Soizbuag

Aus Wikipedia
(Weidagloadt vo Soizburg)
Der Artiké do is néd in am oahheitlichen Dialekt sóndern in merane vaschiadane Dialektt gschrim worn.
Autorn wern désswéeng beten, dé unterschiadlichan Teile åhzbassen. Dångschen!
Såizburg
Bild
Wobben Ésterreich-Korten
Wappen von Såizburg
Soizbuag (Österreich)
Soizbuag (Österreich)
Soizbuag
Basisdaten
Stoot: Ésterreich
Bundeslånd: Salzburg
Pólitischer Bezirk: Salzburg
Kfz-Kénnzaachen: S
Flechen: 65,64 km²
Koordinaten: 47° 48′ N, 13° 2′ OKoordinaten: 47° 48′ 0″ N, 13° 2′ 0″ O
Heechen: 424 m ü. A.
Eihwóner: 156.619 (1. Jen. 2023)
Póstlaatzoin: 5020, 5023, 5026, 5061, 5071, 5081, 5082
Vurwoi: 0662
Gmaandkénnziffer: 5 01 01
Adress voh da
Gmaand­vawoitung:
Mirabellplatz 4
5020 Salzburg
Nétzseiten: www.stadt-salzburg.at
Politik
Burgermaaster: Preuner Harald (ÖVP)
Gmaandrot: (Wahljahr: 2014)
(40[1] Midgliader)
15
8
6
5
5
1
15 
Insgesamt 40 Sitze
Die Altstadt von Soizburg bei Nocht
Die Altstadt von Soizburg bei Nocht
Quelle: Gmaanddaten bei da Statistik Austria

Såizburg (óda ôafoch Ståd, Hochdeitsch: Salzburg) is de Hauptståd vo dem östareichischn Bundeslånd, wås à Såizburg hàßt. Gemeinsåm mid'n Bezirk Såizburg-Umgéwung is's da Flåchgau, da nördlichste vo de fünf Gaue vom Lånd Såizburg. In da Ståd Såizburg wohnan ungefähr 150.000 Leid (Stånd vo 2006); damid is s'de viertgresste Ståd vo Östareich (nåch Wean, Gràz und Linz). In da gånzn Stådregion (Agglomarazion) sand's zirka 210.000 Leid.

Såizburg håd a Einzugsgebiet, wås üwa de Grenzn vom Bundeslånd auße geht. Da Südostn vo Bayern, da Südwestn vo Owaöstareich und da Nordwestn vo da Owasteiamårk ghern då à dazua. Såizburg is a Uniståd (drei Unis) und des Zentrum (Owazentrum, sågn de Raumplàna) vo da Euregio Såizburg - Berchtsgåna Lånd - Draûstâ.

Vüi Leid sågn "Mozartståd" zu Såizburg, wei dort da Mozart Wolfgang Amadeus af d'Wöid kumma is und mehr åis wia d'Höiftn vo sein Lém då vabråcht håd. Såizburg is à d'öidaste Ståd im heiding Östareich; seid Ãfång vom 12. Jåhrhundat håds an Stådrichta gém. D'Såizburga Åidståd mid ihra berühmtn barockn Archidektur, de wås an italienische Stéd erinnad, is àne vo de am béstn erhåitanen Åidstéd im deitschpråching Raum und seid 1997 Wöidkuiturerbe. Intanazionàl bekånnt is's à åis Schaublåtz vo dem Musical und Füim Sound of Music, wéng de Såizburga Féstspüle und wéng da Låg am Rånd vo de Åipm.

Geografie[Werkeln | Am Gwëntext werkeln]

Klimadiagramm vo Soizburg
Stodpanorama vom Mönksberg owi
Da Soizburga Dom
D'Festung Hohnsoizburg
Da Gaisberg vom Leopoidskrona Weiha aus gseng
D'Erhardkirchn und da Stodeu Nonntoi vom Festungsberg owa fotografierd
Do siacht ma vom Miraböigortn af d'Festung auffi.

Soizburg liegt am Nordrond vo de Oipm, uma 150 Kilometa estlich vo Minga und 300 Kilometa westlich vo Wean. D'Stod is im Soizburga Beckn, uma 25 Kilometa neadlich vom Tennangebirg, auf olle zwa Seitn vo da Soizach. De Soizach und de Stodberng midn Woid drauf mochn vüi vo dem aus, wia Soizburg ausschaud; Soizburg is nämli ane vo de greoastn Großsted in Europa. De Stodberng sand da Kapuzinaberg, da Mönksberg, da Festungsberg und da Rheinberg. Af'm Festungsberg is de Festung drauf, des is de gresste mittloitaliche Burg vo Europa, de wos nu ois a gonza dahoitn is. Außadem gibts im Stodgebied nu in Morzga Hügü, in Höibrunna Berg und in Grofnhügü in Liefaring.

Im Siidwestn vo da Stod, wos noch Berchtsgoan umme geht, is da Untasberg (1.853 Meta hoch), üwa den se de Soizburga a vüi Sogn vazöhn. Im Ostn an da Stodgrenz is da Gaisberg (1.288 Meta), und weida im Ostn sands netta a bor Kilometa bis ins Soizkaumaguad. Noch Noadn is es Soizburga Beckn offn, do sand donn de Soizachauen und de glan Hügün vom Flochgau. Da nächste vo de Hügün bei da Stod is da Plainberg, do is de Woifohrtskirchn Maria Plain om drauf, und vo dort oman siacht ma guad af d'Stod owe. Direkt im Nordwestn vo da Stod is de Soloch, de wos a de Grenz is zur Nochbastod Freilassing, und de ghert scho zu Bayern, genaua gsogt zum Londkroas Berchtsgoana Land.

Stodteie[Werkeln | Am Gwëntext werkeln]

D' Stod gliedat si unobhängig vo d' historischn Katastralgemeindn, vo denan d' Grenzn in de meistn Föin ned mehr dakennbor san, in 24 Stodtei und drei ongrenznde Londschoftsräume.

Den historischn Kern vo da Stod Soizburg büidet d' Oidstod, de si on d' oidn, bis ins Middloita zruckreichndn Vursted Müin und Nonntoi oschliasst. Vor und noch 1900 is im Westn vo da Oidstod da Stodtei Riednburg entstondn. Auf'm Gebiet vo d' obgrissanen rechtsufring Bastionen und de durting Kasernen, hod si as Andrävierdl büidt. Nördlich dovo, vor 'm nein Hauptbohnhof, is da Stodtei Elisabeth-Vuastod (Froschhoam) entstondn. Im Nordteil vo Müin is da Stodtei Lehn gwochsn.

