Der Bulle von Tölz: Tod eines Priesters
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Tod eines Priesters |
| Produktionsland | Deitschland |
| Originalsproch | Deitsch/Boarisch |
| Läng | 89 Minutn |
| Oitasfreigob | FSK 6 |
| Einordnung | Staffel 4, Foig 3 23. Foig insgesamt |
| Easchdausstrohlung | 20. Oktoba 1999 auf Sat.1 |
| Stab | |
| Regie | Walter Bannert |
| Drahbuach | Walter Bannert, Regina Gmeiner |
| Produktion | Ernst von Theumer junior |
| Musi | Kristian Schultze |
| Kamera | Hanuš Polak |
| Schnitt | Ingrid Träutlein-Peer |
| Bsetzung | |
| |
Tod eines Priesters is a deitscha Feansehfuim van Walter Bannert ausm Joar 1999 noch on Drahbuach, wo ea zammad mid da Regina Gmeiner gschriem hod. Es is de 23. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 20. Oktoba 1999 af Sat.1 ausgstroit worn.
Handlung[Werkeln | Am Gwëntext werkeln]
De kurdische Asylbeweaba-Famij Gürkan hod in da Kiach van Pater Arnold Untaschlupf gfundn und a Gruppn vo Priastaseminaristn bringt jedn Dog Essn, oba jetzad sois in d’Tiakei obgschom wean. Da Pater Arnold wui si neamma länga mid an Bischof oleng; aft kimmt's zun Streit mid an Novizn Johannes. Middn in da Nocht bringan da Johannes und seine Kollegn de Famij Gürkan hoamli on an ondanen Ort.
Am nächstn Morgn findt de Haushäitarin Maria Burgicz in da Kiach an todn Pater Arnold, dea wo vo da Empore gstiazt sei muass. Wia da Kommissar Benno Berghammer zun Tatort kimmt, steht vor da Kiach a Obschiabkommando unta da Loatung vo da Stootsanwäitin Dr. Zirner und valongt Eiloss. De Maria Burgicz mocht oba eascht af, wia da Berghammer oklopft.
Bei da Besichtigung vo da Empore foid an Kommissar a stoarka Knofe-Gruch af, oba wos des bedeit, is eam no ned kloar. Fia de Stootsanwäitin Zirner steht glei fest, doss de Tiakn an Pfoarrer umbrocht hom.
De Eamittlungan fiahn an Benno Berghammer und sei Kollegin Sabrina Lorenz schnej zun Priastaseminar, oba de vier Buam varodn ned, wo de Famij Gürkan is. De Stootsanwäitin schafft drum an Polizistn Pfeiffer, ea soi de Seminaristen beobochtn. Bei da Obseaviarung siagt da Pfeifer, wia d’Resi Berghammer zun Novizen Lukas in Pick-up van Klosta steigt und mid eam wegfoart. Afm Weg zun neien Zuafluchtsort – a Frauanklosta – steigt aa no de ehemolige Frauanearztin vo da Berghammerin ei, de wo si um de hochschwongare Frau Gürkan kimman soi. Wia da Pfeiffer de Flichtling außahoin wui, beißt ea af Granit und vaständigt de Stootsanwäitin. Wia de si oba im Klosta umschaugt, is de Famij Gürkan spualos vaschwundn.
Im Beisei vo de Kommissar redn da Bischof und da Prälat Hinter an Novizen Johannes ins Gwissen und setzn eam unta Druck, wei da Bischof si z Rom dafia eigsetzt hod, doss da Johannes on Studienblotz on ara Päpstlichn Universität kriagt, oba da Johannes wui as Vasteck vo de Flichtling imma no ned varodn.
Wia da Benno Berghammer eafoart, doss sei Muada de kurdische Famij in iara Pension vasteckt, is ea zeascht granti; ondraseits bringt dea Umstond de Eamittlungan endli weida. D’Sabrina Lorenz, de wo vo on friaran Gspusi Tiakisch gleant hod, eafoart vo da Frau Gürkan, doss aa d’Maria Burgicz schwonga is; wea da Voda is, woaß se oba ned.
De Laboreagebnisse vo da Spuansicharung lossn fian Kommissar Berghammer an Schluss zua, doss d’Maria Burgicz van Johannes schwonga is, und wei a Priasta mid Kind on ara Päpstlichn Universität undenkboar is, häd des as Aus fia as Studium im Vatikan bedeit. Da Berghammer glabt, doss da Pater Arnold vo dera Schwongaschoft eafoarn und an Johannes gsogt hod, ea soi an Priastaberuf afgem und d’Maria Burgicz heiradn. Da Johannes streit ois ob, bloß de Vodaschoft gibt ea zua, wia da Kommissar d’Frau Burgicz einahoit; olladings ko ma nix mehra nochweisn, wei de Haushäitarin am Vordog obtreim hod lossn, weis an Johannes seina Karriere ned im Weg steh woit. Wia da Berghammer eam oba mid de Fasern vo seina Hosn und de gstingadn, vo ara Knofesuppn obatzdn Schuach Greß 45 konfrontiat, sogt ea aus, doss da Pfoarrer eam droht hod, doss ea am Bischof ois vazejhn wead, wonn ea de Vaontwortung ned ibanehma wui. Da Pater Arnold hod eam am Pullova pockt und ferti gmocht; do hod da Johannes eam weggstoßn. Aft hod da Pater as Gleichgwicht valorn und is ibad Bristung gstiazt. – Da Prälat Hinter is entsetzt und ogfressn z’gleich und gibt eam a Watschn.
In da Zwischnzeit hom d’Resi Berghammer und d’Sabrina Lorenz Hebamm gspuit und gfrein si mid da Famij Gürkan iba gsunde Zwinling.
Hintagrund[Werkeln | Am Gwëntext werkeln]
Gfuimt worn is z Däiz, z Sonntagberg (Basilika Sonntagberg) und z Seitenstetten (Stift Seitenstetten);[1] ois Schaublotz fia de „Pension Resi“ homs as Hollerhaus Irschnhausn heagnumma.
Im Netz[Werkeln | Am Gwëntext werkeln]
- Tod eines Priesters in der Internet Movie Database (englisch)
- Tod eines Priesters bei Fernsehserien.de
Beleg[Werkeln | Am Gwëntext werkeln]
- ↑ Tod eines Priesters – derbullevontoelz.de (Memento vom 29. Aprü 2016 im Internet Archive)
| Vorherige Foig 13. Oktoba 1999: Tod am Hahnenkamm |
Episodnlistn | Nächste Foig 3. Mai 2000: Treibjagd |