Owerpfålz

Der Artikl is im Dialekt westlichs Nordboarisch gschrim worn.

Owerpfålz
Woppm Flaggn
Staat:	Deitschland
Bundesland:	Bayern
Vawoitungssitz:	Rengschburch
Gresste Sted:	1. Rengschburch 2. Amberch 3. d Wein 4. Naimakk
Flächn:	9.691,03 km²
Eiwohna:	1.083.780 (31. Dez. 2008)
Beväikarungsdichtn:	112 Eiwohner/km²
Bezirkstogspräsident:	Franz Löffler (CSU)
Regierungspräsidentin:	Brigitta Brunner
Hoamseitn:	Bezirk Regierung
Log in Bayern und Daitschlånd

D Owerpfålz is oaner vo de sim Regierungsbezirke vo Bayern. D Haptstod vo da Owerpfålz is Rengschburch.

Geographischs

D Owerpfålz ligt in Ostn vo Bayern und grenzt ån Tschechien und ån d Regierungsbezirke Owerbayern, Niderbayern, Mittlfrånkn und Owerfrånkn.

Da Regierungsbezirk Owerpfålz umfåsst de drai kroasfraia Stedt Åmberch, Rengschburch, d Wain und de sim Låndkrois Åmberch-Sulzboch, Chåm, Naimakk, Naistadl, Rengschburch, Schwåndorf und Tirschnraat.

Sprouchlichs

In grejsstn Tol vo da Owerpfålz wird nordboarisch gredt, in Sidn und Sidostn nordmittlboarisch, ner in da Stod Rengschburch westmittlboarisch. Nordboarisch wird aa in Echerlånd, in mittlestlinga Eck vo Owerfrånkn, in sidestlinga Eck vo Mittlfrånkn, in Owerbayern nerdlich vo da Doana, und in sidlinga Owern Vogtlånd gredt, Nordmittlboarisch aa in nerdlinga Niderbayern.

Gschichtlichs

D Owerpfålz hout a wechslvulle Gschicht. Folng tout ejtz a Iwersicht.

Politik

Voras ligt da Nordgau, der hout schou in 7. Jorhundert nouch Christus zon Herzogtum Bayern ghejert. Da Nordgau wor ower grejsser wej de haintiche Owerpfålz, da Westn von Nordgau ghejert haint zo Mittlfrånkn, da Nordn zo Owerfrånkn, da Nordostn (es Echerlånd) zo Tschechien.

1329 is da grejsste, nerdliche Tol vo da Owern Pfålz, wej's durtmols ghoissn worn is, min Hausvatroch vo Pavia vo Bayern glejst und da Rhainpfålz zousprocha worn.

1628 is de Owere Pfålz offiziöll wider Bayern avalaibt worn, nouchdean daß's 1621 mit Gwolt daowert worn is.

Sidler

Es Gebejt nerdle vo da Doana wor nu in erschtn Jortausad kam bsidlt, des wor a unwegsåms, woldraichs Lånd. Ner a por boarische Sidlunga und in Ostn slawische Sidlunga hout's durtmols gem. Erst von 11. Jorhundert å han an Haffa boarische Sidler inn Nordgau zung. Dej hom se mit de Slawen, dej wou schou durtn worn, gmischt. Spejter han von Westn her nu frenkische Sidler dazoukumma. Dej ålle hom is Lånd graitt, des hoisst es Hulz ghaut und es Lånd urbor gmåcht. De vüln Ortsnåma mit -richt, -ried, -reuth (a Rait is a graitter Ploz) beleng des.

Es Wåppm

Des is draitolt: Oum links is da pfölzische Lejb, der stejt fir de ejmoliche pfölzische Herrschåft, oum rechts han de boarischn Rautn, dej stenga fir des, daß d Owerpfålz zo Bayern ghejert, untn han de rengschburcher Stodschlissl, dej stenga firn Zåmmaschluß vo Rengschburch mit da åltn Owerpfålz.

Drucksocha

• Franz X. Bogner: Die Oberpfalz aus der Luft. Pustet, 2010, ISBN 978-3-7917-2249-8.

Regiarungsbeziak im Freistaat Bayern

Obafrankn | Untafrankn | Mittlfrankn | Schwobm | Obapfoiz | Obabayern | Niedabayern

 

Regionen im Boarischsproching Raum

Burgnland • Karntn • Minga • Niadabayern • Niadaesterraich • Obabayern • Oweresterraich • Owerpfoiz • Nord-, Ost-, und Sidtiaroi • Soizburg • Staiermork • Wean