Der Bulle von Tölz: Treibjagd

Aus Wikipedia
Der Artikl is im Dialekt Obaboarisch gschriem worn.
Foig der Serie Der Bulle von Tölz
OriginaltitlTreibjagd
ProduktionslandDeitschland
OriginalsprochDeitsch/Boarisch
Läng89 Minutn
OitasfreigobFSK 12
EinordnungStaffel 4, Foig 4
24. Foig insgesamt
Easchdausstrohlung3. Mai 2000 auf Sat.1
Stab
RegieWalter Bannert
DrahbuachMichael Lerchenberg
ProduktionErnst von Theumer junior
MusiKristian Schultze
KameraHanuš Polak
SchnittIngrid Träutlein-Peer
Bsetzung
Episodnlistn

Treibjagd is a deitscha Feansehfuim van Walter Bannert ausm Joar 2000 noch on Drahbuach van Michael Lerchenberg. Es is de 24. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 3. Mai 2000 af Sat.1 ausgstroit worn.

Handlung[Werkeln | Am Gwëntext werkeln]

In da Jachenau findn zwoa Woidorbata an todn Sepp Mössmer und bringan eam mid eanan Traktor hoam. Seine Händ weisn Fesslspuan af und ea is on sein gspiemnan Monginhoid dastickt, wei ea kneblt worn is. Da Grichtsmedizina Dr. Robert Sprung findt am gonzen Kearpa haffaweis Omoasn vo oana aißast sejtenan Oart, de wo eascht ob ara Heh vo 1500 Meta vorkimmt. Am Fundort vo da Leich gibt’s weid und broad koane Omoasnhaffa, oisoo hod ma de Leich van Tatort wegbrocht.

Wia da Kommissar Benno Berghammer bei de frisch gsammltn Schwammal vo seina Muada de gleichn Omoasn siagt, wead aah da Tatort schnej gfundn: a Strick zwischn zwoa Baama und a Omoasnhaffa drunta.

Da Berghammer und sei Kollegin Sabrina Lorenz findn außa, doss da Bauuntanehma Anton Ramboldt in da Jachenau a exklusivs Jogdeaholungszentrum eirichtn wui. Wei ban Vakauf vo de Grundstick de moastn Bewohna vo da Jachenau großn Widastond leistn, hod da Rambold si mid Schmiagejdzohlungan de zuastimmung vo mehrane Bauan und van Buagamoasta gsichat. In dem Zammahang gibt’s no mehra Vorfäi: Ban Rambold und oan Vakaufswillign wead a tots Viech mid on Drohbriaf im Mai ond Haustia ghängt; an Rambold sei Reviafearsta wead vo zwoa vamummte Gstoitn da sejbn Omoasnfoita untazong, wias an Todn widafoarn is; und da Kommissar Berghammer kriagt emfois on Drohbriaf.

Da Buagamoasta Johann Mayr is wega seina Bstechlichkeit in on Dilemma: oanaseits van Ramboldt obhängig, ondraseits seina Hoamat vapflicht. Dmid ea do wieda außakimmt, vaonstoitet ea bei da Projektpräsentation af an Rambold seina Hittn a Howafejdtreim – mid fatale Foign: Sei Sohn Blasius wead mid ara Schrotflintn ogschossn und schwar valetzt. Ea bringt an Blasius af sei Oimhittn und wui eam on Dokta hoin, oba da Bua fiacht si vor de Konsequenzn und wui liaba, doss a Pfoarra eam de Beicht obnimmt, wei ea glabt, doss ea eh steam muass. Da Johann Mayr beicht seinaseits ban Dorfpfoarra und bitt eam, doss ea sein Sohn de Kranknsoibung gibt, oba dea valongt, doss da Buagamoasta vorhea ois da Polizei vazejhd; aft valosst da Mayr granti de Kiach.

Dawei hom Beagwandara an schwar valetztn Blasius Mayr gfundn und an Notruaf gwejhd. Da Kommissar Berghammer gibt an Dorfpolizistn Korbinian Pföderl an Aftrog, doss ea de Jachenaua Jogdgnossnschoft innahoib vo oana Stund zu ara Vasommlung zammtrommlt. Midm Buagamoasta im Schlepptau treffn de Kriminala bei da Vasommlung ei. Da Berghammer liast de Nama vo olle vor, de wo an Rambold a Grundstick vakafft hom – zletzt an Johann Mayr. Da Buagamoasta wead niedagschlong, oba im Duachanonda glingt eam d’Flucht und de Gnossnschoftla vafoign eam. Zruck bleibt da Nikolaus Riesch, dea wo zuagibt, doss ea an Sepp Mössmer mid de Omoasn gfoitad hod. De Kommissar kinnan grod aso vahindan, doss da Buagamoasta glyncht wead. Wia da Berghammer und de Lorenz eam findn, steht ea on an Obgrund und droht, doss ea springt, wonn ebba in d’Näh kimmt. Da Johann Mayr gibt an Korruptionssumpf zua und doss ea an Nikolaus Riesch zammad mid sein Sohn Blasius dazua ogstift hod, doss an Sepp Mössmer as Fiachtn beibringan; an Sepp sei Tod duad eam load. Wia da Berghammer eam sogt, dos as Kranknhaus sein Buam guade Ibalemschancen gibt, moant da Buagamoasta, doss da Blasius am bessan gstorm warad; donn dadad ea neamma eafoarn, doss sei oagna Voda eam bschissn hod. Aft losst ea si iban Fejsn obefoin und darennt si.

Hintagrund[Werkeln | Am Gwëntext werkeln]

Gfuimt worn is z Däiz und z Gaißach;[1] ois Schaublotz fia de „Pension Resi“ homs as Hollerhaus Irschnhausn heagnumma.

Im Netz[Werkeln | Am Gwëntext werkeln]

Beleg[Werkeln | Am Gwëntext werkeln]

  1. Treibjagd – derbullevontoelz.de (Memento vom 29. Aprü 2016 im Internet Archive)