D' Stodtei Aing, Parsch, Itzling und Gneis hom se im Wesntlichn noch 1900 entwücket. A spädare Erweitarung vo da Stod stöid da Siedlungsstreifn vo da Moosstrossn in Leopoidskron-Moos dor. D' einsting söibständing Vororte Maxgloan im Westn, Liefaring im Nordwestn, Gnige im Ostn und Morzg san in da Zwischnkriagszeid zua Stod kumman. Noch 1950 san ois jingste Siedlungskerne vo da Stod de Teile Josefiau, Herrnau und d' Oipnsiedlung entstondn. A d' Stodteie Laungwied, Kasan, Daxhom und Schoimoos san in da Mittn vom 20. Joarhundat entstondn. Isoliert liegt im Noadn ois jingara Siedlungssplitta da Stodtei Itzling-Nord, der si nohtlos on an Siedlungsraum vo da Gemeinde Berghoam oschliasst. Südlich vo Gneis lieng d' emfois jungen kloanen Siedlungen Eichethofsiedlung und d' Birknsiedlung. Beide san untam Nomen „Gneis-Süd“ zsommgfosst. Südlich vom Flughofn befindt si da Stodtei Maxgloan-West, zua dem d' Kendlasiedlung und d' kloanaren Haisagruppn Pointing und Loig ghern. D' Kendlasiedlung setzt si in de scho zur Gemeinde Wois-Siaznham gherendn Haisan vo da Gloansiedlung fort. D' Haisagruppn Pointing und Loig schliassn si ons Woisa Hümmereich on. Aussahoib vo de Siedlungsraime lieng im Stodgebiet vo Soizburg d' gschlossenen Londschoftsraime Höibrunn, Goasberg und da Haiberg.[2]

Katastralgmoana[Werkeln | Am Gwëntext werkeln]

Soizburg is in 14 Katastralgmoana aufteit:

  • Aing I
  • Berghoam II
  • Gnige
  • Goasberg I
  • Haiberg I
  • Hoiwong II
  • Itzling
  • Leopoidskron
  • Liefaring II
  • Maxgloan
  • Morzg
  • Soizburg
  • Siaznhoam II
  • Wois II

Da Nom vo d Stodteie ois funkzionelle Einheit entspricht in da Grenzziahung dena gleichnoming Katastralgmoana, vo dana d Grenzn grossteis im friaan 19. Joarhundat festglegt worn san. D' Bezeichnung Aing I sogt, dass d einstige Gmoa Aing zum gresstn Tei in d Stod Soizburg eingmoandt worn is. Da vabliebne kloanare Tei is in d Joar 1935 und 1939 unta da Bezeichnung Aing II ois eigne Katastralgmoa da Nochbagmoa Öisbethn zuateit worn.[2]

Nochbagmoana[Werkeln | Am Gwëntext werkeln]

Freilassing Berghoam Hoiwaung
Wois-Siaznhoam Koppe
Grödig Anif Öisbethn

Eiigmeindungen im 20. Joarhundat[Werkeln | Am Gwëntext werkeln]

Am 7. Juni 1935 hod da Soizburga Launddog s'Gsetz üwa d'Erweitarung vom Gebied vo da Londeshauptstod bschlossn. In Kroft dre'n is des scho am 1. Juli vom gleichn Joar. Damid san de Gmeindn Maxgloan und Gnigü-Itzling fost ois a Gonza und Deile vo Aing, Morzg, Sieznheim, Leopoidskron, Bergheim und Hoiwong zur Stod dazuakumma. D'Augstöidn und de Grundstückün vo de Gemeindn Maxgloan und Gnigü-Itzling hod d'Stod üwanumma, owa a eanare Schuidn, und des wor fir de zwa ormen Orwatagemeindn a de oazige Möglichkeid, dass s'ned finanziell zsommbrochn san. Durch de Eigmeindungen is domois d'Eihwohnazoi vo Soizburg vo 40.232 af 63.275 Leit gstieng und d'Flächn vo 8,79 af 24,9 Quadratkilometa.

A zweite Phase vo Eigmeindungen wor donn am 1. Jenna 1939. Do san Aing, Liefaring, Leopoidskron und Morzg ois a Gonza und Deile vo Anif (nämli Höibrunn), Bergheim, Hoiwong und Wois zum Stodgebied dazuakumma. In da Stod hom dadurch 77.170 Leit gwohnd. Im Joar 1950 hods an Dausch gem, do is des Gebied vom Schlochthof, wos vorher zu Bergheim ghead hod, zur Stod kumma und dafir da Plainberg, der wos owa vüi gressa is, zruck zu Bergheim. Seitdem hod si nix mehr g'ändat und s'Stodgebied is 65,67 Quadratkilometa groß.

Olle zwa Eigmeindungen hom oiso unta autoritäre Regime stodgfundn. Trotzdem worn s'guad begründet - noch 1945 hod kana an Eispruch dageng eiglegt. Erscht im Joar 1990 hod si d'Gemeinde Anif beschwead, dass da Schlosspark vo Höibrunn zur Stod kumma is. Owa nochdem der eh scho seid 1920 im Eingdum vo da Stod wor und sunst da Komplex vo Höibrunn gemeindemäßig deud worn war, is de Zruckfordarung oglehnt worn.

De Gemeindn Wois-Sieznheim und Bergheim im "Speckgirtl" vo Soizburg ghern zwar infraschtrukturmäßi scho long zum Stodgebied, und de Raumordna fordern a, daß s'eigmeindt wern, des hod owa nu kana politisch durchsetzn kinna bis jetz. Dadurch gibts im Bollungsraum oiwei gressane Probleme: Af da an Seitn gibts oiwei wenicha freie Baugrundstickün und af da ondan Seitn gengan imma mehr Gewerbebetriewe in d'Umlondgemeindn (oda nu weida weg), wei Grundstickü zan Ausbaun in da Stod z'deia worn san. Dadurch nimmt d'Stod wenicha Steian ei, und s'Ungleichgwicht zwischn de Finanzprobleme vo da Stod und de reichn Speckgirtlgmeindn im Umlond wead oiwei ärga. Außa Wois und Bergheim betrifft des a nu Anif, Öisbethn, Hoiwaung, Eugndorf, Grödig und Deile vo Koppü.

