Vakeah in da Stod Soizburg

De Stod Soizburg is af da an Seitn a wichtiga Vakeahsknotnpunkt in Östareich (zwoatgreßta östareichischa Flughofn, Haptbohhof ois Knotnpunkt, Autobohnan), af da ondan Seitn gibts durch seî Log - bsondas durch de vüin Berng und Hügü mittn im Stodgebied - afoch a Blotzproblem im innastädtischn Vakea. S'Stroßnnetz is kapazitätsmäßig am End, bsondas zu de Stoßzeitn und zu de touristischn stärkan Zeitn (oiso eh fost s'gonze Joa long, owa gonz bsondas im Advent und zu de Festspüle im Juli und August). Da effntliche Nohvakea is gleichzeiti nu ned a so ausbaud, wia des d'Stdd brauchn dad. S'Vakeasproblem wird a imma donn schlimma, wonns rengt (oiso bsondas im Somma oft), wei donn ana vo de wichtigstn Nohvakeaträga, s'Fohrradl, ziemli ausfoid.

Feanvakeah

In Soizburg gibts in zweitwichtigstn Flughofn vo Östareich, und der nennd si W. A. Mozart Aiport. Im Moment stehd a bei uma 1,9 Müllionan Fluggäst im Joa, owa de wern oiwei mehr, wei vor oim im Winta oiwei mehr Touristn min Fliega zum Schifoan kumman. Linienflüge gibts noch Linz, Wean, Zürich, Frankfurt, Köln, Düssldorf, Leipzig, Berlin, Hannova, Hamburg, London, Coventry, Manchester, Dublin, Mallorca, Las Palmas, Teneriffa und Monastir; dazua kumman saisonal a Haufn Charterflüge.

Durch Soizburg gehd d'Westboh, durch des is da Soizburga Haptbohhof ana vo de wichtigstn Bohhef in Östareich und a Knotnpunkt mid Feanvakeah Richtung Noadwestn (Minga/Hamburg/Paris), Siidwestn (Innschprugg/Zürich), Nordostn (Linz/Wean/Budapest), Siidostn (Graz) und Sidn (Villoch/Laiboch/Zagreb/Venedig). In Soizburg hoitn a ICEs.

An Autobohknotn gibts a in Soizburg, und zwor gengan do de östareichischn Autobohna A1 (Westautoboh, Richtung Wean) und A10 (Dauanautoboh, Richtung Villoch) genauso weg ois wia de deitsche A8 (Soizburga Autoboh, Richtung Minga). D'A1 (im Nordn und Westn) und d'A10 (im Südn) büidn midanond so an hoibaden Ring rund umd Stod und wern a oft firn Vakea innahoib vo da Stod hergnumma, wos a öftas amoi zu an Stau fihrt, bsundas af da A1. Autobohobfohrtn, wos ind Stod gehd, san (im Uhrzagasinn vo Südn): Puch/Urstein und Soizburg Süd (af da A10), Soizburg West, Soizburg Flughofn, Soizburg Sieznheim, Soizburg Klessheim, Soizburg Mitte, Soizburg Messegelände, Soizburg Hagenau (in Planung), Soizburg Nord und Wollasee (olle af da A1).

A Zug vo da S-Boh in da Hoitstöi Soizburg Sam

effntlicha Nohvakeah

De Haptstreckn vo da Eisnbau, de wos vo Soizburg weggagengan, wern a firn Regionalvakeah hergnumma, damit de vüin Pendla ind Stod kumma kinnan. Außadem gibts nu a bor Nemstreckn, de wos firn Soizburga Nohvakeah wichtig sand: Soizburg-Freilassing-Berchtsgon, Soizburg-Freilassing-Müidorf, Soizburg-Bürmoos-Lomprechtshausn, Soizburg-Bürmoos-Trimmükom und Soizburg-Steindorf-Braunau.

S'wichtigste Nohvakeahsmittl im Soizburga Zentralraum is heidzdogs d'S-Boh, de wos a firn Vakeah innahoib vo da Stod longsom wichtiga wird. Im Moment orwatns grod am Westost, der wos noch Freilassing ummi gehd. Do danns grod d'Soizachbruckn vabreatan und neiche Hoitstöin in Müin und Aigühof baun. Ois Ergänzung zur S-Boh gibts fird Umgewung vo da Stod a recht a guad ausbauds Netz vo Regionalbusse.

In da Stod söim hod seidn Joa 1940 da Stodbus d'wichtigste Roin, und es gibt ans vo de gresstn O-Bus-Netze vo Europa. Wos O-Bus-System ned hîkummt und af Streckn, de wos a weng weida außegengan aus da Stod (zum Beispüi noch Wois oda noch Freilassing), dortn gibts normale Autobuslinien vo da Firma Albus. S'Netz is insgesomt vor oim sternfermig, desweng gibts in de Rondgebiete oft amoi gressane Luckan, owa es wird vo Joar zu Joar a bissl vabessad.

