EU-Charta fia Regional- und Mindaheidnsprochn

Der Artikl is im Dialekt Hausrukfiatlarisch gschriem worn.

D'airopeische Charta fia Regional- und Mindaheitnschbrochn ged auf a Iniziatifn fum Eiroparod zruk

D´EU-Charta fia Regional- und Mindaheitnschbrochn (auf Englisch a European Charter for Regional or Minority Languages, auf Franzesisch: Charte europeenne des langues regionales ou minoritaires) is a fökarechtlicha Fadrog dea de Lenda, wos den untaschrim haum, dazua fabflicht, dass kloane Schbrochn und Mindaheitnschbroch bessa schüzn und a rechtlich und finanziel untaschdüzn miassn. De Schbrochn de fu deara Charta gmoand han, san hisdoarische Regionalschbrochn und de Schbrochn fu nazionale Mindaheitn. De Schbrochn fu neich aingwaundate Mindaheitn wean fu deara Charta owa ned berüksichtigt und a Dialekte ghean ned dazua. A genaue Definizion wos jez a Dialekt is und wos a aigane Schbroch, lifat dea Fadrog owa ned. Dafia gibts a Lisdn fu Schbrochn, de noch deara Charta ois söbschdendige und föadarungswüadige Schbrochn gödn. Daduach san in maunche Lenda mea Schbrochn auf deara Lisdn drauf, a soiche de ma unta Umschdend a ois Dialekt bezaichnen kintad, wo aundane Lenda a schdrengane Definizion haum.

De airopeische Charta fia Regional- und Mindaheitnschbrochn is 1992 zum Eiroparod iniziiad woan und is ned neta auf Lenda beschrenkt, de wo Mitglid fu da EU han. Daduach san a Lenda wia d'Schwaiz, d'Ukraine oda Armenien bai deara Charta dabai, de wo goa ned bai da EU han. Rechtlich wiaksaum wiad de Charta a eascht waun a Laund den Fadrog ratifiziad hod und damid in nazionals Recht umgsezt hod. Ois easchdas hod de Charta im 1993ga Joa Noaweng ratifiziad und des bis jez lezde Laund, wos dazua kema is, woa im Jena 2008 Rumenien. Maunche EU-Mitglidslenda wia zan Baischbü Italien und Belgien haum de Charta dawai nu goa ned untaschrim und dischgrian nu driwa. Ialaund hod de Charta ned untaschrim, wai noch eanam Gsez de iarische Schbroch koa Regional- oda Mindaheitnschbroch is, sondan ofiziele Aumtsschbroch fu da Republik Ialaund. Fraunkreich hod de Schbrochn-Charta zwoa schau untaschrim, owa de Ratifiziarung is weng fafossungsrechtliche Broblem fahindat woan.

Motivazion

In da Preambl fu deara Charta wiad gschüdat, warum a so a Fadrog iwahaupt nodwendi is und warum des a guade Soch is, waun ma kloane Schbrochn a fu schdotlicha Seitn auneakend und föadat. De Regional- und Mindaheitnschbroch wean ois Tei fum kultureln Eabe fu Eiropa augseng, bai denans schod wa, wauns faschwindn und ausschdeam dadn. Im Oaginal hoasts aso:

Considering that the protection of the historical regional or minority languages of Europe, some of which are in danger of eventual extinction, contributes to the maintenance and development of Europe's cultural wealth and traditions (Englisch)

Considerant que la protection des langues regionales ou minoritaires historiques de l'Europe, dont certaines risquent, au fil du temps, de disparaitre, contribue à maintenir et à developper les traditions et la richesse culturelles de l'Europe:(Franzesisch)

Aussadem schded in deara Preambl drin, das des Recht, de aigane Regional- oda Mindaheitnschbroch brivat und a öfentlich zan fawendn, a unfaaissalichs Menschrecht is und a im Sin fu da airopeischn Menschrechtskonvenzion is. Im Oaginal hoasts aso:

Considering that the right to use a regional or minority language in private and public life is an inalienable right conforming to the principles embodied in the United Nations International Covenant on Civil and Political Rights, and according to the spirit of the Council of Europe Convention for the Protection of Human Rights and Fundamental Freedoms (Englisch)