Euregio Soizburg - Berchtsgoana Laund - Draustaa[Werkeln | Am Gwëntext werkeln]

Soizburg is direkt an da boarischn Grenz, und desweng hängts zwecks Vakea und Wirdschoft eng mid'n boarischn Grenzgebiet zsomm, bsondas mid de Londkroas Berchtsgona Lond und Draustoa. Zum Beispüi gehd de schnöiste Stroßnvabindung vo da Stod Soizburg in Pinzgau üwa Bod Reichnhoi (de Streckn nennd ma a s'Glane Deitsche Eck). Wirdschoftli hängan bsondas de Sted Freilassing und Bod Reichnhoi mid Soizburg zsomm. Desweng gibts seid 1995 de Euregio Soizburg - Berchtsgona Lond - Draustoa. In dem Gebiet wohnan zsomm zirka 700.000 Leit.

Leit[Werkeln | Am Gwëntext werkeln]

Do siacht ma vo da Festung af'n Dom und af d'Oidstod.
Leit im heitign Stodgebiet
Joar Leit
1869 27.858
1880 33.241
1890 38.081
1900 48.945
1910 56.423
1923 60.026
1934 69.447
Joar Leit
1939 77.170
1951 102.927
1961 108.114
1971 129.919
1981 139.426
1991 143.978
2001 142.662

Weng de Eigmeindungen in de Dreißgajohr is domois de Bevöikarung vo Soizburg vo 40.000 Leit auf 77.000 auffigonga. An ziemichn Boom hods donn glei nochm Zweitn Wöidgriag gem, do homd de Amerikana gonze Siedlungen fir de GIs aus'm Bon gstompft, zum Beispüi de General-Keyes-Siedlung. Außadem hods an großn Austurm vo Flüchtlinge gem, vor oim vo Voiksdeitsche. De homd zeascht in Barackn gwohnd, sand owa in de neichn Siedlungen umzong, nochdem de Amerikana wegga worn. Seid uma 1950 is Soizburg a Großstod, weis üwa 100.000 Leit hod. Firs Joar 2007 liegt de Zoi vo de Eihwohna bei 150.269 Leit (mid Hauptwohnsitz).

Da Fraunonteu in Soizburg liegt bei 53 Prozent, da Onteu vo de Auslända is bei 21 Prozent und damid da hechste vo olle östareichischn Londeshauptsted. Vo da Oitasstruktur her san 13 Prozent vo de Soizburga unta 15 Joar oid, 63 Prozent san zwischen 15 und 60 Joar, und 24 Prozent san 60 Joar oid oda öida. Zu de 150.000 Leit mid Hauptwohnsitz kumman in Soizburg nu 17.000 Leit mid Nemwohnsitz dazua.[3]

Gschicht[Werkeln | Am Gwëntext werkeln]

Da Friedhof vom Klosta Saunkt Beda; des wor s'easchte Klosta üwahaupts nördli vo de Oipm.
Kortn vo Östareich-Ungarn (1867 bis 1918). S'Herzogdum Soizburg is Numma 10.

Mehr dazua findst im Hauptartikü: Gschicht vo da Stod Soizburg

Seid da friaran Jungstoazeid (umma 4500 vor Kristus) gibts in Soizburg scho Siedlungen. De Röma homd im Joar 15 vor Kristus des Gonze zu ana Stod gmocht. Iuvavum hom s'as gnennt. Nochdem de Doanagrenz vom Römischn Reich zsommbrochn wor, is d'Stod ziemli zgrundgonga. Noch da Vöikawaundarung hod Soizburg long zu de Bajuwarn und damit donn a zu Bayan ghead. Im Joar 699 is Soizburg Bischofssitz worn und wor am Aufong firs gonze boarische Herzogdum zuaständig. Im Joar 755 hom d'Leit zum easchtn Moi in Nomen Soizburg vawendt. Seid'n Joar 798 is Soizburg a Erzbistum.

Im Hochmittloita is Soizburg longsom unobhängi worn vo de Bayan. Im Joar 1328 is Soizburg a eigena Stood im Heulign Römischn Reich worn. In de Joar 1348 und 1349 sand uma a Drittl vo de Leit in Soizburg an da Pest gstorm. Im Baungriag hods 1525 an großn Aufstond vo de Baun und de Bergleit gengan Erzbischof gem. Der Aufstond hod drei Monad dauad, und de Baun homd sogor d'Stod eignumma und d'Festung belogad, owa es hod eana nix gnutzt.

S'17. Joarhundat wor prägt vo drei Erzbischef, unta denan Soizburg af da Hächn vo seina Mocht aukumma is: im Wolf Dietrich vo Raitenau, im Markus Sittikus Grof vo Hohnems und im Paris Grof vo Lodron. Domois is de berühmte Barockarchitektur entstondn, und a d'Soizburga Uni is gründt worn. Im Joar 1731 san olle Protestantn aus da Stod vadriem worn. Im Joar 1756 is da Mozart Wolfgang Amadeus in Soizburg af d'Wöid kumma. Am Aufong vom 19. Joarhundat hom s'as Heulige Römische Reich zuadrahd, und do sand de Erzbischef ois Herrscha vo Soizburg ogsetzt worn. Im Joar 1816 is Soizburg zu Östareich kumma. Am 29. Mai 1921 hom si d'Soizburga in ana Voiksobstimmung mid 99 Prozent fir'n Onschluss ans Deitsche Reich ausgsprochn[4]. Des is owa donn ned gmocht worn.

Im Joar 1938 san in Soizburg deitsche Druppn eimarschierd. Glei am Aufong vo da Nazidiktatur in Östareich hom s'af'm Residenzblotz Biacha vabrennt und vüi Judn und politische Gegna vooft. In Maxgloan hom s'a Konzentrazionsloga fir Zigeina eigricht, de wos donn ois Zwaungsorwata in Soizburga Industriebetriewe hackln miaßn hom[5]. 1944 und 1945 hom d'Amerikana 15 Moi Soizburg aus da Luft augriffn. Noch'm Zweitn Wöidgriag san a Riesnhaufn Leit ohne Hoamad ("Displaced Persons", DP), Judn und Voiksdeitsche noch Soizburg und in d'Umgewung kumma. D'Amerikana hom mid'n Marshallplan vüi Hüifsgöida noch Soizburg brocht und a mid eanare privatn Ausgom midghoifn, dass si d'Stod wirtschofdli schnöi erhoid hod.

