Gmias
Aus Wikipedia
| Der Artikl is im Dialekt Südostobaboarisch gschrim worn. |
Gmias san Pflanzn oda Taile davo, de wo ma ois Mensch essn ko. Des Woat Gmias is a kulinarischa Begriff, koa botanisch aidaitige Definizion. Desweng is de Ågrenzung aa vo Tradiziona und kuitureie Aschpekt ohengig und werd oft subjektiv troffa. Olle Taile vo Pflanzn, de ned vahoizn, sondan noch oam oda mehrare Joahr obahoib vo da Erdn obsterm, kennan Gmias gnennd wern. Schwammerl zäid ma noamalawais aa zum Gmias dazua. Andrasaits wean Niss, Kraidln und Gwiaz und des, wos kulinarisch unta Obst lafft, ned zum Gmias grechnd. Droad im Sinn vo Kerndln, aus dene ma a Mäi mocht, genauaso Rais, werd ned ois am Gmias zuagherig empfundn. Maiskoim, de botanisch aa zum Droad zäin, wern dageng scho ois Gmias wahrgnumma.
[dro werkln] Ågrenzung zum Obst
De Ågrenzung zwischn Obst und Gmias is ned ollawei aidaitig. Zerschtamoi zäin zum Obst hauptsächle de Taile voara Pflanzn de ma in da Botanik Frucht nennd. Bei de Tomatn und de Guakn gehts oba scho los. Botanisch sand des Fricht, kuiturej gseng zäid mas zum Gmias.
Gmias is maisdns blos oajarig oda de Planzn trogt jenfois blos oamoi. As Obst dageng kimmt eha vo Baama und Streicha, de vahoizn und wiedahoid an Ertrog bringa.
Ois Ohoitspunkt ko ma aa nemma, dass Gmias eha kocht werd, wo ma Obst eha ohne waidane Vaarbatung essn ko, wails scho vo si aus gschmakig is, maisdns siass oda saua. Gmias schmeckt teilweis ned so aromatisch, desweng duat ma oft aa nu a Gwiaz, wia Kraidln oda Gwiazpuiva, eine. Des mittlhochdaitsche Woat gemüese hod se vo dem Woat Mus obgleit', wos nix andas hoasst wia "Brei aus kochte Pflanzn".
Im Judntum is de Untascheidung aa wichtig wei ma je nochdem an andan Segn iba des Essn sprecha duad.
[dro werkln] Gmiassortn
Fia jedn botanischn Teil vo da Pflanzn ko ma a Reihe Gmias ois Beispui nenna.