Considerant que le droit de pratiquer une langue regionale ou minoritaire dans la vie privee et publique constitue un droit imprescriptible, conformement aux principes contenus dans le Pacte international relatif aux droits civils et politiques des Nations Unies, et conformement à l'esprit de la Convention de sauvegarde des Droits de l'Homme et des Libertes fondamentales du Conseil de l'Europe (Franzesisch)

Bezüglich Dialekt hoasts owa im Artikl 1 gauns explizit, das Dialekt fu da ofzieln Aumtsschbroch fu am Laund koane schuzwüading Regionalschbrochn san und a das de Schbrochn fu neich aingwaundate Mindaheitn ned unta de Definizion fu deara Charta foin. Im Oaginal hoasts aso:

it does not include either dialects of the official language(s) of the State or the languages of migrants (Englisch)

elle n'inclut ni les dialectes de la (des) langue(s) officielle(s) de l'Etat ni les langues des migrants (Franzesisch)

A genaue Definizion wos a Dialekt is und wos a aigane Schbroch, schded owa in deara Charta ned drinan und desweng blaibt de Frog ofn. Daduach san owa schau a boa Schbrochn in de Lisdn aufgnuma woan, fu denan maunche Leit behauptn das des neta Dialekt wan und koane söbschdending Schbrochn.

Schbrochn de fu da Charta gschizt wean

Foigende 23 Lenda haum den Fadrog untaschrim und a ratifiziad (Datum in Glauma) und daduach foigende Schbrochn ofiziel ois schiznswiadige und föadarungswiadige Regional- und Mindaheitnschbroch auneakaunt:

Armenien ratifiziad am 25sda Jena 2002 Assyrisch Jesidisch Grichisch Russisch Kuadisch Deitschlaund ratifiziad am 16dn Septemba 1998 Denisch in Schleswig-Holstein Owasoabisch im Fraischdod Saxn Niadasoabisch in Brandnbuag Noadfrisisch in Schleswig-Holstein Satalaundfrisisch in Niadasaxn Romanes in gauns Deitschlaund Niadadeitsch in Bremen, Hambuag, Mecklenburg-Vorpommern, Niadasaxn und Schleswig-Holstein Denemak ratifiziad am 8dn Septemba 2000 Deitsch (im sidlichn Jütlaund) Estareich ratifiziad am 28sda Juni 2001 Krawodisch im Buanglaund (Gradišće) Slowenisch in Keantn (Koroška) und da Schdaiamoak (Štajerska) Ungarisch im Buanglaund (Felsőőrvidek, Őrvidek) und in Wean (Becs) Tschechisch in Wean (Vídeň) Slowakisch in Wean (Viedeň) Romanes im Buanglaund s'Faeinigte Kinireich ratifiziad am 27sdn Meaz 2001 Ole de Schbroch haum im gaunzn Faeinigtn Kinireich an Schdatus ois auneakaunte Regional- und Mindaheitnschbroch, aussa Manx, wos neta auf da Isle of Man den Schdatus hod. Kornisch Iariasch Manx, ratifiziad fu da Regiarung fu da Isle of Man Scots in Schotlaund und Noadialaund (doat: Ulster Scots) Schotischs Gelisch Walisisch Finlaund ratifiziad am 9dn Nofemba 1994 Sami Schwedisch (wos sowiso koofiziele Schbroch is) Holaund ratifiziad am 2dn Mai 1996 Westfrisisch in Frislaund Limbuagisch im gaunzn Laund Niadasexisch im gaunzn Laund Romanes im gaunzn Laund Jidisch im gaunzn Laund Kroazien ratifiziad am 5dn Nofemba 1997 Italienisch Seabisch Ungarisch Tschechisch Slowakisch Rusinisch Ukrainisch Liechtenstein ratifiziad am 18dn Nofemba 1997 koa Regional- oda Mindaheitnschbroch Luxnbuag ratifiziad am 22sdn Juni 2005 (dawai nu ned gwis) Montenegro ratifiziad am 15dn Februa 2006 Albanisch Romanes Noaweng ratifiziad am 10dn Nofemba 1993 Sami (Tei II und III) Kven (neta Tei II) Romanes (neta Tei II) Skandoromanes (neta Tei II) Rumenien ratifiziad am 29sdn Jena 2008 Albanisch Armenisch Boinisch Bulgarisch Deitsch Diakisch Grichisch Italienisch Jidisch Krawodisch Mazedonisch Romanes Russisch Rutenisch Seabisch Slowakisch Tatarisch Tschechisch Ukrainisch Ungarisch