Politik[Werkeln | Am Gwëntext werkeln]

S'Schloss Miraböi in da Neistod is da Sitz vom Buagamasta, vo da Stodregierung, vom Gemeinderod und vom Magistrat.
D'Engüsstiang im Schloss Miraböi
Da Schaden Heinz, Buagamasta vo Soizburg vo 1999 bis 2017
Da Preuner Harald, Buagamasta seid 2017

Buagamasta is seid Dezemba 2017 da Preuner Harald vo da ÖVP. Langjähriger Buagamasta vo da Stod Soizburg woar vo 1999 bis 2017 da Schaden Heinz vo da SPÖ.

Bis in de zweite Höiftn vom 20. Joarhundat wor d'Stod eha konsavativ prägt. Erscht im Joar 1914 is da easchte Sozialdemokrat in Gemeinderod kumma, da Preußler Robert wor des. Nochm Zweitn Wöidgriag hom de Amerikana in Hildmann Richard ois provisorischn Buagamasta wieda eigsetzt, der wos scho vo 1935 bis zum Aunschluss 1938, untam Schuschnigg-Regime, Buagamasta gwen is. Owa seitdem dominierd in da Stod Soizburg meistns d'SPÖ. Seid 1999 gibts a in Soizburg de Direktwoi vom Buagamasta.

A de Grünbewegung is in Soizburg vagleichsweis imma sehr stork. Am End vo de Siebzigajohr hod si a Bürgalistn geng d'Vabaung vom Grünlond im Siidn vo da Stod eigsetzt, und de san donn min Voggenhuber Johannes an da Spitzn glei af Onhieb in d'Stodregierung einikumma. Des wor de easchte politische grüne Gruppierung in Östareich. Bis heid nennan si de Grünen in da Stod Soizburg "Bürgalistn" und san in da Stodregierung.

Listn vo de Buagamasta noch'n Griag[Werkeln | Am Gwëntext werkeln]

Gemeinderodswoi vom 7. März 2004
ÖVP 17.250 27,4%
SPÖ 27.565 43,78%
FPÖ 6.448 10,24%
BL 9.508 15,1%
LIS 641 1,02%
D92 530 0,84%
KPÖ 1.019 1,62%
  • 1945–1946: Hildmann Richard (ÖVP)
  • 1946–1951: Neumayr Anton (SPÖ)
  • 1952–1957: Pacher Stanislaus (SPÖ)
  • 1957–1970: Bäck Alfred (SPÖ)
  • 1970–1980: Salfenauer Heinrich (SPÖ)
  • 1980–1990: Reschen Josef (SPÖ)
  • 1990–1992: Lettner Harald (SPÖ)
  • 1992–1999: Dechant Josef (ÖVP)
  • 1999–2017: Schaden Heinz (SPÖ)
  • 2017– : Preuner Harald (ÖVP)

Woppm[Werkeln | Am Gwëntext werkeln]

S'Soizburga Stodwoppm
S'Soizburga Stodwoppm

S'Woppm vo da Stod Soizburg is im rodn Föid a gezinnte Stodmaua, wo in da Mittn a Stodor mid offane Torflügü und an auffizongan Foigitta is, und drüwa a glana Turm mid zwa Fensta. De Seitndeile vo da Maua hom a jeda a Schiaßschortn. Hinta da Maua sand drei Tirm mid mehrane Steg, de wos olle drei mid an goidanen Spitzdoch deckt san. Da mittlare Turm is ochteckig und a weng hecha ois wia de ondan, und ma siachd drei Wänd davo. A jede vo de drei Wänd herd om mid an Güwü af, drunta is a Güwüfensta, drunta a oafochs Fensta und im untan Stog zwa Fensta. De zwa Tirm af da Seitn san rund; im owan Stog hom s'a jeda oa Fensta, im untan zwa. D'Mauan san süwa oda weiß.

Nem an Woppm hod d'Stod Soizburg a nu a Fahne in de Stodform - des sand Rod und Weiß.

Sochn, de wos ma si auschau soit[Werkeln | Am Gwëntext werkeln]

D'Soizburga Oidstod vom Mönksberg aus gseng
S'Schloss Höibrunn

Mehr dazua findst im Hauptartikü: Sengswiadigkeitn vo da Stod Soizburg

Soizburg is a sehr beliebts Züi fir Touristn vo da gonzn Wöid. An Spitzndoge hoidn si in da Stod weid mehr Touristn af ois wia Heimische. D'UNESCO, des is d'Organisazion fir Büidung, Wissnschoft und Kuitur vo de Vaeintn Nazionan, hod am 5. Dezemba 1996 de gonze Soizburga Oidstod (inklusive Linza Gossn, Bergstroßn, Neistod, im Aißan Stoa, im innan Nonndoi, im innan Müin, im Mönksberg und im Kapuzinaberg) auf d'Listn vom Wöidkuiturerbe afgnumma. D'Oidstod is, vor oim weng ihra Barockarchitektur mid de vüin Kirchn, ois a gonze oazigortig. De wichtigstn Architektn worn da Scamozzi Vincenzo und da Scolari Santino.

A bor vo de wichtigan Sengswiadigkeitn in da Oidstod:

  • S'Stift Saunkt Beda vo de Benediktina is as öidaste Klosta vom deitschsproching Raum, woss oiwei nu gibt.
  • D'Festung Hohnsoizburg is ane vo de gresstn Burgaunlaung in Europa insgesomt und de gresste, de nu voi dahoitn is.
  • A Highlight vo jeda Soizburg-Tour is a da Soizburga Dom Saunkt Rupert und Virgil. Da heidige Bau stommd aus de Joar zwischn 1611 und 1628 und wor de easchte Barockkirchn neadlich vo de Oipm.
  • Nu vüi mehr Touristn siagst owa in da Getreidegossn. Des wor scho long de wichtigste Stroßn vo de Soizburga Kaufleit; und außadem is in dera Stroßns Geburtshaisl vom Mozart Wolfgang Amadeus.
  • S'Museum vo da Moderne af'm Mönksberg schaud aus ois wia a weiße Schuachschochtl aus Marmor, und damid iss a ortnlicha Gengsotz zur Oidstod drunta.

A außahoib vo da Oidstod gibts a bor Attrakzionan:

  • Gonz im Siidn am Stodrond vo Soizburg is as Schloss Höibrunn mid de berühmtn Reneissance-Wossaspüle, an großn Park, an glan Bergal mid'n Monadsschlessl und an Stoatheata om drauf und im Soizburga Zoo. Vo da Oidstod bis zum Schloss Höibrunn gehd durch a Londschoftsschutzgebied d'Höibrunna Allee, de öidaste imma nu dahoitane Allee af da Wöid.
  • Zum Rokoko-Schloss Leopoidskron direkt am Leopoidskrona Weiha kumman oiwei vüi Touristn hi, weis ana vo de Hauptschauplätz in dem Füim Sound of Music wor, der wos Soizburg in da gonzn Wöid nu amoi mindestns so berühmt gmochd hod ois wia da Mozart.
  • In Hangar 7 am Flughofn mid seina onspruchsvoin modernan Glosarchidektur hod si da Mateschitz Dietrich (1943–2022), da Chef vo Red Bull, ois sei persönliche Schotzkomma mid an Haufn oide und neiche Flugzeig histöin lossn.

