Der Bulle von Tölz: Liebesleid
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Liebesleid |
| Produktionsland | Deitschland |
| Originalsproch | Deitsch/Boarisch |
| Läng | 90 Minutn |
| Oitasfreigob | FSK 12 |
| Einordnung | Staffel 12, Foig 2 54. Foig insgesamt |
| Easchdausstrohlung | 5. Oktoba 2005 auf Sat.1 |
| Stab | |
| Regie | Udo Witte |
| Drahbuach | Andreas Föhr, Thomas Letocha |
| Produktion | Ernst von Theumer junior |
| Musi | Jo Barnikel, Stephan Wildfeuer |
| Kamera | Jochen Radermacher |
| Schnitt | Michael Breining |
| Bsetzung | |
| |
Liebesleid is a deitscha Feansehfuim van Udo Witte ausm Joar 2005 noch on Drahbuach van Andreas Föhr und an Thomas Letocha. Es is de 54. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 5. Oktoba 2005 af Sat.1 ausgstroit worn.
Handlung
[Werkeln | Am Gwëntext werkeln]An Däiza Bauuntanehma Lothar Zechl sei Sekretärin Britta Aumüller wui im Kommissariat on Diabstoi ozoang. Da Polizist Anton Pfeiffer suacht in on ondan Raum as nedige Formular; wia ra zruckkimmt, liegts am Bodn und kriagt koa Luft ned; kuaz draf iss tod. Da Grichtsmedizina Dr. Robert Sprung stejd fest, doss as Opfa on on exotischn Gift gstorm is.
De Eamittlungan fiahn de Kriminala Benno Berghammer und Sabrina Lorenz zu ara Sex-Kommune, wo de Britta Aumüller zammad midm Loata Klaus Engelmann, da Jane Kunze und da Uschi Malkowitz gwohnt hod. Vo dene wui koana wissen, ob de Aumüllerin Feind ghobt hod oda wos fia ran Diabstoi se mejdn woit. Olladings mocht de Malkowitz koa Ghoamnis draus, doss de Aumüllerin ia a Dorn im Aug woar, weis seit iam Eizug vor fimf Joar de Numma oans wean woit. Da Engelmann hod live im Radio gsogt, doss ea 100.000 Euro geabt hod und as Gejd on Bediaftige vaschenkt, oba wo’s heakimmt, wui ea ned song.
Wia da Benno Berghammer an Bauuntanehma Lothar Zechl de Todesnochricht ibabringt, kimmt dem sei Konkurrent Anton Rambold einagstiamt, im Schlepptau sein Beroda Martin Engelmann, da Sohn van Klaus Engelmann. Da Rambold, dem wo a Großaftrog zugunstn van Zechl duach d’Loppn gonga is, is sicha, doss da Stodrod gschmiad worn is, oba ea ko’s ned beweisn.
Da Kommissar Berghammer eafoart van Schauspuia Wilfried Jonsen, doss ea a Gspusi mid da Britta Aumüller ghobt hod und da Klaus Engelmann impotent is. Da Engelmann hoid de Liabschoft fia obsurd; ea häd oba koa Problem ned, wonn’s so warad, weis a Toal vo eanan alternativn Lemsstij is.
Da Martin Engelmann sogt iba sein Voda, doss ea da greßte Egomane is, dea wo eam ois Sohn nia woahrgnumma hod und ned amoi fia eam do woar, wo sei Muada gstorm is. Ea hofft vo gonzn Heazn, doss sei Voda de Frau umbrocht hod und im Gfängnis vareckt.
S Rätsl um an Diabstoi lest si, wia da stodbekonnte Hehla Udo Luckner im Kommissariat aftaucht und sogt, doss de Uschi Malkowitz eam an Schmuck vo da Britta Aumüller gem hod. In Woahrheit hod de Sabrina Lorenz gseng, doss de Jane Kunze dejenige woar, de Gejd fia teire Schminksocha braucht. Vo da Kunze eafoarn de Kommissar aa no, doss de Britta Aumüller de 100.000 Euro irgadwo bschofft hod; da Klaus Engelmann wui oba ned, doss driba gredt wead.
Es stejd si außa, doss da Schauspuia Jonsen ned da Liabhoba vo da Britta Aumüller woar, sondan ia bloß sei Haus zun Schnaxln midm Martin Engelmann zua Vafiagung gstejd hod. Da Anton Rambold foid aus olle Woikn, wia ra eafoarn muass, doss sei Assistent a Vahäitnis mid da Sekretärin vo sein schearfsten Konkurrentn ghobt hod. Ea hod jetzad koane Zweifl neamma, doss da Martin Engelmann de Ogebotssumme on an Zechl varodn hod.
Duach on Zuafoi entdeckt d’Resi Berghammer in da Kuche van Klaus Engelmann a Antipotenzmiddl. De Uschi Malkowitz hod’s eam joarlong in sein Kaffee gmischt, dmid ea raa mid da Britta Aumüller koan Sex neamma hom ko. Se sogt, doss af eam gwoart und ghofft hod, doss ea irgadwonn gonz alloa ia ghearn wead.
De Kriminala frong an Klaus Engelmann, ob ea van Vahäitnis zwischad da Britta Aumüller und sein Sohn gwisst hod. Draf reagiat ea unglaibi. Zua Heakunft van Gejd sogt ea, doss de Britta eam vazejhd hod, wias on Bstechungsvasuach bei da Vagob vo on Bauaftrog af d’Schlich kemma is. As Gejd soid a Oart moralische Wiedaguadmochung sei. Naman ko ea koane nenna, wei ea’s ned so genau wissen woit.
Da Lothar Zechl trifft si midm Martin Engelmann und hoid eam vor, doss ea de Britta umbrocht und glei mehrane Grind dafia ghobt hod. Und doss se zruck zu ian Voda geh woit, hod s Fassl zun Ibalaffa brocht. Wia da Engelmann si zu on Gständnis hireißn losst, wui ea an Mitwissa loswean. Mid ara Woffn in da Hond fordad ea van Zechl, doss ea si ausm Fensta stiazt. Do kemman de Kriminala dazua und kinnan an Martin Engelmann zun Afgem bringa.
Hintagrund
[Werkeln | Am Gwëntext werkeln]Gfuimt worn is z Däiz und z Lenggrias;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik
[Werkeln | Am Gwëntext werkeln]De Programmzeitschrift TV Spielfilm schreibt: „Amüsant: Carrière parodiert offenbar APO-Veteran Rainer Langhans.“ Fazit: „Bulle unter Hippies: einer der besseren Fälle.“[2]
Im Netz
[Werkeln | Am Gwëntext werkeln]- Liebesleid in der Internet Movie Database (englisch)
- Liebesleid bei Fernsehserien.de
Beleg
[Werkeln | Am Gwëntext werkeln]- ↑ Liebesleid – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Liebesleid – Filmkritik bei TV Spielfilm
| Vorherige Foig 20. Aprui 2005: Der Zuchtbulle |
Episodnlistn | Nächste Foig 16. Novemba 2005: Ein erstklassiges Begräbnis |