Wiesn

Aus Wikipedia
Wexln zua: Navigation, Suach
Der Artikl is im Dialekt Obaboarisch gschrim worn.
Wiesn 2007
Pferdegspann vo da Hacker-Pschorr-Brauerei
Masskriagln, Wiesn 2006
Olympia Looping ba da Nocht

De Wiesn (s Oktoberfest) is a riesigs Voiksfest, des wo jeds Joar z Minga stodfindt. De Wiesn is as gresste Voiksfest vo da Wejd. Obwoi de Wiesn si imma mehra vo ihre Wuazln entfernt, is trotzdem no vui Traditionäis z findn. Außadem iss wos, wos ja jeda auf da ganzn Wejd mit Bayern vabindt.

Kenna duat ma vo da Wiesn aa an Ausruaf "Ozapft is!", wos mid dem Ozapfn vom erstn Fassl Bia duachn Obaburgamoasta vo Minga den Ofang vo da Wiesn markiat.

Es fongt an am Samsda o, dauat zwoa Wocha und heat am easchtn Sunndog im Oktoba auf. Seit 2000 is so greglt: Foit da easte Sunndog im Oktoba afn 1. oda 2. Oktoba, dauat de Wiesn bis zan Dog vo da Deitschn Oaheit (3. Oktoba). So dauat de Wiesn mindastns 16, owa hechstns 18 Dog.

Gschicht[VE | Weakln]

Wia ois ogfangt hod[VE | Weakln]

Oktoberfestln woan friaha in Bayern koa Sejtnheit. Se hom dazua deant, as einglogate Märznbier vorm Ofang vo da neien Brausaison afzbraucha.

De Wuazln vom heitign Mingara Oktoberfest gengan 200 Joar zrugg. Zan easchnt Moi hods am 17. Oktober 1810 stoddgfundn. Am 12. Oktoba 1810 hod bei da Hozadfeia vom Kronprinz Ludwig (spoda Ludwig I.) und Prinzessin Therese auf ana Wiesn voa dena Stodmauan vo Minga a groß Pferdlrenna stoddgfunden. Seitdem hoasst des Glanda Theresienwiesn. Davo kimmt a da boarische Nama Wiesn fias Oktoberfest.

Wei si da Kronprinz Ludwig scho stoak fias antike Griachaland interessiad hod, hod a dena Untadana voagschlogn, as Fest nochm Voabuid vo de antikn Olympischen Spui auszdrogn. Sei Voaschlog is begeistad afgnumma woan und so hod as Oktobafest in de easchtn Joar voa oim an sportlichn Charakta ghobt. As Pferdlrennen woa da Kernpunkt vo dera Tradition.

Wias weidaganga is[VE | Weakln]

19. Joarhundat[VE | Weakln]

Im Joar 1813 is as Fest ausgfoin, zweng de napoleonischn Kriag. Nacha is de Wiesn owa vo Joar zu Joar gwochsn. Zur Pferderennboh san Klettabaama, Keglbohna und Schaukln dazua kema. 1818 is as easchte Ringlspui afgstejt woan. Mearane Losständ ham ärmere Leit ogzogn, wei ma Porzlan, Suiba und Schmugg gwinna hod kena. Ob 1819 hom de Mingara Stodvoddan de Festleitung iwanumma. Seitdem is as Oktobafest planmäßi jeds Joar gfeiad woan.

Gegn s End vom 19. Joarhundat hod si de Wiesn imma mea zan Voiksfest entwicket, so wias heit in da gonzn Wäid bekonnt is. Es is zeitli valengat worn und zweng an Oidweibasumma moast in de scheenan und worman letztn Septembadog vorvalegt worn. Vo 1880 o hod de Stodvawoitung an Biavakauf gnehmigt und 1881 hod de easchte Hendlbrodarei afgmochd. Damit mea Bsuacha sitzn ham kena, san de Brauarein dazua iwaganga de Biabudn duach grosse Biahoin (Zejt) z easetzn. Gleizeiti san imma mea Schausteja und Karussellbesitza dazuakema.

20. Joarhundat[VE | Weakln]

1910 hod de Wiesn ian 100. Gebuatsdog gfeiat und es san 12.000 Hektolita Bia ausgschenkt worn. In da Bräurosl, am domois gresstn Biazäid, ham scho 12.000 Leidln Plotz ghobt. Heit fosst de gresste Festhoin na 10.000 Bsuacha.

