Der Bulle von Tölz: Keiner kennt den Toten
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Keiner kennt den Toten |
| Produktionsland | Deitschland |
| Originalsproch | Deitsch/Boarisch |
| Läng | 90 Minutn |
| Oitasfreigob | FSK 12 |
| Einordnung | Staffel 13, Foig 1 59. Foig insgesamt |
| Easchdausstrohlung | 19. Dezemba 2006 auf ORF 1 |
| Stab | |
| Regie | Wolfgang F. Henschel |
| Drahbuach | Andreas Föhr, Thomas Letocha |
| Produktion | Ernst von Theumer junior |
| Musi | Jo Barnikel, Stephan Wildfeuer |
| Kamera | Thomas Meyer |
| Schnitt | Michael Breining |
| Bsetzung | |
| |
Keiner kennt den Toten is a deitscha Feansehfuim van Wolfgang F. Henschel ausm Joar 2006 noch on Drahbuach van Andreas Föhr und an Thomas Letocha. Es is de 59. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 19. Dezemba 2006 af ORF 1 ausgstroit worn.
Handlung
[Werkeln | Am Gwëntext werkeln]Untahoib van Balkon vo ara Luxusvilla wead a Leich gfunden. Laut an Grichtsmediziner Dr. Robert Sprung hod s Opfa duach on heftign Schlog mehrane Rippnbrich daliddn und is danoch iba d’Bristung gstiazt. De Frau, de wo an Todn gfundn hod, is an Benno Berghammer sei neie Kollegin Nadine Richter aus Güstrow in Mecklenburg-Vorpommern – oiso wieda ra Preißin. Sei langjährige Kollegin Sabrina Lorenz is schwonga und bleibt z Berlin; drum hod da Stootsanwoit Dr. Georg Lenz fian Easotz gsorgt.
De Bewohna vo da Villa, da Heinz Boosheim und sei vawitwete Schwägarin Tanja, gem vor, doss den Mo ned kennan. Duachs Adressbiachl van Todn finddn de Kriminala außa, doss ea Patrick Plock hoaßt und ois Callboy in ara Eskortagentur gorbat hod, de wo ea zammad mid seina Frau Martina betriem hod. Laut da Frau Plock hod’s in de 17 Joar vo eanara Ehe nia koan Seitnsprung ned gem.
An Heinz Boosheim passt ibahapts ned, doss da vahosstn, ogheiradtn Putzfrau de Hejftn vo da Villa gheart, oba so hod’s sei gstorbna Bruada testamentarisch bstimmt. Dazua kimmt a monatliche Zohlung vo 10.000 Euro ausm Eab, de wo oba dalescht, soboid de Tanja Boosheim si af on neian Mo eilosst. Da Heinz Boosheim wui sei Schwägarin af legale Weis loswean und biat ian hoch vaschuidetn Sohn Rudi Schlattner wiedahoit vui Gejd o, wonn ea eam varot, wos sei Muada midm Patrick Plock z doa ghobt hod. Noch ara Ozohlung bitt da Schlattner um a Bedenkzeid.
De Kommissar entdeckn ban Rudi Schlattner a greßane Menge Raubkopien vo ara Musi-CD. Dmid ea ned ozoagt wead, varot ea eana de Soch mid da testamentarischn Vafiagung vo sein Stiafvoda, vaschweigt oba an Heinz Boosheim sei Ogebot. Da Schlattner sogt, doss ea ibapriafn woit, ob si da Vazicht af s Gejd aus da Eabschoft fia sei Muada auszoid, oba zwischad ia und an Patrick Plock is nix glaffa. De Tanja Boosheim gibt jetzad oba unumwundn a Vahäitnis midm Patrick Plock zua. Se sogt, doss’s glei gfunkt hod, wia ra ia bei on Autounfoi ins Heck gfoan is. Se hom de Beziehung ned wegan Gejd geheim ghoidn, sondan wei da Patrick seina Frau no nix gsogt hod.
D’Martina Plock foid aus olle Woikn, wias vo da ogeblichn Liabesbeziehung vo ian Mo eafoart. Se vabitt si, doss sei Nam in Dreck zong wead.
In an Patrick Plock seine Kontoauszig steht, doss ea Gejd fia zwoa Fliag on a Reisebüro ibawiesn hod. Außadem hoda ra beträchtliche Summe van Heinz Boosheim kriagt. Wia si außastejd, soid da Plock ois Gengleistung de Tanja vafiahn, dmids iare Osprich valiat. Oba entweda is de Witwe iam Mo iban Tod naus trei bliem oda da Plock hod sein Aftroggeba oglong, wei ea si in de Tanja valiabt hod.
Da Heinz Boosheim dareicht schliaßli doh sei Zui, wei de Martina Plock eam Beweismaterioi fia de Untrei vo da Tanja zuakemma losst. Ea biat seina Schwägarin o, doss ea ia fia oan Monat s Hotej zoid, wonns koane Schwierigkeitn ned mocht und si af da Stej schleicht. Wia ra ia feanzad vazejhd, doss ia Sohn se fost fia Gejd varodn häd, wead da Rudi Schlattner narrisch und rennt an Heinz Boosheim hintahea. Dea vaschanzt si in on Zimma und ruaft an Kommissar Berghammer o. Oba bevor ea wos Genauas song ko, schlogt da Schlattner eam zamm, schleift an Bewusstlosn in d’Sauna, varieglt de Tia und hoazt an Ofn o.
De Kriminala hom in da Zwischnzeid außagfundn, doss da Patrick Plock zwoa Flugtickets noch Venezuela buacht hod. Se glam, doss ea mid sein Gspusi duachbrenna woit und in de Villa eibrocha is, wei ea Kunstgegenständ fia de Finanziarung vo da Roas stejhn woit. Do kannt de Boosheim eam dawischt und umbrocht hom.
Da Berghammer und de Richter pressian zua Villa, nehman an Rudi Schlattner fest und hoin an Heinz Boosheim aus da Sauna. Noch guadn Zuaredn gibt de Tanja Boosheim zua, doss an Patrick Plock umbrocht hod. Se sogt, Ea hod si bloß on se drogmocht, dmid ea de Kunstgegenständ stejhn ko. Se hod mid on Stuj af eam eigschlong; ea is gstoipad und iban Balkon gstiazt. Do sogt da Benno Berghammer zu ia, doss’s jetzad tragisch wead: Da Patrick Plock hod zwoa Flugtickets buacht, oans af sein Naman, des ondane af ian Naman.
Hintagrund
[Werkeln | Am Gwëntext werkeln]Gfuimt worn is z Däiz und z Tegernsee;[1] ois Schaublotz fia de „Pension Resi“ homs as Hollerhaus Irschnhausn heagnumma.
Im Netz
[Werkeln | Am Gwëntext werkeln]- Keiner kennt den Toten in der Internet Movie Database (englisch)
- Keiner kennt den Toten bei Fernsehserien.de
Beleg
[Werkeln | Am Gwëntext werkeln]- ↑ Keiner kennt den Toten – derbullevontoelz.de (Memento vom 29. Aprü 2016 im Internet Archive)
| Vorherige Foig 11. Jenna 2006: Kochkünste |
Episodnlistn | Nächste Foig 27. Feba 2007: Feuer und Flamme |