Lola Montez

Der Artikl is im Dialekt Obaboarisch gschrim worn.

Lola Montez, Portrait vo Joseph Karl Stieler

Da Stuaz vo an Engl

Lola Montez, eigentli Elizabeth Rosanna Gilbert (* 1821 in Grange, Irland und † 1861 in New York) woa a Schauspuilarin, Tänzerin und Hochstaplerin. Bekannt is sie ois Mätress vum Kini Ludwig I. von Bayern worn. 1847 hod er sie zua Gräfin Marie von Landsfeld gmocht. 1848 hod er wegn ihr abdanka miassn.

De Lola woa oane vo de außagwehnlichstn Fraun vo ihra Zeit: Unobhängig, exzentrisch - a Oart Pop-Madonna. Wegn Tretn und Schlogn is si meahmois vahoftet worn. Vo mehrere Lända is si aussigschmissn woan. Sie woa dreimoi vaheiratet, davo zwoamoi in Bigamie. Nebn an Ludwig I. woan a no Franz Liszt und Alexander Dumas da Jingare und da Äitare ihre Liabhoba.

De Affär vo Minga (München)

Noch zwoa Joah in da Pariser Hoibwäid is de Montez am 5. Oktoba 1846 noch Minga kemma. Sie hod si im „Goldenen Hirschen“ in da Theatinerstroßn einquartiat und si um a Engagement ois Tänzerin bewoam. Wei si vo da Hofbühne vo Minga ned gnumma woan is, hod sie am 7. Oktoba 1846 den boarischn Kini Ludwig I. afgsuacht und de Affär vo Minga hod iahn Laaf gnumma. Scho am 10. Oktoba hod sie am Hof- und Nationaltheater vo Minga a Gostspui gem deafn. Sie hod dann no am 14. Oktoba an weitern Aftritt ghobt, is owa bei dena Leit ned onkumma.

De Montez is in Minga bliem und hod in ihra Miatwohnung ois Prostuiate gorwat. Mid ihre 28 Joah is sie dann boid zua Mätressn vum 60-jährign Kini woan. Scho oan Monat und zehn Tog noch iahm erstn Aftritt hod da Ludwig I. sein Testament ändan lossn. 100.000 Gulden soit sie bei seim Oblebn kriagn, dazu 2.400 Gulden pro Joah. A Wochn späda hod ihr da Kini a Palais in Minga gschenkt, wo ea jedn Tog zu iah kemma is, sie hod owa aa no andana Herrn gegn Entgäid empfanga.

Im Voik wor de Lola sehr unbeliabt. Alloan dass sie imma wieda in Hosn und mit ana Zigarrn im Mund duach Minga zogn is, hod de Leit scho afgregt. Sie hod oan handfestn Skandal noch'n andan gliafat.

Am 11. Februar 1848 is de Montez voa da afbrochtn Beväikarung in ana Kutschn in de Schweiz gflichtet.

Schau aa andane boarische Voikshäidn

• Agnes Bernauer, de boarische Antigone aus Augschburg
• Matthias Klostermayr, da boarische Hiasl
• Mathias Kneißl, da legendäre Raiba

Film

• Lola Montez, 1918, Regie Robert Heymann, mit Leopoldine Konstantin als Lola
• Lola Montez, die Tänzerin des Königs, 1922, mit Ellen Richter in da Titlrooin
• Lola Montez, 1955, deutsch/französischer Film, Regie Max Ophüls, mit Martine Carol, Peter Ustinov und Adolf Wohlbrück

Musi

• Operette Zauberin Lola, UA 1937 Dortmund. Musik: Eduard Künneke; Text: Alfried Brieger und Sigmund Graff.
• Ballett Bacchanale, 1939, von Léonide Massine
• Ballett Lola Montez, 1946, von Edward Caton

Biacha

• Dietz-Rüdiger Moser, Carolin Raffelsbauer (Hrsg.): geachtet und geächtet - Bayerische Volkshelden in kulturhistorischen Skizzen. Regensburg, 2007. ISBN 978-3-934941-29-8
• Cécil Saint-Laurent: Von Glück und Trauer trunken (OT: Lola Montès). Verlag der europäischen Bücherei H. M. Hieronimi, Bonn 1956 - romanhafte Biografie
• Gerhard Saul, Mut vor Königstronen - Lola Montez und die Münchener Corps, in Einst und Jetzt, Band 19, 1974, S. 98 ff mwN (zur Wirkung auf die Münchner Studentenschaft 1848)
• Bruce Seymour: Lola Montez. Piper, München 2000, ISBN 3-492-22784-8 (im Original: Lola Montez. A Life. Yale University Press, 1998, ISBN 0-300-07439-5) – moderne Biographie

Im Netz

• Literatur vo und iwa Lola Montez bei DNB und Bibliotheksverbünden: DNB; BVB (nur vo)
• Lola Montez: The Arts of Beauty (Digitalisat)
• H. Wyndham, The Magnificent Montez. From Courtesan to Convert. (engl. Biografie bei Projekt Gutenberg)
• Nachtlager in Blutenburg - Ein Flugblatt von 1848 über die Vertreibung von Lola Montez
• Grab von Lola Montez