Schbanien ratifiziad am 9dn Abrü 2001 Baskisch (koofiziele Schbroch in da autonomen Region Basknlaund und in am Tei fu Navarra) Katalanisch (koofiziele Schbroch auf de Balearischn Insln, in Katalonien und Valencia) Galizisch (koofiziele Schbroch in Galizien) Schwaiz ratifiziad am 23sdn Dezemba 1997 Italienisch Retoromanisch Schwedn ratifiziad am 9dn Februa 2000 Finisch Meänkieli Sami Romani Jiddisch Seabien ratifiziad am 15dn Februa 2006 Albanisch Bosnisch Bulgarisch Krawodisch Ungarisch Romanes Rumenisch Rusinisch Slowakisch Ukrainisch Slowakai ratifiziad am 5dn Septemba 2001 Bulgarisch Krawodisch Tschechisch Deitsch Ungarisch Boinisch Romanes Rusinisch Ukrainisch Slowenien ratifiziad am 4dn Oktoba 2000 Ungarisch Italienisch Romanes Tschechai ratifiziad am 15dn Nofemba 2006 Slowakisch (Tei II und III fia s'gaunze Laund ratifiziad) Boinisch (Tei II; und Tei III in tschechischn Schlesien, im Beziak Frydek-Místek und Karviná) Daisch (neta Tei II) Romanes (neta Tei II) Ukraine ratifiziad am 19dn Septemba 2005 T'Ukraine hod de Charta ratifiziad, list owa explizit koane Schbrochn auf sondan nend neta de Foiksgrupn, denan eana Schbroch bsondas gschizt und gföadat wean soid. Des san foigende Foiksgrupn: Bulgarn Waisrussn Krimtatarn Gagausn Grichn Deitsche Ungan Judn Moldawia Boin Rumenen Russn Slowakn Ungan ratifiziad am 26sdn Abrü 1995 Krawodisch Deitsch Romanes Seabisch Slowakisch Slowenisch Züpan ratifiziad am 26sdn August 2002 Armenisch

Lenda de ned untaschrim haum

EU-Lenda

• In Belgien kinan si si bai schbrochpolitische Sochan nia aining und desweng haum de dawai nu ned untaschrim. Fum nazionaln Recht san owa doat Holendisch, Franzesisch und Deitsch ofiziele Aumtsschbrochn.
• Boin hod a nu koa Entscheitung drofn, obs regionale Mindaheitnschbrochn auneakena woin und wöche.
• Bulgarien hod a nu ned untaschrim, obwoi s'doat mearane schbrochliche Mindaheitn gibt, zB Diakn, Roma, Aromunen, Armenia, Seam und Pomakn.
• De baltischn Lenda Estlaund, Letlaund unt Litaun schaichn oi drai, dass as Russische ofiziel ois Mindaheitnschbroch auneakena miassn und haum desweng dawai ned untaschrim.
• Grichnlaund duad aso, wia waun bai eana ole Leit Grichisch ren dadn, dawai gibts a nu Bulgarisch, Mazedonisch, Aromunisch, Albanisch, Diakisch und Romanes doatn.
• In Fraunkreich iss aso, das de momentane Fafossung ned ealaubt, das de Charta ratifiziad wiad. Nochdem des Laund laung a recht a restriktive Schbrochbolitik bedrim hod, muas eascht d'Fafossung gendat wean, befoa des iwahaupt megli wiad. Schwiarig is doat foa oim da Schdatus fum Koasischn, fum Bretonisch und fum Baskisch, owa a de Frog ob Okzitanisch ois Schbroch auneakend wean soid und a wos mid de Departmaus in Iwase is, wia zB in Franzesisch Guyana.
• Ialaund hod de Charta ned untaschrim, wai ole zwoa autochtonen Schbrochn (Englisch und Iarisch) ofiziele Aumtsschbrochn san.
• Italien hod de Charta ned untaschrim, doat san owa de Regional- und Mindaheitnschbrochn untam Schuz fu da Fafossung, nemli Albanisch ( Arbëresh), Franko-Provençal, Furlanisch, Grichisch, Katalanisch, Moliseslawisch, Okzitanisch, Sardisch, Sizilianisch und Zimbrisch. Aussadem san nem Italienisch regional a nu aundane Schbrochn ofiziele Aumtsschbrochn, nemli Deitsch und Ladinisch in da Region Trentino-Siddiaroi, Franzesisch im Aosta-Doi und Slowenisch in da Brovinz Triest und Gorizia. In da Brovinz Udine is a nu da boarische Dialekt Tischlbongarisch regionale Aumtsschbroch im Oat Tischlwaung.
• Malta hod de Charta ned untaschrim, wai bai eana ole 4 autochtonen Schbrochn a Aumtsschbrochn oda zu mindest koofiziele Schbrochn san.
• Poatugal sogt, dass bai eana koane autochtonen Mindaheitnschbrochn gibt, wos owa Definizionssoch is. Es gibt doat nemli a nu Leit de Galizisch, Caló und Mirandesisch ren, de owa ole drai eng mim Poatugisischn fawaunt san. Ausadem gibts nu Asturisch und Romani Vlax und an Haufn afrikanische Schbrochn, de fu Leit aus de ehemolign poatugisischn Kolonin gret wean, zan Baischbü Kabuverdianu, Umbundu und Mbundu.

