Soizoch

Der Artikl is im Dialekt Soizburgarisch gschrim worn.

Soizoch
Soizochtai bei Werfm, im Hintagrund de Hohn Tauan
Datn
Log	Östareich, Daitschlånd
Läng	225
Quäin	am Soizochgeia, Kitzbühla Oipm
Häh vo da Quäin	2300
Mindung	bei Hoaming
Häh vo da Mindung	344
Hähnuntaschied	ca. 1950 m
Eizugsgebiet	6700
Grossstädt	Soizburg
Mittlstädt	St. Johann/Pg., Bischofshofn, Hallein, Burghausn
Gmoandn	Brugg/GStr., Schworzoch/Pg., Werfm, Golling, Laufm
Rechte Neemfliss	Låmma
Linke Neemfliss	Saaloch
Schiffbor	Stod Soizburg (Amadèus Soizburg), Freizeidschiffoahrt (Kajaks, Plättn)

D' Soizoch oda aa Soizach (Standarddaitsch: Salzach) is mid 225 km da längste und wossareichste Neemfluss vom Inn in Östareich und Daitschlånd. D' Soizoch is ana vo d' grossn Oipmflüsse und entwässat d' östlichn Hohn Tauan noch Nordn hi.

Nåmensgewung

D' Soizoch vadånkt wia aa d' Stod Soizburg 'n Nåmen da Soizschiffoahrt, de bis ins 19. Joahrhundat auf da Soizoch betriem worn is. No 1791 hod da Fluss (Hübner, 1791) „Salza“ (haid da Nåm vo am niadaöstareichischn Fluss) ghaassn; no öidane Bezeichnungen san „Iuarum“, „Viarum“ und „Igonta“.

Valauf

Obwoih a poar Zuaflüss länga san, entspringt d' Soizoch in Östareich offiziöi in de Kitzbühla Oipm ån d' Obhäng vom Soizochgeia (2.466 m i. A.) in runde 2.300 m i. A., in da Nähe vo Krimme, nördlich vom Gerlosposs. In da Ortschoft Vurdakrimme vaeinigt sa se mid da Krimmla Ochn, de olladings um meahr ois d' Höiftn länga is.

Im Owalauf fliasst da Fluss in ana Längsfurchn in West-Ost-Richtung bis Schworzoch/Pg. - ois Grenzn zwischn Owa- und Mittllauf güit d' Grenzn vom Pinzgau und Pongau untahoib vo Lend. A bissl vurher öffnet se noch Nordn hi 's Zöia Beggn/Soiföina Beggn, des durch a Toiwossascheidn 'n Zöia See und 's Eizugsgebiet vo da Saaloch, am Neemfluss vo da Soizoch, trennt. Vo Krimme bis üwa 'n Beginn vom Mittllauf ausse mündn vo Südn in reglmässiga Obfoing de Süd-Nord valaufmdn Täla aus 'm Oipmhauptkåmm, de durch d' Eitiafung vom Soizochtoi geng Ostn zuanehmend weid üwa 'm Toibodn mündn und mid tiafe Klåmmen obschliassn: Kitzlochklåmm (Raurisa Toi), Gostoana Klåmm (Gostoana Toi), Liachtnstaaklåmm (Grossorlatoi).

Bei Schworzoch/St. Veit und St. Johann schwenkt da Mittllauf noch Nordn und weitet se zu am schänen Toibeggn, 'm Pongaua Beggn, in dem neem St. Johann aa Bischofshofn liegt. D' Soizoch durchbricht am Poss Luag in da Schlucht vo de Soizochäfm d' nördlichn Koikhochoipm zwischn Hochkänig/Hånggebirg und Tennengebirg.

Im Untalauf valosst d' Soizoch d' Oipm in 's Soizburga-Freilassinga Beggn, durchfliasst Än untan Tennengau mid Golling und Hallein und 'm Flochgau mid da Stod Soizburg und Freilassing ån da Saaloch. Åschliassnd durchbricht 's d' Laufna Enge bei Owandorf/Laufm, durchströmt 's Tittmoninga Beggn und d' Nonnreita Enge und mündt im Beggn vo Üwaoggan, zwischn Burghausn und Braunau åm Inn auf ana Hechn vo 344 m i. NN bei Hoaming in den vo Westen kummandn Inn.

Sie büidt auf etwoa 59 km Läng d' Grenzn zwischn Östareich und Daitschlånd, und hod a Eizugsgebiet von runde 6.700 km². Da mittlane Wossaobfluss ån da Flussmündung betrogt 250 m³/s.

Im Netz

 Commons: Salzach – Sammlung vo Buidl, Videos und Audiodateien

• Wossastånds-Grafik vo Laufm ån da Soizoch vom Boarischn Låndesamt für Umwöid
• Datnblattl zur Soizoch vom Wossawirtschoftsåmt Traustoa
• Hydrologischa Dienst - Wossastånd
• 's 100-jahrige Hochwossa am 12. August 2002
• Informazionen zum Saniarungsprojekt
• Kronologie vo da Belostung vo da Soizoch durch d' Papiar- und Zöistoffabrik in Hallein
• Modöivasuach zur Rolliarung vo da Grenzstreggn vo da Soizoch
• Tauanradlweg vo Krimme nach Possau
• Ausstellung Leemsoda Soizoch