Nutza Dischkrian:Alib

Griassde Alib

... gfreit uns, dass do mitmocha wuist. Erfoarane Wiki-Nutza brauchma east recht. Ba uns san vui Leit, de wo aa in da deitschn Wiki aktiv san.

Und - dei Vorstäiung gfoid ma, is scho amoi a klasse Eistieg, weida so! lg --Matthias Klostermayr 22:01, 6. Mai 2009 (CEST)

Uh, des geht jo schnö! Donk da sche füa den liabn Gruass – i moa, mia wean uns scho guad vastehn do! --Alib 22:35, 6. Mai 2009 (CEST)

Dei Artiklbaustöi

…håw i da in dein Benutzanãmensraum ummevaschom. Woa vamutlich eh netta a Missgeschick, fåis ned bitte Benutzer: voa Alib/xy schreim, wãun'st wieda amåi a Baustöi brauchst.

Danke und wünsch da i aa nu vüi Spaß då herin. Frische Kräfte mid Tatndrãng san genau des, wås uns ålle guad tuad ;) lg, → «« Man77 »» 22:12, 7. Mai 2009 (CEST)

Donk da sche. Des woa natürli a Holla, a typischa Onfengaföhla, füa dens owa eigentli koa Ausred ned gibt, wöi des in olle ondan Wikipedien jo a ned ondascht is und i des oiso wissen miassat. Is ma richtig peinlich. Owa mia san do jo eh unta lauta Gleichgesinnte und wean scho fei zsommschaun! An schen Gruaß dawei! --Alib 08:24, 8. Mai 2009 (CEST)

Weng dainer Baustöi

Servas Alib, dai Artike-Baustöi is auf'n Artike Slowenische Sproch vaschom worn, dai Baustöi is desweng gläscht worn. Liawe Griass --Mucalexx 18:13, 28. Jul. 2009 (CEST)

Öha, und des, obwoi i ma söwa no ned gonz sicha woa, ob's scho hoibwegs guat gnua is. No, is a ka Schodn. Tuat ma load, dass i a wengal bummlt ho, owa in de letztn zwa Monat woas a bissl trawig und zletzt woa i a no a Zeitl im Auslond. Donksche füa den Schupfa und weita auf a guade Zsommenoabeit! Pfiatti --da Ali sakra! 20:41, 11. Aug. 2009 (CEST)

Griassde Alib, schee dassd wieda do bist! I hob des vaschiam "miassn", wei do jemand an Slowenisch-Stumpn ogfangt... Und dei Artikl hod a ganz andas Kaliba und gheat etz scho zu de bessan Artikl, de wo mir do herin hom. Wannst do no a weng dro weida werklst, host a guade Chance fir a "Berig"-Nominiarung. lg --Matthias Klostermayr 08:53, 12. Aug. 2009 (CEST)

Find-e aa! Blåuß mit deam "Krowodisch" im eastn Satz kånn-a me ned so ganz oofreindn. --Kazu89 ^ノート 09:43, 12. Aug. 2009 (CEST)

Donksche füa des vüle Lob! Kazu89, wos gfoit da denn an dem »Krowodisch« ned? Hoasst de Sproch (und des Voik) bei eich ebba ondas? (Übrigans gibts mittlaweile dazua a scho an neign Artikl vom Grantla.) --da Ali sakra! 16:40, 16. Aug. 2009 (CEST)

Wal'e's grod les, schau af d Dischkriersaitn zon naia Artikl. -- Sinnierer 19:05, 16. Aug. 2009 (CEST)