Statistik[VE | Weakln]

Termine[VE | Weakln]

Zwengan of koidn Wedda im Oktoba fongt de Wiesn seit 1872 schon im Septemba o. Eaeffnet weads jeweis am Samsda nochm 15. Septemba, s End vom Fest is traditionäi da easchte Sunndog im Oktoba. Seit 2000 guit foigande Regl: Is da 1. oda 2. Oktoba a Sunndog, weads Fest bis zan Dog vo da Deitschn Oaheit am 3. Oktoba valengat. Damit dauats Fest mindastens 16 und hextns 18 Dog.

Termine fia d Wiesn
Joar Termin Bsundaheiten Ozoi vo de Bsuacha[1]
2000 16. Sep. bis 3. Okt. Kloane Wiesn mit ZLF*, sowia zwoa Dog lenga 18 Dog 6,9 Mio.
2001 22. Sep. bis 7. Okt. 5,5 Mio.
2002 21. Sep. bis 6. Okt. 5,9 Mio.
2003 20. Sep. bis 5. Okt. 6,3 Mio.
2004 18. Sep. bis 3. Okt. Mit ZLF* 5,9 Mio.
2005 17. Sep. bis 3. Okt. Grosse Wiesn, a Dog lenga wg. Feiadog 3. Oktoba (Mondog) 6,1 Mio.
2006 16. Sep. bis 3. Okt. Grosse Wiesn, zwoa Dog lenga wg. Feiadog 3. Oktoba (Deansdog) 18 Dog 6,5 Mio.
2007 22. Sep. bis 7. Okt. 6,2 Mio.
2008 20. Sep. bis 5. Okt. 175. Oktoberfest; Mit ZLF* 6,0 Mio.
2009 19. Sep. bis 4. Okt. 5,7 Mio.
2010 18. Sep. bis 4. Okt. 200 Joar Oktoberfest 6,4 Mio.
2011 17. Sep. bis 3. Okt. mit Oider Wiesn (friaa historische Wiesn). ; a Dog länga wg. Feierdog 3. Oktoba (Mondog) = 17 Tage 6,9 Mio.
2012 22. Sep. bis 7. Okt. ohne Historische Wiesn; dafia mit ZLF* (125. ZLF) 6,4 Mio
2013 21. Sep. bis 6. Okt. mit Oider Wiesn (friaa historische Wiesn)

* Bayerisches Zentral-Landwirtschaftsfest'

Nochfoiga[VE | Weakln]

Wäidweit san nochm Vorbuid vo da Mingara Wiesn Voiksfestln entstandn. Za de gresstn zejn s Oktoberfest z Kitchener in Kanada mit eppa 700.000 Bsuacha und s Oktoberfest z Blumenau in Brasilien mit eppa 600.000 Bsuacha.

Aa in Deitschland und Estareich gibts Nochahma vo da Wiesn. S gresste is s Oktoberfest z Hannover, wo mit eppa oana Million Bsuacha aa s zwoatgresste vo da Wäid is.

Beleg[VE | Weakln]

  1. vgl. z. B. Die Wiesn in Zahlen – Besucherzahlen des Oktoberfestes seit 1980, oktoberfest.de.

Literadua[VE | Weakln]

  • Maria von Welser (Text) & Wolfgang Rattay (Fotos): Münchner Oktoberfest. Bummel-Verlag, Minga 1982, ISBN 3-88781-004-X
  • Landeshauptstadt München (Hrsg.): 175 Jahre Oktoberfest. 1810–1985. Zusammengestellt von Richard Bauer & Fritz Fenzl. Bruckmann, Minga 1985, ISBN 3-7654-2027-1
  • Reiner Stolte: Die Geschichte vom Münchner Oktoberfest – The History of the Munich Oktoberfest. Herbert-Utz-Verlag, Minga 2004, ISBN 3-8316-1168-8 (Comic)
  • Brigitte Veiz: Das Oktoberfest, Masse, Rausch und Ritual. Sozialpsychologische Betrachtungen eines Phänomens. Psychosozial-Verlag 2006, ISBN 3-89806-484-0
  • Thomas Landwehrlen: L'Oktoberfest de Munich: portée sociale et politique. Monographie socio-anthropologique. L'Harmattan, Paris 2009, ISBN 978-2-296-10169-2
  • Ulrich Chaussy: Oktoberfest. Ein Attentat. Luchterhand, Darmstadt/Neuwied 1985, ISBN 3-472-88022-8
  • Florian Nagy u.a.: Oktoberfest. Zwischen Tradition und Moderne. München Verlag, Minga 2007, ISBN 978-3-937090-20-7.

Im Netz[VE | Weakln]

 Commons: Oktoberfest – Oibum mit Buidl, Videos und Audiodateien

48.132511.549166666667Koordinaten: 48° 7′ 57″ N, 11° 32′ 57″ O