Ned EU-Lenda

• Fu de airopeischn Zweagschdotn hod dawai koana de Charta untaschrim, obwoi sogoa in so kloane Lenda de linguisdische Situazion oft recht kompliziad is. In Monaco is de oanzige Aumtsschbroch Franzesisch, obwoi fü Leit Monegassisch ren oda Italienisch. Andorra is des oanzige Laund wo s'Katalanische aloanige Aumtsschbroch is. In San Marino is Italienisch ofiziele Schbroch und da Vatikan is des oanzige Laund wo Lodain Aumtsschbroch is, nem Italienisch.
• Ned gödn duad de Charta a in Gibraltar, de Kanalinsln und im Kosovo.
• Asabaidschan wü de Charta ned untaschreim, so laung Armenien nu an Tei fu eanam Laund okupiad.
• In Islaund gibts koane aundan autochtonen Schbrochn wia Islendisch.
• Bosnien-Heazegowina, Mazedonien und Moldawien haum dawai weng bolitische Schwiarigkaidn nu nix in de Richdung bschlossn.
• T'Diakai, Waisrusslaund und Russlaund woin de Charta goa ned untaschreim, genau so wia Geoagien, wos a nu baim Eiroparod dabai wa.

Warum ned Boarisch?

De Charta sogt zwoa, das neta Schbrochn an bsondan Schdatus fadeant haum, de a Obschdaundschbrochn han, owa es wiad ned definiad wia gros dea linguisdische Obschdaund sei muas. Fü Schbrochn, de schau auf da Lisdn fu ofiziel auneakaunte Regional- und Mindaheitnschbroch drauf han, san relatif no mid ana aundan Schbroch fawaunt und ma kintad a behauptn, das des koane aiganen Schbrochn sondan neta Dialekt han. Ma siagt oiso, das de Auneakenung ois Schbroch hauptsechli dafau ohengt, obs schdoake Intaressnsgrupn gibt, de si dafia aisezn. Boarisch is desweng ned auf da Lisdn drauf, wais bai ins koa grosse Lobby dafia gibt. Aso is in Siddiaroi Hochdeitsch ois regionale Mindaheitnschbroch auneakaunt, owa ned Diarolarisch. A in Rumenien san zB ned s'Simbiaga Sexisch und s'Landlarisch ofiziel auneakaunt, sondan neta Hochdeitsch. Midn Zimbrischn und mim Tischlbongarischn san owa zu mindest in Italien zwoa Variantn fum Boarischn im nazionaln Recht ois Schbrochn auneakaunt.

Schau aa

• Aumtsschbrochn fu da EU
• Boarische Schbrochinsln