Grejss De, Alib,

Du bist ja schou a Wal dou, ower i ho Dai Nutzersaitn erscht haint glesn. Des min "Bölln", des wird in Bayern aa iwer d Owerpfölzer gsågt. Dej göltn aa åls Sturschedl, und hom "an Dialekt, dean wou koaner vastejt", wal'a ånderscht is aswej da haint gwonte åltboarische Regiolekt asn sidwestlinga Åltbayern. I pflech es West-Nordboarische holt su guat wej'e'es kå. Schod is ower, das'se ner su weng Lait fir des asetzn, trotzdean das's nu gern gredt wird - zwengst am Lånd. I soch: Wos niat gschrim wird, des gejt unter. Fir d Sprouchwissnschåftler is mai Gechad - bis ejtz ållamol - aa niat intressant, a recht a "schworzer Flek af da Låndkattn" holt. Wos amol gspasse gwen is: Wej'e amol gfrougt worn bi, ow'e vo Wien kumm, wecha main Akzent. Dou how'e frede naa gsågt, und waiter, das'e vo da Owerpfålz kumm. Af des how'e gach d Åntwort krejt, das'ma d Owerpfölzischn ja niat vastejt. "Ja hawedere!", how'a'ma denkt, "Hejt'e ner gsågt, das'e vo Wejn kumm, nou war'e worschains "a charmanter Wejner" gwen, ower asu bin'e blous "a owerpfölzer Wejdrawöll" ;-) -- Sinnierer 22:23, 12. Aug. 2009 (CEST)

Seavas Sinnierer, i wead hajd amoull »uandlig« Steirisch zam Rejn/Schrajm vasuachn, zwejng da Authejntizitäjt und wöjs zan Thejma passt. Mit die Steira is dejs in Öjstareich a sou: Vastoundn weans eingtli gounz guat, es Steirische güllt ollso net ols bsoundas schwaa füa oundane Boarischsprecha, oundas ols zoun Beispül es Tiaroularische oda es Innagebiag-Solzbuagarische. Owa es hout an gounz charakteristischn Kloung füa Aussnstejende, dea si zoun Beispül in Wöata wia »Keanöull« oda »Lejoubm« manifestiat. Und füa die Nejd-Steira klingt dejs hoult oungejblich sou, ois oub a Hund bölln tarat. Wounn a Steira zun eastn Mol ins »Auslond« foat und eam gsougt wiad, dass die Steira olle bölln, donn löjst dejs ouft wejniga Eaga ois Vawirrung aus, wöis am Steira holt üwahaupt ned so vuakummt und in da Steiamoak natiali a koana sogt, dass die Steira »bölln«. Owa i kounn da vasichan, in da Steiamoak tatns Dei Mundoat sicha guat vastehn; es tatat zwoa koana darotn, wousd hea bist, owa ols Weana tat di sicha koana »beschimpfn«. ;-) Und wounnst Di dounn ols Owapfölza »outest«, host a sicha an vül an bejssan Stond ols wia ols a Weana. Wöil dejs mitm »Weana Charme«, des is a sou a Souch – dea Schmeh ziagt in Wiaklichkeit nua aussahoulb vou die Grejnzn vou Östareich... (Obwoull i duachaus oan oda vielleicht zwoa Weana kenn, mit dej ma rejn kou.) --da Ali sakra! 16:34, 16. Aug. 2009 (CEST)

Baustäi im Artikl-Namaraum

Nix fia unguad, aba den Fehler machst anscheinend recht gern ;-) I hob dei Baustäi aus'm Artikl-Namaraum in dein Benutzernamaraum vaschom: Benutzer:Alib/Sepp Forcher --Schott Flori 12:37, 13. Aug. 2009 (CEST)

Sakrament no amoi, Du host recht! Meine Föhla sand offnboa ned dazua do, dass i wos draus lean, sondan se stehn sozusogn füa sich söbst. Owa a gewisse Konsistenz und Kohärenz ko ma wiakli neamd osprechn! Donk Da sche füas Nochwischn! --da Ali sakra! 14:57, 15. Aug. 2009 (CEST)

Des is ainggle koa Faler vo Dir, sundern oaner von Programm. I ho's grod prowiert: Bål'ma ins Soucha-Föld quase Benutzer:Werdrawöll/Wosdrawöll agit, und af da Vawåltungssaitn nou af neiche Seitn klickt, nou falt ba derer naia Saitn es Benutzer in Lemma, assa kummt ålso ner Werdrawöll/Wosdrawöll. -- Sinnierer 15:42, 15. Aug. 2009 (CEST)

Teifi eini, woa is! Do muass ma oiso wiakli höllisch aufpassn, dass aam die Software die richtige Seitn olegt. Donk Da sche füa den weatvoin Hinweis! --da Ali sakra! 16:00, 16. Aug. 2009 (CEST)

I sprich's amol ban Ståmmtisch å. -- Sinnierer 18:57, 16. Aug. 2009 (CEST)