Gugaruz

Aus Wikipedia
Wexln zua: Navigation, Suach
Gugaruz
Zea mays - Köhler–s Medizinal-Pflanzen-283.jpg

Gugaruz

Systematik
Monokotyledonen
Commeliniden
Ordnung: Siassgrosoartige (Poales)
Famij: Siassgros (Poaceae)
Gattung: Zea
Oart: Gugaruz
Wissnschaftlicha Nama
Zea mays
L.

Da Gugaruz, aa Kukuruz oda Mais, is a oide Kuituapflonzn, wo zan Droad zäid wead. Wia de ondan Droadsortn is a Siassgros. Gugaruz is scho in prehistorischa Zeit in Middlamerika obaut worn und noch da "Entdeckung" vo Amerika af Eiropa kema. Heit wead da Gugaruz wäidweit obaut. Ea wead vor oim ois Fuadamiddl gnutzt, owa aa zua Energiegwinnung (Biosprit, Biogas) und ois Noarungsmiddl.

Etymologie[VE | Weakln]

Gugaruz (Kukuruz) is iwas Serbo-Krowodische kukùruz (kyrillisch: куку̀руз) meglichaweis ausm Tiakischn قوقوروز (kokoroz)[1] ins Boarische kema. Vialleicht hod des aa mit aufständischn Bauan im ungarischn Kenigreich z duan, de "Kuruzen" (Vabindate vo de Tiakn)[2].

Mais kimmt vom spanischn Wort maize, wo wiedarum aus oana oidn middlamerikanischn Indiana-Sproch (Arawakan bzw. Taino) kimmt und do mahiz ghoassn hod.[3]

Nutzung[VE | Weakln]

Polenta auf oana Frigga (Oaspeis mit Speck und Kaas)
Traditionäie indianische Tortillas
Gugaruz-Koibm an an Kartna Wiatschoftsgebaide

Da gresste Tei vom Gugaruz, wo wäidweit obaut wead, wead ois Fuadamiddl (Silogugaruz, Keandlgugaruz) gnutzt; dees guit aa fia Bayern und Östareich. A kloanara Tei wead fia de Energiegwinnung eigsetzt. Da Rest wead ois Lebmsmiddl vawendd.

Noarungsmiddl[VE | Weakln]

Gugaruz zäid in vui Lendan vo da Wäid za de Grundnoarungsmiddl.

De oafochste Oart an Gugaruz z essn is glei vom Maiskoibm owa. Im unreifn Zuastand, wann de Keandln no woach san, ko da Mais roh vom Koibm gessn wean. Kocht, grest oda gruit is dees no bekemmlicha. Kochte, unreife Maiskeandln wean aa in Salodn, Suppm und Auflaifn vawendd oda ois Gmiasbeilog gessn. Aus Maiskeandln wean duach Quetschn de Cornflakes (Maisflockn) heagstejt. Aus Keandln vo speziejn Maissortn mocht ma Popcorn.

Nebm da Vawendung ois ganze Keandln wead da Gugaruz aa za Mäi und Griass bzw. za Steakn weidavaorbat.

Aus Maisgrias wead zan Beispui da Polenta gmocht, a oide indianische Tradition, wo aa in Middleiropa a traditionäie Speisn vo Bauan und oarman Leit wor und no imma gean gessn wead. Ba da Heastejung vo Maisgrias foit ois Nebmprodukt s Maiskeimäi o.

Maisbrod z bocha is emfois a oide indianische Tradition. Dees is a Fladnbrod, wo heit no in vuin vaschiedanan Variantn in de USA gessn wead.

A spezieje joartausendoide Vaorbatungstechnik fia Gugaruz ois Lebmsmiddl is de Nixtamalisation. Des is a meastufiga Prozess, wo da Gugaruz mit Hoizoschn oda gleschtn Koich kocht, enthist und nacha noss zan Doag vamoin wead. Oschliassend weads za Endprodukt weida vaorbat oda drickat und glogat. Duach de Nixtamalisation wead da Gugaruz noarhofta und bekemmlicha.

Tortillas san a mexikanisches Fladnbrod, des wo aus Gugaruzmäi gocht wead, wo duach Nixtamalisation heagstejt worn is.

Fuadamiddl[VE | Weakln]

De Haupvawendung vo Gugaruz ois Fuadamiddl is: Ois Maissilage (aus da gaunzn Gugaruzpflaunzn) fia Rindviecha, ois Corn-Cob-Mix (Silage nua ausm Koibm) fia Schweindln, ois Gugaruzkeandln und ois Maissteakn (Zuagob fia Proteinfuada).

Nochhoitige Energiegwinnung[VE | Weakln]

An Haffa Gugaruz wead aa ois nochwoxanda Rohstoff vawendd. Gugaruz wead ois Energiepflonzn zua Heastejung vo Biokroftstoffn gnutzt und ois Energiegugaruz in Biogasologn.

Zua Hestejung vo Biogas wead de ganze Gugaruzpflanzn gnutzt, wearend fia Bioethanol (Biosprit) nua da Maiskoibm vawendd wead.

Industriella Rohstoff[VE | Weakln]

De Gugaruzsteakn sea vuiseiti vawendd: Ois Ausgangsprodukt fia diverse Biokunststoff und ois Fermentationsrohstoff fia Feinchemikalien beispuisweis (fia Antibiotika oda Aspirin).