Kuitureiirichtungen[Werkeln | Am Gwëntext werkeln]

A Konzert im Großn Soi vom Mozarteum

Mehr dazua findst im Hauptartikü: Kuitureiirichtungen in da Stod Soizburg

D'wichtigste Kunstvaonstoitung in Soizburga san de Festspüle mid Konzerte, Opern und Theata, de wos jeds Joar im Juli und August vüi intanazionale Gäst auziang. Grindt worn san s'im Joar 1920 vom Reinhardt Max und vom Hugo vo Hofmannsthal. Dazua gibts seid 1967 ois Ergänzung de Ostafestspüle; de hod da Herbert vo Karajan gründt. Do wead jeds Joar a neiche Oper vorgstöid, und a bor Konzerte gibts a. Spüin dan d'Berlina Philharmonika. Seid 1973 gibts a nu Pfingstfestspüle. De gonzn Festspüle findn zum Großdeu in drei Haisa in da Oidstod stott, de wos ma a in Festspüibezirk nennd. Architekt wor da Holzmeister Clemens, der wos oide barocke Bautn midvawendt hod. Und zwar san des:

  • S'Große Festspüihaus
  • D'Föisnreitschui
  • S'Haus fir'n Mozart (friara Glans Festspüihaus)

Säle fir Theata und Konzerte gibts in da Stod uma a Dutznd. In da Touristnseison (oiso fost imma) gibts jen Dog klassische Konzerte, wo meistns Werke vom Mozart Wolfgang Amadeus gspüid wern. Owa a Vaonstoitungsorte fir moderne Musi gibts a bor.

Ins Museum kau ma a ausgiewig geh. Dabei gehd d'Palettn vo da Naturwissenschaft üwa d'Voikskuitur und d'oide Gschicht vo Soizburg bis hi zur modernen Kunst, zum Beispüi im Museum vo da Moderne am Mönksberg om.

Künstlarisch onspruchsvollare Füim und Retrospektivn komma si jen Dog im Füimkuiturzentrum DAS KINO auschaun. Jen Herbst gibts außadem a intanazionals Bergfüim-Festival. Außadem gibts in da Stod Soizburg nu drei normale Kinos, wo de Hollywood-Sochn rennan.

Glaum[Werkeln | Am Gwëntext werkeln]

Innenausicht vom Soizburga Dom

Mehr dazua findst im Hauptartikü: Glaum in da Stod Soizburg

Soizburg is prägt vo da katholischn Kirchn ois wia koa ondane östareichische Londeshaupstod ned. Des is desweng a so, weis in Soizburg bis am Aufong vom 19. Joarhundat, oiso bis zum End vom Soizburga Fürsterzbistum, koa Trennung gem hod zwischn da Kirchn und im Stood, wei jo d'Erzbischef gleichzeiti geistlichs Owahaupt und Stoodsowahaupt gwen san. Erscht in da zweitn Höiftn vom 20. Joarhundat, vor oim durch Griag, durch Vadreiwung und Eiwondarung, iss donn dazua kumma, daßs heidzdog mehr vaschiedene Glaumsrichtunga gibt in Soizburg.

De Katholikn san mid 56 Prozent vo de Stodbewohna oiwei nu de gressane Glaumsgruppn in Soizburg. Zur evangelischn Kirchn ghern uma siem Prozent vo de Stodinga. Fünf Prozent vo de Leit san orthodoxe Kristn. Siem Prozent sand Muslime, da Islam is damid de gresste Glaumsgemeinschoft außahoib vom Kristndum. 17 Prozent vo de Soizburga hom gor koa Religion, bei siem Prozent waß ma ned, wos de fir Glaumsbekenntnis hom.

Freizeid[Werkeln | Am Gwëntext werkeln]

D'Maunnschoft vo da Soizburga Austria beim Spüi geng d'1b vo Seekircha im Herbst 2006
Da Leopoidskrona Weiha mi'n Schloss Leopoidskron und da Festung im Hintagrund
D'originaln Soizburga Mozartkugün vo da Konditorei Fürst am Oi'n Morkt

Sport[Werkeln | Am Gwëntext werkeln]

S'Stadion fir d'Fuaßboi-Europamastaschoft 2008

Da öidaste reine Sportklub im Soizburga Lond is da Soizburga AK 1914 in Nonntoi. Owa es gibt nu a bor Turnvareine, de wos nu öida san: in Soizburga Turnvarein (1861), in Maxglana Turnvarein (1902) und in Amateur-Turn- und Sportvarein (ATSV) Soizburg (1912). In Orwata-Sportklub (ASK) Soizburg gibts seid 1922 in Maxgloan. Ois Orwatavarein wor a zwischn 1938 und 1945 aufglöst.

In Fuaßboivarein SV Austria Soizburg gibts seid 1933, er spüit tradizionell in Violett-Weiß und is da Varein mid de meistn Fans in da Stod, obwoi a grod eascht in d'zweitletzte Liga afgstieng is. Des kummt daher, wei da Varein midsomt Lizenz im Joar 2005 vo Red Bull kauft worn is und Form, Woppn und Nom vom Varein g'ändat worn san. Da FC Red Bull Soizburg sitzt heid im Vorort Wois-Sieznheim und spüid in da Bundesliga; in SV Austria Soizburg hom de violettn Fans neich gründt und damid in da letztn Spüiglass neich augfonga.

De Spüla vom EC Red Bull Soizburg in Akzion

A guada Eishockeyvarein is da EC Red Bull Soizburg (gründt 1977 ois Soizburga EC), der wos 2007 in östareichischen Mastatitl erreicht hod; de Damenmonnschoft, de Ravens Soizburg, san scho 2006 Meista worn. Beim American Football hom im Joar 1984 de Soizburg Lions in ollaeaschtn östareichischen Meistatitl ghoid; heid haßn s'Soizburg Bulls und spüin in da zweitn Liga.

