutn
OitasfreigobFSK 12
EinordnungStaffel 12, Foig 3
55. Foig insgesamt
Easchdausstrohlung16. Novemba 2005 auf Sat.1
Stab
RegieWolfgang F. Henschel
DrahbuachPetra Lüschow, Carolin Otto
ProduktionErnst von Theumer junior
MusiUli Kümpfel
KameraThomas Meyer
SchnittMichael Breining
Bsetzung
Episodnlistn

Ein erstklassiges Begräbnis is a deitscha Feansehfuim van Wolfgang F. Henschel ausm Joar 2005 noch on Drahbuach vo da Petra Lüschow und da Carolin Otto. Es is de 55. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 16. Novemba 2005 af Sat.1 ausgstroit worn.

Handlung[Werkeln | Am Gwëntext werkeln]

Ban Woichnsää-Kraftwerk wead de Leich van Bestottungsuntanehma Martin Bichler gfundn. De Obduktion duach an Dr. Sprung eagibt, doss da Bichler zeascht bewusstlos gschlong, donn dastickt und schliaßli ins Wossa gschmissn worn is. De Kriminala Benno Berghammer und Sabrina Lorenz treffn ban Kraftwerk an Ogstejtn Anderl Federer, dea wo amoi midm Berghammer in d’Schui gonga is. Ea eakleart eana, wia ra Wossakraftwerk funktioniat, aa doss as Schaufelrad vo da Turbine de Leich gschreddad häd, wonn se ned irgadwo hänga bliem warad.

De Kommissar eamittln im Umfejd van Bestottungsinstitut „Heimkehr“, wo da Martin Bichler mid sein Cousin Christian Pohl und an Ogstejtn Gustav Unertl zammgorbat hod.

D’Resi Berghammer, de wo si am Todesdog vo iara Muada wieda amoi da oagnan Endlichkeit bewusst wead, losst si van Gustav Unertl as volle Programm fia a Begrebnis zammstejn. Wias dro denkt, doss iare Muada in ian jetzign Oida gstorm is, kriagts Todesangst und losst si vo ian Hausoarzt untasuacha; dea gibt oba Entwarnung.

Boid findn de Kommissar außa, doss da Martin Bichler si a Menge Feind gmocht hod: Ea hod oiwei s Peasonal dratzt; außadem hoda bei de Obrechnungan bschissn und weatvoje Grobbeigobn gstoin, so beispuisweis ban Begrebnis van René Hofer seina Muada. Da Hofer is a Orbatskolleg van Anderl Federer ban Kraftwerk und woaß oiso, wonn a ginstiga Zeitpunkt is, wonn ma ra Leich vaschwindn lossn wui. Da Hofer hod oba ra Alibi.

Da Martin Bichler woar olladings ned bloß in gschäftlicha Hisicht unbeliabt, aa sei Famij hod unta eam gliddn. Duach sein Tod profitian sei Frau Marianne, de hoamli nemnaus geht und sein Otei on da Fiama eabt, und sei Cousin Christian Pohl, dea wo kinfti alloa Entscheidungan treffa ko. Aa da Stoametz Stefan Meiser mocht si vadächtig, wei ea de Flucht dagreift, wia da Polizist Anton Pfeiffer sein Liefawong ibapriafn wui. Laut ara Zeignaussog hod zun froglichn Zeitpunkt so a Foarzeig an Fundort vo da Leich pressant valossn. Olladings kemman olle Mitorbata van Bestottungsinstitut on an Liefawongschlissl dro.

Van René Hofer eafoart de Kommissarin Lorenz, doss da Gustav Unertl fian Christian Pohl on greßan Betrog in a Krematorium investian wui. As Gejd wui da Unertl im Lotto gwunna hom. Bei eam dahoam finden de Lorenz und da Berghammer a Tut-Ench-Amun-Statue, de wo ois Tatwoffn in Frog kimmt.

Da Unertl wead jetzad imma mehra vo Gwissnsbiss plogt. Ea schickt on Briaf midm Gständnis an Stootsanwoit Lenz, doss ea an Bichler daschlong hod. Da Lenz schafft an Berghammer, ea soi an Unertl festnehma, an Briaf vaschweigt ea. Aa d’Resi Berghammer kriagt van Unertl on Umschlog ausghändigt, mid da Bitt, doss se eam eascht am nächstn Dog afmocht.

Da Kommissar Berghammer vaweigat de Festnahme van Gustav Unertl, weis koane Beweis ned gibt, doss ea de Tatwoffn – de Tut-Ench-Amun-Statue – eigsetzt hod.

Schliaßli entlarvt si da Christian Pohl sejba ois Täta, wia ra vorgibt, doss ea nua an Unertl ban Loswean vo da Leich hejfa woit. Ea hod si sejba davo ibazeigt, doss da Bichler tod is, donn hoda eam afn Liefawong glodn und zun Stausee brocht, wo ra eam ins Wossa gschmissn hod. De Kommissarin Lorenz hoid dageng, doss af da Lodefläch van Liefawong frische Fingaobdrick van Martin Bichler gfundn worn san, wos beweist, doss ea ban Transport no glebt hod.

Dawei kriagt d’Resi Berghammer a unguats Gfui wegan Umschlog van Unertl und ruaft ian Sohn o. Ea sogt, se soi an Briaf sofort afmocha und vorlesn. Ausm Inhoit schliaßt da Kommissar, doss da Unertl si as Lem nehma wui, und zwoar dort, wo da Bichler ins Wossa gschmissn worn is. De Kriminala kemman grod no rechtzeidi zun Kraftwerk und kinnan an Unertl davo ibazeing, doss ned ea da Mearda is, sondan da Christian Pohl, dea wo eam de Tat in d’Schuach schiam woit.

Im Bestottungsinstitut „Heimkehr“ woart no an Afgob fian Benno Berghammer: Sei gstorbne Grundschuilehrarin Fräulein Birkel hod si a Seebestottung gwinscht, oba ia Nochloss glangt ned fia ra professioneje Duachfiahrung. So improvisiat ea zammad midm Anderl Federer und foart mid on Ruadaboot afn See naus. Da Anderl steht ehrfuachtsvoi af, dawei da Benno aus Sichaheitsgrind im Sitzn de Religionsnotn vorliast. As Boot grodt trotzdem in a Schiaflog und de Urne kippt iba Bord.

Hintagrund[Werkeln | Am Gwëntext werkeln]

Gfuimt worn is z Däiz, z Koche am Sää (Woichnsää-Kraftwerk) und z Lenggrias;[1] ois Schaublotz fia de „Pension Resi“ homs as Hollerhaus Irschnhausn heagnumma.

Kritik[Werkeln | Am Gwëntext werkeln]

De Programmzeitschrift TV Spielfilm schreibt: „Immerhin: Benno bringt ein paar kecke Sprüche.“ Fazit: „Falscher Titel: Das hier ist eher zweitklassig.“[2]

Im Netz[Werkeln | Am Gwëntext werkeln]

Beleg[Werkeln | Am Gwëntext werkeln]

  1. Ein erstklassiges Begräbnis – derbullevontoelz.de (Memento vom 29. Aprü 2016 im Internet Archive)
  2. Der Bulle von Tölz: Ein erstklassiges Begräbnis – Filmkritik bei TV Spielfilm