Wiatschoftliche Bedeitung[VE | Weakln]

A Gugaruz-Fäid z Liachtnstoa
Reife Gugaruz-Pflonzn
Gugaruz-Koibm
Gugaruz-Keandln

Wei Gugaruz in vui Tein vo da Wäid a Grundnoarungsmiddl is, hoda a hohe wiatschoftliche Bedeitung. Dazua kimmt, dass Gugaruz zua nochhoitign Energiegwinnung (Biosprit, Biogas etc.) imma wichtiga wead. Ois Fuadamiddl is da Mais ebmfois wäidweit wichtig.

2009 is laut FAO wäidweit 817,1 Mio. t Gugaruz geantet worn. De foigende Tabejn gibt dazua a Iwasicht:

De gresstn Gugaruzproduzentn wäidweit (2009)[4]
Rang Land Menge
(in t)
  Rang Land Menge
(in t)
1 USAUSA USA    333.010.910 13 ItalienItalien Italien 7.877.700
2 KinaKina Kina    163.118.097 14 UngarnUngarn Ungarn 7.528.380
3 BrasilienBrasilien Brasilien 51.232.447 15 PhilippinenPhilippinen Philippinen 7.034.033
4 MexikoMexiko Mexiko 20.202.600 16 EgyptnEgyptn Egyptn 6.800.000*
5 IndonesienIndonesien Indonesien 17.629.740 17 SerbienSerbien Serbien 6.396.262
6 IndienIndien Indien 17.300.000 18 ThailandThailand Thailand 4.616.119
7 FrankreichFrankreich Frankreich 15.299.900 19 DeitschlandDeitschland Deitschland 4.527.228
8 ArgentinienArgentinien Argentinien 13.121.380 20 Flag of Vietnam.svg Vietnam 4.381.800
9 SidafrikaSidafrika Sidafrika 12.050.000 ...
10 UkraineUkraine Ukraine 10.486.300 30 OstareichÖstareich Östareich 1.890.503
11 KanadaKanada Kanada 9.561.200 72 SchweizSchweiz Schweiz 174.035
12 RumänienRumänien Rumänien 7.973.258 Wäid 817.110.509

*) Schätzwert FAO

Zammasetzung im Vagleich[VE | Weakln]

Amaranth Woazn Reis Gugaruz Eadäpfen
Bstondtei (per 100g) Menge Betrog Betrog Betrog Betrog
Wossa (g) 11 11 12 76 82
Energie (kJ) 1554 1506 1527 360 288
Protein (g) 14 23 7 3 1.7
Fett (g) 7 10 1 1 0.1
Kohlenhydrat (g) 65 52 79 19 16
Ballaststoff (g) 7 13 1 3 2.4
Zucka (g) 1.7 0.1 >0.1 3 1.2
Eisn (mg) 7.6 6.3 0.8 0.5 0.5
Mangan (mg) 3.4 13.3 1.1 0.2 0.1
Kalzium (mg) 159 39 28 2 9
Magnesium (mg) 248 239 25 37 21
Phosphor (mg) 557 842 115 89 62
Potoschn (mg) 508 892 115 270 407
Zink (mg) 2.9 12.3 1.1 0.5 0.3
Panthothesaire (mg) 1.5 0.1 1.0 0.7 0.3
Vitamin B6 (mg) 0.6 1.3 0.2 0.1 0.2
Folsaire (µg) 82 281 8 42 18
Thiamin (mg) 0.1 1.9 0.1 0.2 0.1
Riboflavin (mg) 0.2 0.5 >0.1 0.1 >0.1
Niacin (mg) 0.9 6.8 1.6 1.8 1.1

Kunst, Kuitua, Religion[VE | Weakln]

Goidana Gugaruz. Moche Kuitur 300 n.Chr., Larco Museum, Lima, Peru
Wossaturm z Rochester, Minnesota - ogmoit wiara Maiskoibm
Centeotl, da aztekische Maisgod

Ois bedeitende Kuiturpflanzn spuit Gugaruz seit prähistorischa Zeit aa in da Kunst, Kuitua und Religion a wichtige Roin.

In da Moche-Kuitur in Peru san eppa um 300 n.Chr. goidane Maiskoibm nochweisli gfeatigt worn.

De middlamerikanischn Indiana (z.B. de Azteken) hom an Hauffa Maisgetta vaehrt. Da Mais wor ba eana aa a Symboi fia de Sun, fia de Wäid und fian Menschn. Im Buach Popol-Vuh wead gschriebm, dass da "dritte Mensch" aus Mais gschoffa worn is.

In Amerika is Mais heit a Symboi fia landwirtschoftliche Produktivität und Kuitua. Da Wossaturm z Rochester is dafia genau so a Beispui wia da Corn Palace z Mitchell in Sid-Dakota oda a boa Sain im Capitol z Washington.

Beleg[VE | Weakln]

  1. Wiktionary on kukuruz
  2. Wörterbuch der donauschwäbischen Lebensformen
  3. etymonline.com on maize
  4. FAO, Faostat Statistik vo da FAO 2009, afgruafa am 1. Oktoba 2010

Literadua[VE | Weakln]

  • Mais. Geschichte und Nutzung einer Kulturpflanze, hrg. von Daniela Ingruber und Martina Kaller-Dietrich, Frankfurt am Main: Brandes & Apsel, 2001.
  • J.P. Gay: Maïs, mythe et réalité, Atlantica, 1999, ISBN 2-84394-128-8}.
  • Maryse Carraretto: Histoires de maïs, d’une divinité amérindienne à ses avatars transgéniques,CTHS, 2005, ISBN 2-7355-0577-4.

Im Netz[VE | Weakln]

 Commons: Gugaruz – Oibum mit Buidl, Videos und Audiodateien
Des is a beriga Artike.
Dea Artike is ois berig in de Hall of Fame (Ruhmeshoin) aufgnumma worn.