Sund (Färöer)

Aus Wikipedia
Zur Navigation springen Zur Suche springen

Sund (boarisch weatli: Mearesstrossn) is a kloane Uatschoft af d Färöer am sidestlichn Gstod fo da Haptinsl Streymoy. Am 1. Jenna 2020 hod bei ana Flech fo 7,17 km2 nua mea nu oa oanziga Mensch z Sund gwohnd (Dichtn: 0,14 EW/km2). D Postleitzoi is FO-186 und es ghead zua Tórshavna Kommune dazua.

S Wuat Sund sted im Nominativ, im Akkusativ sogg ma (á/av) Sund im Dativ sogg ma (inn á) Sundi und im Genitiv sogg ma (til) Sunds. Oan, wos z Sund wohnd, nennd ma Sundsmaður (weibli: Sundskvinna, Mz.: Sundsfólk).

Eadkund[VE | Weakln]

Da Kaldbaksfjørður. Sund bfint si weida hint rechts.

Sein Nom hod Sund fom Sundini, da grejsstn färöischn Mearesstrossn, dea wos zwischn Streymoy und Eysturoy duachifiad. Dem sei sidlichs End is a wengei estlich fo Sund, z Hvítanes. Sund sejm ligg scho in am Nemoam fom Sundini, in Kaldbaksfjørður, des is a Fjord, dea wos fom Ostn hea af Kaldbaksbotnur einiged.

D grejsstn Bach z Sund hand d Sundsá (Sunda Achn), de wos duachn Uat rind und weida om Áin Grøv (Grobm-Bachin) hoassd, und d Svínsá (Sau-Achn) a wengei weida im Fjord drei. Da hejchste Berg is da 547 Meta houche Stiðjafjall (Amboss-Beag), es foing da 535 Meta houche Tungulíðfjall (Zunga-Roa-Beag) und da Lambfelli (Plotz, wo fi Schof steamb) mid 366 Meta.

Gschicht[VE | Weakln]

Friara hods z Sund grod oan Hof gem, dea wos owa so grouss gweng is, dass 20 Leit do lem homb kina.

In d '80a-Joa[1] hombs duatn a Warmkroftweak und an Hafn fia grousse Schiif baud, dea wos den in da Haptstod entlostn soigg, owa des hod ma oft wida deacht ned umgsetzt. Heidzdog weand fo dem Hafn d Fischzuchtn afm Fjord ogsteiad.

2017 is s Kroftweak um 4 MAN-Dieslaggregate ausbaud woan, iaz hods a elektrische Gsomtleistung fo 37 Megawatt und is s grejsste färöische Warmkroftweak.[2]

Fo Sund fiad a oida Wondaweg af Hoyvík ummi. A onana ged Richtung Sundshálsur (Sunda Soddl) im Londesinnan, fo wo ma aa af Norðradalur, Syðradalur oda Velbastaður kimb.

Bfejkarung[VE | Weakln]

Beleg[VE | Weakln]

  1. Luftbuidl ausm Joa 1984, foroyakort.fo
  2. Zeidungsartikl iwa s Kroftweak, safety4sea.com (englisch)