Signabøur

S Duaf Signabour auf d Nocht.

Á Fløtum.

Signabøur mid Oyrareingir, Á Heyggi und Langasandur (z Kollafjørður).

Signabøur (dänisch: Signebø) is a Uatschoft af d Färöer om Ostgstod fo da Haptinsl Streymoy. Am 1. Jenna 2020 hods bei ana Flech fo 5,68 km² 145 Eiwohna ghob (Dichtn: 25,53 EW/km²). D Postleitzoi is FO-416. Es ghead zua Tórshavna Kommune.

S Wuat Signabøur sted im Nominativ, im Akkusativ sogg ma (á/av) Signabø im Dativ sogg ma (í/úr) Signabø(i) und im Genitiv sogg ma (til) Signabøar. Oan, wos z Signabøur wohnd, nennd ma Signabingur ( Mz.: Signabingar).

Eadkund

Signabour ligg om Sidgstod fom Fjord Kollafjørður, gengiwa fom Duaf Kollafjørður. Im Westn grenzt Oyrareingir o, im Sidn Kaldbaksbotnur und im Ostn Kaldbak. Es hod drei Uatsteile: Da uaspringliche Uatskean Byrgi (Eizoanung), da iazige Uatskean Signabøur und da Osttei fo da neichn Sidlung Á Fløtum (auf da Wisn).

Ma kimb fo Kollafjørður oda Leynar iwa Oyrareingir iwa d Stroß 52 (Á Signabø) ins Duaf, de wos noch Byrgi a Sockgossn is. Fom Sidn nimb ma entweda d Stroß 10 fo Kaldbaksbotnur duachn Berg (Kollfjarðartunnilin) oda fo Tórshavn d Stroß 50 iwan Beag (Oyggjarvegur). Es gib an Fuasweg auf Kaldbak, dea wos iwan Beag fiad.

Gwassa

Da Grenzboch z Oyrareingir is da mittlane Boch fo d Triggjaráir (d drei Bach). Es foing fo West noch Ost: da Grønagil (Greana Grom), d Høvdá (Kopfboch), d Mylláin (Mijboch), da Mjáagil (Schmoia Grom), d Nesá (Londspizboch), d Kalváir (Heilbuttboch), d Garðá (Mauaboch), da Sniðgil (Schräga Grom) und da Boch duach d Jøkilsgjógv (Jøkil sei Schlucht), da Grenzboch z Kaldbak.

Zwoa Seen gibs z Signabøur: in Tjørnin á Kambi (Weiha om Komm) owam Hálsur, in Sodl auf Kaldbaksbotnur, und in Tjørnin á Breiðanesi (Weiha on da broadn Londzung), nem da Garða.

Beag

Da hejchste Punkt is 587 Meta iwam Meea, untahoib fom Ostgipfi fom Kaldbakskambur (Kaldbaka Komm). Da hejchste Gipfi am Uatsgebiet is da Mittlgipfe mid 584 Meta, gfoigd vom Westgipfe (576 m) und in Rustin (Kielfeamiga Fuasprung, 562 m). Da Sodl zwischn Rustin und Mittlgipfe hoassd Kambsskarð (Kommschoatn, 556 m), do fiad a da Fuasweg auf Kaldbak iwi.

Gschicht

S eascht moi gnennd woan is Signabøur im Joa 1584, und zwoa im Jarðarbókin ois Signneboe. Es woa owa scho im Joa 1400 bwohnd.

Im Joa 1903 hod da Hans Albert Grøn d Woifongsstation Verdande z Signabøur baud. Verdande is eingli a oide Firma gweng, wos in da Finnmark z Norweng woigfong hod. Da Grøn woitt eingli d Station af d Shetland-Insln aufbau, owa aus faschidane Grind iss deachd z Signabøur baud wuan. Fian Woifong hod Verdande zwoa Boote, Nordkap and Nordkyn fom Grøn seina oidn Firma in da Finnmark iwanumma, und in Dimon and Kolter umdaffd woan, noch d färöischn Insln Stóra Dímun und Koltur. D Boote Dimon (1903-1912), Kolter (1903-1912), Hvalen (1908-1911) und Skjold (1909) hand oiso zua Station kemma. Oas dafo is im Joa 1907 fo an fawundetn Woi so stoak ogremped wuan, dass schiaga gsunchn wa. Owa ma hods gschoffd, das mas nu zruck auf Signabøur bring und repariad.

D Station hod scho im Joa 1912 wida zuagspachd. Verdande is 1920 fakaffd wuan, s Matrial is zum Tei fia neiche Heisa heagnumma wuan.

Tourismus

Aufm Hof Signabøgarður ko ma mid d Bauasleit a Runde spozian geh, d Gschicht fo Signabøur hean, Ressa und Schof seng und a traditionejs Essn kriang.

Im Netz

• faroeislands.dk: Signabøur Buidln und Beschreibung.
• visittorshavn.fo: Signabøur@1@2Vorlage:Toter Link/visittorshavn.fo (Seite nicht mehr abrufbar; Suche in Webarchiven) Tourismusongebot fo Signabøur.