Große Sportvaonstoitungen hods bis jetz in da Festspüistod weng gem. Im Joar 2005 wor as easchte Moi da Soizburg-Marathon, a Marathon der wos a durch d'Oidstod durchgehd. 2006 wor de Stroßn-Radlwöidmastaschoft in Soizburg und in da Umgewung mid mehr ois wia 330.000 Zuaschaua. Bei da Fuaßboi-Europamastaschoft 2008 wern draußn im Kleßheima Stadion (ghead zu Wois-Sieznheim) drei Gruppmspüle sei.

Firs Joar 2014 häd si Soizburg um d'Olympischn Wintaspüle beworm. De Entscheidung am 4. Juli 2007 beim IOC-Kongress in Guatemala City hom d'Soizburga owa geng Sotschi in Russlaund und Pyeongchang in Südkorea (zweita Blotz) in da easchtn Runde valorn. Soizburg wor a scho Candidate City fir Olympia 2010 und hod do a in da easchtn Runde geng Vancouver in Kanada und geng Pyeongchang (scho amoi zweita Blotz) valorn.

Seidn Joar 1999 is Soizburg da Sitz vo da Intanazionaln Biathlon-Union.

Laundschofts- und Naturschutz[Werkeln | Am Gwëntext werkeln]

In Soizburg gibts ois zsomm 41 Naturdenkmäla (meistns stottliche oide Einzlbam), 39 Gschützte Londschoftsdeule, ocht Londschoftsschutzgebiet und oa Naturschutzgebiet, nämli s'Hammaraua Moor. De ocht Londschoftsschutzgebiet sand:

  • da Plainberg (do ghead owa netta a gonz a glana Deu zur Stod Soizburg),
  • da Kapuzinaberg,
  • da Mönksberg und da Rheinberg,
  • Soizburg-Süd,
  • s'Leopoidskrona Moos,
  • da Leopoidskrona Weiha,
  • da Soizachsee und da Solochspitz und
  • d'Aigna Au.

A bor vo de wichtigsten Gschütztn Londschoftsdeule sand:

  • d'Höibrunna Allee,
  • d'Kopfwein am Oimkanal (Bam, de woss sunst londesweid nirngs gibt),
  • d'Föisnsteppn am Rheinberg (a Drocknbiotop am Südhong),
  • des Sama Mösl (a Moorrest, der wos si guad dahoidn hod),
  • da Anifa Oitaboch (a sehr naturnoha Bochlauf),
  • d'Itzlinga Au,
  • da Kühberg,
  • s'Naturwoidresavat Rheinberg und
  • s'Naturwoidresavat Gaisberg (des sand ois sehr naturhohe Wöida).

Soizburga Schmankal[Werkeln | Am Gwëntext werkeln]

Nochtlem[Werkeln | Am Gwëntext werkeln]

S'Nochtlem in Soizburg spüid si zum Großdeu in da Oidstod o, genaua gsogt vor oim am Rudoifskäi, rund uman Anton-Neumayr-Blotz und in de Bars hintam Platzl af da ondan Seitn vo da Soizach. Gem duads dortn vor oim Irish Pubs und Cocktailbars. Beim Bohnhof gibts seid a bor Joar a Urban Entertainment Centre mit Kinos, Diskos und Bars, wos si city center nennd. So wos Ähnlichs gibts a im Airportcenter beim Flughofn draußn, owa des ghead scho zu Wois-Sieznheim.

Voiksfestln[Werkeln | Am Gwëntext werkeln]

Jeds Joar amoi im Somma findt am Messegelände draußn a großes Voiksfest stott, d'Soizburga Duit. Außadem is im Somma af de großn Blätz rund um an Dom (Kapitlblotz, Domblotz und Residenzblotz) da Rupertikirtog und im Winta da Christkindlmorkt, zu dem wos oiwei recht vüi Touristn kumman, vor oim aus Italien.

Infraschtruktur[Werkeln | Am Gwëntext werkeln]

A Zug vo da S-Bohn in da Hoitstöi Soizburg Sam
Da siacht ma, vor da Silhouettn vo da Oidstod, d'gschwungane Form vom Makartsteg.
D'Höibrunna Allee

Vakea[Werkeln | Am Gwëntext werkeln]

Kortn vom O-Bus-Netz

Mehr dazua findst im Hauptartikü: Vakea in da Stod Soizburg

Soizburg is a wichtiga Vakeasknotnpunkt in Östareich. Es hod in zweitwichtigstn Flughofn vo da Republik und durch d'Stod gehd a d'Westbohn, durch des is da Soizburga Hauptbohnhof ana vo de wichtigstn in Östareich. Es gibt Direktvabindungen noch Nordwestn (Minga/Hamburg/Paris), Siidwestn (Innschprugg/Zürich), Nordostn (Linz/Wean/Budapest), Siidostn (Graz) und Siidn (Villoch/Laiboch/Zagreb/Venedig). An Autobohnknotn gibts a in Soizburg, und zwor gengan do de östareichischn Autobohnen A1 (Westautobohn, Richtung Wean) und A10 (Dauanautobohn, Richtung Villoch) genauso weg ois wia de deitsche A8 (Soizburga Autobohn, Richtung Minga).

De Hauptstreckn vo da Eisnbau, de wos vo Soizburg weggagengan, und nu a bor Nemstreckn wern a fir'n Regionalvakea hergnumma. S'wichtigste Nohvakeasmittl im Soizburga Zentralraum is heidzdogs d'S-Bohn. In da Stod söim hod seid'n Joar 1940 da Stodbus d'wichtigste Roin, und es gibt ans vo de gresstn O-Bus-Netze vo Europa. Wer unbedingt mi'n Auto in d'Stod einifohrn wüi oda muaß, wead dageng Probleme griang, wei sehr oft Staus san in da Innenstod, und Parkplätze findt ma sowieso meistns kane.

A bsundas wichtige Roin im Stodvakea spüid in Soizburg s'Fohrra'l. Üwa 20 Prozent vo olle Wege leng d'Soizburga min Ra'l zruck, damid liengan s'an da Spitzn vo de östareichischen Londeshauptsted. Z'Fuaß hod ma in Soizburg in da Innenstod a ka Problem, wei ois recht eng beinonda is; da Großdeu vo da Oidstod und a gleanana Deu vo da Neistod sand außadem eh Fuaßgängazone.

Energievasorgung[Werkeln | Am Gwëntext werkeln]

Fir'n Strom in da Stod Soizburg is d'Soizburg AG zuaständig, de wos im Joar 2000 durch a Fusion vom Londesenergievasorger SAFE und vo de Soizburga Stodwerke entstondn is.