D'effntlichn Vakeahsmittl hom im Soizburga Vakeahsvabund a gemeinsoms Tarifsystem und san vo de Zeitn und Intavalle her afanonda ogstimmt. Fir Besucha, de wos ind Stod Soizburg kumman, gibts am Stodrond, vo de Autobohauffohrten Soizburg Süd und Soizburg Messegelände her, zwa Park-and-Ride-Onlong. Vo dortn kummt ma donn recht schnöi ins Zentrum mid de Öffis. Wer unbedingt min Auto einifohrn wüi oda muaß, wird dageng Probleme griang, wei sehr oft Staus san in da Innenstod, und Parkplätze findt ma sowieso meistns kane.

Min Ra'l und z'Fuaß

A bsundas wichtige Roin im Stodvakeah spüid in Soizburg s'Fohrra'l. Üwa 20 Prozent vo olle Wege leng d'Soizburga min Ra'l zruck, damid liengans an da Spitzn vo de östareichischn Londeshaptstädt. Seidn Joa 1991 gibts a eigene Ra'lvakeaskoordinazion in da Stodvawoitung. Des wichtigste Projekt, wos de bis jetz vawirklicht hom, is de "Ra'lautoboh" entlong vo da Soizach, wos af beide Ufa üwa de gonze Läng vo da Soizach in da Stod Ra'l- und Fuaßwege gibt, mid Ra'luntaführungen unta de Bruckn und ra'ltaugliche Stege (außa da Mozartsteg, do derf ma nur schiam) ois Vabindung.

Damid ma in effntlichn Vakeah und s'Ra'lfohrn bessa midanond vabindn kau, gibts a Fohrra'ln zum Ausleichn und gsichade Ra'lgaragen am Hauptbohhof und am Bohhof Itzling; am Hanuschblotz is a nu ane plant. Z'Fuaß hod ma in Soizburg in da Innenstod a ka Problem, wei ois recht eng beinonda is; da Großdeu vo da Oidstod und a gleanana Deu vo da Neistod sand außadem eh Fuaßgängazone.

Bruckn

Da siacht ma, vor da Silhouettn vo da Oidstod, d'gschwungane Form vom Makartsteg.

Longe zeid wor a Hoizbruckn an da Stöi vo da heiding Stoodsbruckn d'anzige Vabindung zwischn da Oidstod am linken Ufa vo da Soizach und da Neistod am rechtn. Inzwischn gibts (flussobwärts, oiso vo Sidn noch Nordn g'ordnet) de foigenden Bruckn und Steg:

• D'Höibrunna Bruckn zwischn da Oipnsiedlung und Öisbethn-Glosnboch is a wichtige Vabindung fir Pendla.
• Da Üwafuhrsteg vabindt seid 1980 d'Josefiau mid Aing.
• D'Nonndola Bruckn zwischn am Justizgebäude und im Aißan Sta is ane vo de wichtigstn Bruckn.
• Da Mozartsteg (benonnt nochn Mozart Woifal) hod seid 1903 an hoizan Belog.
• D'Stoodsbruckn is genau im Zentrum vo da Stod und vabindt d'Oidstod min Platzl. Doda wor oiwei scho d'Hauptbruckn oda a Stodbruckn, meistns a Hoizkonschtrukzion mid Doch; 1877 homs as easchte Moi a Eisnbruckn hîgstöid, seid 1949 iss in da heiding Form in Betrieb.
• Da Makartsteg (benonnt nochm Makart Hons) fihrt vom Hanuschblotz zum Makartblotz. Gem duads eam seid 1905, seid 2001 hod a a gschwungane Form.
• Da Müina Steg, friara Fronz-Corl-Gehbruckn, vabindt Müin mid da Neistod.
• D'Eisnbohbruckn wird grod dreigleisig ausbaud, damid d'S-Boh mehr Blotz hod; dann wern a Fuaßgänga an Blotz hom.
• D'Lehna Bruckn zwischn Lehn und da Elisabeth-Vorstod, friara Erzherzog-Ludwig-Viktor-Bruckn, is ane vo de Hauptvabindungen und hod vier Fohrspurn.
• In Pioniersteg gibts seid 1977, er is a zwischn Lehn (Lehna Bark) und da Elisabeth-Vorstod.
• Da Traklsteg (benonnt nochm Trakl Schorsch) gehd vom Glanspitz noch Itzling ummi.
• D'Autobohbruckn vo da A1 is gonz im Norn und spüid owa a firn Stodvakeah a wichtige Roin. 1959 iss bei an Hochwossa amoi eîgstirzt. Unta da Fohrboh gibts dortn a an Fuaßgängasteg.