Ostan

Ostaoar

Poimkatzal

Ostahos

Osterhasenmuseum z Minga

Ostan, Oustan oda Ostern is a traditionejs Fruajoarsfest, wo heidnische, jidische und kristliche Wurzln hod.

De Kristn feian de Afastehung vom Jesus und de Judn in Auszug aus Egyptn (Pessach-Fest). De heidnischn Ibaliefarunga beziagn si vor oim af a Fruajoars- und Fruchborkeitsbrauchdum. Deshoib is koa Zuafoi, dass Ostan am Sunda nochm easchtn Fruajoarsvoimond gfeiad wead.

Nama

Da Nama Ostan hod an oidgermanischn Uasprung und hengt mit da Himmesrichtung Ostn zamma, do wo de Sun afgeht. Vui andane Sprochn vawendn a Obleitung vom jidischn Pessach: Franzesisch Pâques, griachisch πάσχα, islendisch páskar, italienisch Pasqua, hollendisch pasen, portugiesisch Páscoa, russisch Пасха, ukrainisch Великдень, schwedisch påsk, spanisch: Pascua, tiarkisch: Paskalya.

Ostan im Kristndum

De Kristn glaam, dass da Jesus vor rund 2000 Joar zan jidischn Pessach-Fest z Jerusalem am Kreiz hingricht worn is. Da Grund wor de Angst vor Afrua und de Behaptung vom Jesus, dass a da Messias warad. Deshoib homs eam aa a Schuidl afs Kreiz ghengt, wo draf gstandn is, "Kini vo de Judn". Da Dog an dem a kreizigt worn is, hoasst heit Koarfreida.

Am Sunda (heit: Ostasunda) draf, hom nacha Ohenga vom Jesus gsegn, dass sei Grob laar wor. Spoda is gsogt worn, dass da Jesus vor rund 500 Leit easchiena warad und vor eana predigt hed. De Afeastehung hod de Leit davo ibazeigt, dass da Jesus da Suhn vom Heagod warad. De Kristn glaam aa, dass daduach fia jedn Mensch Hoffnung af Eaneiarung in de Wejt keman is.. Duach in Glaam in God dadadns sprirituej lebendi wean und a neis Lebm ofanga kina.

In de Passionsspui wead s Load vom Jesus nochgspuit. De Obaammagaua Passionsspui san de wejtweit bekanntastn davo. De letztn fimf Dog im Lebm vom Jesus wean do duach de Dorfbewohna vo Obaammagau nochgstejt.

Brauchdum

An Haffa Ostabrauchdum, wia Oafeabm, Oavastecka und Schokoostahosn, hod mit am Fruajoarsbrauchdum vo oidn eiropejischn Natuareligiona z doa.

Da Zammahang is zan Tei offnsichtli: Ostaoa und Ostahos (Fruchtborkeit), Ostafeia und Ostaradl (Sunnakult), Ostawossa (Jungbrunn, Eaneiarung, Fruchtborkeit), Ratschn und Ostaschiassn (Wintageista vatreibm), Ostabrod und Ostaspeisn (Opfa und Eaneiarung) und so weida.

Fruchtborkeid, neies Lebm

Ostaoa

A Ostaoa is traditionej a hoartkochts Henaoa, wo gfeabt, ogmoit oda vaziad und z Ostan vaschenkt wead. Heit wean woarscheinli meara Ostaoar aus Schoklad vaschenkt und gessn. Ostaoar wern oba aa zua Dekoration vawendt. Des kena ausblosane Henaoar sei oda Oar aus andan Stoffn wia Kunststoff, Pappadeckl, Stoa oda Gips.

Wo dea Brauch heakimpt is ned sicha. Es Oa is oba in de moastn Kuituan a Symboi fia Fruchtborkeid und neies Lebm.

Ostahos

Da Hos is aa a oids Symboi fia Fruchtborkeid (wei sa si so schnej vamean). Es dominante Symboi fia Ostan is da Ostahos eascht im 17. Joarhundat worn. Da genaue Grund is ned bekannt. Da Fejdhos hod de Phantasie vo de Menschn oba scho imma befligld: Ea rennt blitzschnej davo und schlogt dabei Hokn, so ois ob a wos z vabeagn hed. De Mandal stengan afrecht wia a Mensch, wens ums Weibal kempfn. Und grod im Fruajoar siagt ma vui Hosn. Im boarischn Brauch bringt jednfois moast da Ostahos de Ostagschenk und vasteckts in Ostanestan, wo de Kinda nacha suacha miassn.

Poimkatzal, Poimgart, Poimbuschn

In vuin Gegandn schneidt ma am Greanpfinzda Poimkatzalzweig ob. De wean na dahoam in a Vasn gstejt und am Koarsamsda mit ausblosane und bunt ogmoide Oar gschmickt.

• 

  Ostahosn umbringa

• 

  Oarhiartn

• 

  Oascheim

• 

  Ostanest suacha

Winta vatreim

Ratschna san uaspringli a Weakzeig zan Vatreibm vo Vegln vo de Fejda gwen, deswegn sans aa a Symboi zan Vatreibm vo de Wintageista worn.

In da katholischn Ibaliefarung fliagn de Glockn am Greapfinzda af Rom und keman eascht z Ostan wieda. In dea Zeid ibanehma de Ratschna de Funktion.

Es Ostafeia wead moast am Koarsamsda, in da Ostanocht, obbrennd. Da Brauch stammt ois oidn Zeidn und is spoda vo de Kristn ibanumma worn. Es Feia is a Symboi fia de Sun, de wo im Fruajoar imma steaka wead. Feia hod aa a reinigende Wiakung und vatreibt de Wintageista. De Oschn is friaa af de Fejda vastraad worn, ums Woxdum z sichan.

• 

  Ostaschiassn

• 

  Ratschn

• 

  Ostaradl

• 

  Ostafeia (bei Graz)

Ostaspeisn

Traditionej wead am Greapfinzda, Koarsamsda oda Ostasunda a Koab mit Ostaspeisn zua Speisnweih in d Mess mitgnumma. Moast san do drin Ostaschinkn (Gsäichts), Ostabrod (Weißbrod), Ostaoar, Soiz, Pfeffa, Kren, Paradeisa und Mäispeisn. Am End vo da Mess wean de Speisn gsegnet und dahoam zan Ostafruastuck gessn.

Noch da langa Fostzeid hod ma si natiale bsundas aufs Fleisch gfreid. In Estreich hoasst ma de Speisnweih deswegn aa oft Fleischweih.

• 

  Ostakoab

• 

  Speisnsegnung

• 

  Ostabrod

• 

  Traditionejs Ostafruastuck

Schau aa

• Ostara

Literadua

• Aveni, Anthony: The Easter/Passover Season: Connecting Time's Broken Circle, The Book of the Year: A Brief History of Our Seasonal Holidays. Oxford University Press, 2004. ISBN 0195171543.

Im Netz

 Commons: Ostern – Sammlung vo Buidl, Videos und Audiodateien

• Was es mit den Osterbräuchen auf sich hat af evangelisch.de
• Brauchtumskalender af isar-gau.de

00V Boarischa Brauch