Wossavasorgung[Werkeln | Am Gwëntext werkeln]

S'Drinkwossa griagt d'Stod a vo da Soizburg AG, hauptsächli aus'm Grundwossa-Diafbrunnen Glanegg vo da Quöin in Fürstnbrunn und vo de Gersbergquöin. Jeds Joar san des uma 12 Müllionan Lita, de wos ind Stod einipumpt wern. Af'm Mönksberg om und af'm Kapuzinaberg om is jeweus a Hochbehöita mid 25.000 Kubikmeta. Fir d'Entsorgung vom Obwossa gibts d'Großkläronlog in Siggawiesn neadlich vo da Stod. De is fir üwa 600.000 Leit ausglegt und vasorgt außa da Stod Soizburg a a bor Gemeindn im Umlond, zum Beispüi Ainring in Bayern drüm.

Graunknhaisa[Werkeln | Am Gwëntext werkeln]

  • D'Uniklinikn Soizburg:
  • S'Unfoigronknhaus
  • S'Gronknhaus vo de Bormherzing Briada

Büidung und Forschung[Werkeln | Am Gwëntext werkeln]

Rückausicht vo da Naturwissnschoftlichn Fakuität vo da Uni Soizburg im Stodteu Nonntal

Mehr dazua findst im Hauptartikü: Büidungseiirichtungen in da Stod Soizburg

In Soizburg gibts drei Unis, und des sand d'Uni Soizburg, s'Mozarteum und d'Medizinische Privatuni. D'Uni Soizburg (Paris-Lodron-Universität Soizburg) is im Joar 1622 vom Erzbischof Paris Lodron gründt worn. Heid hods vier Fakuitätn (d'katholisch-theologische, d'rechtswissnschoftliche, d'geistes- und kuiturwissnschoftliche, d'naturwissnschoftliche) mid uma 13.000 Studentn. D'Uni Mozarteum hom s'im Joar 1841 ois Musikschui eigricht. Seid 1998 is s'a Uni. Moa kau dortn vor oim Konzertfächa studiern, owa a pädagogische Fächa, Schauspüi, Bühnenbüid und Regie. DParacelsus Medizinische Privatuni gibts seid'n Joar 2003. Studiern komma dortn Humanmedizin, Pflegewissnschoftn und Molekulare Medizin (postgraduate).

D'Fochhochschui Soizburg gibts seid'n Joar 1995, 2005 hom s'as owa vom Stodeu Itzling in d'Gemeinde Puch bei Hallein valegt. Dortn gibts Studienrichtungen aus de Bereiche Technik, Wirtschoft, Gstoitung, Gsundheid und Soziales. D'Salzburg Management Business School gibts seid 2001. Gem duads do nur Masterstudien fir Wirtschoftsstudentn. Außadem gibts in Soizburg nu a longe Listn vo ondane Büidungseirichtungen im terziärn Sektor und vo Forschungsstättn.

Hechane Schuin (Sekundarstufn II) gibts in Soizburg insgesomt 20, davo san 13 oigemein büidend (Gymnasien und Realgymnasien) und siem san berufsbüidend (Haundlsakademien, Hechane Lehraunstoitn und so weida). Vo de 20 hechan Schuin san 14 stootlich und sechsi san katholische Privatschuin (drei oigemein büidende und drei berufsbüidende).

De wichtigstn Bibliothekn in Soizburg san d'Stodbiacharei und d'Unibibliothek.

Wirtschoft[Werkeln | Am Gwëntext werkeln]

Da Europark im Stodeu Taxhom iss gresste Eiikaufzentrum vom Bundeslaund und ghead da SPAR Österreichische Warenhandels AG.
D'Getreidegossn in da Oidstod wor scho im Mittloita s'Haundlszentrum vo da Stod. Heid iss vor oim s'Zentrum vom Fremdnvakea, der wos in Soizburg a extrem wichtiga Wirdschoftszweig is.

Soizburg is ned nur a wichtige Stod fir'n Fremdnvakea, fir d'Kuitur, fir'n Sport und ois Unistod. Durchs Messezentrum weadsa ois Messestondort oiwei wichtiga.

D'Stod Soizburg und a da Flochgau, der wos rundumadum liegt, sand außadem a attraktiva Stondort fir vüi gressane und gleanane Firmen und so wos wia da wirtschoftliche Motor vom Bundeslond. S'Wirtschoftswochsdum vom Soizburga Lond is des zweitgresste vo Östareich (noch Wean), und da muaß ma dazuasong, dass si d'Wirtschoftsgroft vom Lond fost nur in da Stod Soizburg und im Speckgirtl rundumadum konzentrierd, de wos olle zwa a supane Infraschtruktur homd. De Betriebe in da Stod hom zum Beispüi im Joar 2005 allane 60 Prozent vom gonzn Umsotz im Lond Soizburg gmocht, de im Flochgau nu dazua 30 Prozent.

De gresstn Firmen in Soizburg[Werkeln | Am Gwëntext werkeln]

Es gibt fünf Firmen, de wos eanan Sitz in da Stod Soizburg hom und im Joar 2005 üwa a Mülliarde Euro Umsotz gmochd homd:

  1. Porsche Holding GmbH (7,900 Mülliardn)
  2. SPAR Österreichische Warenhandels-AG (3,940 Mülliardn)
  3. Porsche Austria GmbH & Co (1,492 Mülliardn)
  4. Porsche Inter Auto GmbH & Co KG (1,170 Mülliardn)
  5. Interspar GmbH (1,130 Mülliardn)

De gresstn Bankn in Soizburg[Werkeln | Am Gwëntext werkeln]

  1. Raiffeisenverband Salzburg
  2. Bausparkasse Wüstenrot AG
  3. Salzburger Sparkasse Bank AG
  4. Salzburger Landes-Hypothekenbank
  5. Volksbank Salzburg

Orwatsplätz[Werkeln | Am Gwëntext werkeln]

D'Schtatistik Austria hod im Joar 2001 ned nur d'Voikszöhlung gmochd, sondan a eana Orwatsstettnzöhlung, und do is außakumma, dasss in da Stod Soizburg 10.210 Orwatsstettn gem hod mid ois zsomm 100.055 Beschäftigte. Des san um a Viertl mehr Orwatgewa ois zehn Joar vorher und um 12 Prozent mehr Beschäftigte.

Da gresste privatwirtschoftliche Orwatgewa vo de Firmen mid Sitz in da Stod (owa mid de Orwatnehma grechnt afs gonze Bundeslond) is d'SPAR Österreichische Warenhandels-AG mid 16.000 Midorwata. Af'm zweitn Blotz is d'Porsche Holding GmbH mid 14.670 Leit. D'Interspar GmbH hod 6.000 Augstöide. Af de nächstn Blätz kumman d'Porsche Inter Auto GmbH & Co KG mid 3.780, d'Salzburg AG mid 2.070, da Raiffeisenverband Salzburg mid 1.618 und d'Quehenberger Logistik AG & Co KG mid 1.615 Midorwata. (Stond vo 2005)

Medien[Werkeln | Am Gwëntext werkeln]

S'ORF-Londesstudio vo Soizburg is im Stodeu Nonntoi, dort wead Radio Salzburg produzierd und außadem nu de tägliche Fernseh-Informazionssendung Salzburg heute af ORF 2 und vaschiedene ondane Fernseh- und Radiosendungen fir de Programme vom ORF. Außadem kummt vo dort s'Intanet-Nochrichtnportal salzburg.orf.at. A Privatfernsehn gibts a in Soizburg, nämli des regionale Salzburg TV (seid 1995 im Kawü, heid a üwad Hausantenn). Privatradios gibts d''Antenne Salzburg, d'Welle 1 unds Radio Arabella. Außadem gibts nu a freies, ned kommerzielles Radio, nämli d'Radiofabrik.

Bei de Dogeszeidungen liefan si oiwei d'Salzburger Nachrichten (SN) und de Soizburga Bundeslond-Ausgob vo da Gronenzeidung (Salzburg Krone) an Wettlauf uman easchtn Blotz. Weid dahinta liegd nu de Salzburger Volkszeitung (SVZ), de wos friara a Parteizeidung vo da ÖVP wor. Bei de Wochnzeidungen gibts drei, de wos olle gratis san, nämli s'Salzburger Fenster (firs gonze Bundeslond) und, speziell fir d'Stod, de Stadt Nachrichten (ghead, so wias Fenster a, de SN) unds Stadt Blatt (Lokalausgob vo de Bezirksbladln). Jen Monad kummt außadem (firs gonze Bundeslond) des Nochrichtnmagazin ECHO außa.

Partnastädd[Werkeln | Am Gwëntext werkeln]

D'Soizburga Partnastod Meran in Sidtiroi

Berühmte Leit vo Soizburg[Werkeln | Am Gwëntext werkeln]

Da Mozart Wolfgang Amadeus
  • Bacher Gerd, Journalist
  • Berger Nik, Beachvolleyboi-Spüla
  • Doppler Christian, Mathematika und Physika
  • Ferrero-Waldner Benita, Politikarin
  • Gauß Karl-Markus, Publizist
  • Glomser Gerrit, Radlfohra
  • Holzbauer Wilhelm, Architekt
  • Ibertsberger Andi, Fuaßboi-Nationalspüia
  • Herbert vo Karajan, Dirigent
  • Krassnitzer Harald, Schauspüia
  • Kuljić Sanel, Fuaßboi-Nationalspüia
  • Mainoni Eduard, Politika
  • Makart Hans, Mola und Dekorazionskünstla
  • Mohr Joseph, Pforra und Dichta
  • Mozart Wolfgang Amadeus, Komponist
  • Otto I., Kini vo Griechnlond
  • Ratzenberger Roland, Formü-1-Fohra
  • Thorak Josef, Nazi-Büidhaua
  • Trakl Georg, Dichta und Autor
  • Voggenhuber Hannes, Politika

Ehrnbiaga[Werkeln | Am Gwëntext werkeln]

D'Ernennung zum Ehrnbürga is d'hechste Auszeichnung, de wos d'Stod Soizburg vagem kau. A Ehrnbürga griagt olle Rechte, de wos a normala Bürga vo da Stod hod, owa ned de Pflichtn. Da easchte, der wos Ehrnbürga worn is, wor da Sattler Johann Michael, a Londschoftsmola, am 6. Mai 1829. Fost hundad Joar hods dauad, bis zum Joar 1920, daßs zum easchtn Moi a a Ehrnbürgarin vo Soizburg gem hod, nämli d'Lehmann Lilli, a Kommasängarin. Bis jetz is d'Ehrnbürgaschoft 88 Moi vagem worn; d'Lehmann Lilli is nu imma d'anzige Frau, de wos s'griagt hod.

Literatua[Werkeln | Am Gwëntext werkeln]

  • Dopsch Heinz: Kleine Geschichte Salzburgs – Stadt und Land, Pustet 2001.
  • Dopsch Heinz, Hoffmann Robert: Geschichte der Stadt Salzburg, Pustet Salzburg 1996.
  • Floimair Roland, Kaindl Kurt: Hundert Jahre Film, 1895-1995: Salzburger Film- und Fotopioniere, Amt der Salzburger Landesregierung, vertreten durch das Landespressebüro, Salzburg 1994.
  • Hoffmann Robert: Mythos Salzburg. Bilder einer Stadt. Verlag Pustet, Salzburg, Minga, 2002. ISBN 3-7025-0425-7
  • Koller Fritz, Rumschöttel Hermann: Bayern und Salzburg im 19. und 20. Jahrhundert, vom Salzachkreis zur EUregio, Samson 2006. ISBN 3-921635-98-5
  • Rosendorfer Herbert: Salzburg für Anfänger, nymphenburger 2003.
  • Strasser Christian: The Sound of Klein-Hollywood: Filmproduktion in Salzburg, Salzburg im Film: mit einem Filmlexikon. Österreichischer Kunst- und Kulturverlag Wien 1993. ISBN 3-85437-047-4

Schau aa[Werkeln | Am Gwëntext werkeln]

Im Netz[Werkeln | Am Gwëntext werkeln]

 Commons: Salzburg (Stadt) – Oibum mit Buidl, Videos und Audiodateien

Beleg[Werkeln | Am Gwëntext werkeln]

  1. salzburg.gv.at. Archiviert vom Original [1] am 30. Septemba 2009; abgerufen am 22. September 2017.
  2. 2,0 2,1 Magistrat-Info
  3. https://web.archive.org/web/20061012105958/http://www.stadt-salzburg.at/pdf/salzburginzahlen20062.pdf
  4. Archivierte Kopie. Archiviert vom Original [2] am 20. Mai 2011; abgerufen am 1. Dezember 2010.
  5. http://www.tartanplace.com/tartanhistory/concentrationcamps.html


Des is a beriga Artike.
Dea Artike is ois zimfti in de Hall of Fame (Ruhmeshoin) aufgnumma worn.