Gugaruz
| Gugaruz Mais | ||||||||||||
|---|---|---|---|---|---|---|---|---|---|---|---|---|
Gugaruz | ||||||||||||
| Systematik | ||||||||||||
| ||||||||||||
| Wissnschoftlicha Nama | ||||||||||||
| Zea mays | ||||||||||||
| L. |
Da Gugaruz, aa Kukuruz oda Mais, is a oide Kuituapflonzn, wo zan Droad zejd wead. Wia de ondan Droadsortn is a Siassgros. Gugaruz is scho in prehistorischa Zeit in Middlamerika obaut worn und noch da "Entdeckung" vo Amerika af Eiropa kema. Heit wead da Gugaruz wejdweit obaut. Ea wead vor oim ois Fuadamiddl gnutzt, owa aa zua Energiegwinnung (Biosprit, Biogas) und ois Noarungsmiddl.
Etymologie
[Werkeln | Am Gwëntext werkeln]Gugaruz (Kukuruz) is iwas Serbo-Krowodische kukùruz (kyrillisch: куку̀руз) meglichaweis ausm Tiakischn قوقوروز (kokoroz)[1] ins Boarische kema. Vialleicht hod des aa mit aufständischn Bauan im ungarischn Kenigreich z duan, de "Kuruzen" (Vabindate vo de Tiakn)[2]. Im Ostn vo da Schteiamoak wead a nu Heid os da Woaz oda goa da tiakische Woaz gnennd.
Mais kimmt vom spanischn Wort maize, wo wiedarum aus oana oidn middlamerikanischn Indiana-Sproch (Arawakan bzw. Taino) kimmt und do mahiz ghoassn hod.[3]
Nutzung
[Werkeln | Am Gwëntext werkeln]
Da gresste Tei vom Gugaruz, wo wejdweit obaut wead, wead ois Fuadamiddl (Silogugaruz, Keandlgugaruz) gnutzt; dees guit aa fia Bayern und Östareich. A kloanara Tei wead fia de Energiegwinnung eigsetzt. Da Rest wead ois Lebmsmiddl vawendd.
Noarungsmiddl
[Werkeln | Am Gwëntext werkeln]Gugaruz zejd in vui Lendan vo da Wejd za de Grundnoarungsmiddl.
De oafochste Oart an Gugaruz z essn is glei vom Maiskoibm owa. Im unreifn Zuastand, wann de Keandln no woach san, ko da Mais roh vom Koibm gessn wean. Kocht, grest oda gruit is dees no bekemmlicha. Kochte, unreife Maiskeandln wean aa in Salodn, Suppm und Auflaifn vawendd oda ois Gmiasbeilog gessn. Aus Maiskeandln wean duach Quetschn de Cornflakes (Maisflockn) heagstejt. Aus Keandln vo speziejn Maissortn mocht ma Popcorn.
Nebm da Vawendung ois ganze Keandln wead da Gugaruz aa za Mej und Griass bzw. za Steakn weidavaorbat.
Aus Maisgrias wead zan Beispui da Polenta gmocht, a oide indianische Tradition, wo aa in Middleiropa a traditioneje Speisn vo Bauan und oarman Leit wor und no imma gean gessn wead. Ba da Heastejung vo Maisgrias foit ois Nebmprodukt s Maiskeimej o.
Maisbrod z bocha is emfois a oide indianische Tradition. Dees is a Fladnbrod, wo heit no in vuin vaschiedanan Variantn in de USA gessn wead.
A spezieje joartausendoide Vaorbatungstechnik fia Gugaruz ois Lebmsmiddl is de Nixtamalisation. Des is a meastufiga Prozess, wo da Gugaruz mit Hoizoschn oda gleschtn Koich kocht, enthist und nacha noss zan Doag vamoin wead. Oschliassend weads za Endprodukt weida vaorbat oda drickat und glogat. Duach de Nixtamalisation wead da Gugaruz noarhofta und bekemmlicha.
Tortillas san a mexikanisches Fladnbrod, des wo aus Gugaruzmej gocht wead, wo duach Nixtamalisation heagstejt worn is.
Platsch-Gugaruz is a spezielle Gugaruzsortan, welche ma platza laua koa.Manch oina kennts vialleicht als "Popcorn".
Fuadamiddl
[Werkeln | Am Gwëntext werkeln]De Haupvawendung vo Gugaruz ois Fuadamiddl is: Ois Maissilage (aus da gaunzn Gugaruzpflaunzn) fia Rindviecha, ois Corn-Cob-Mix (Silage nua ausm Koibm) fia Schweindln, ois Gugaruzkeandln und ois Maissteakn (Zuagob fia Proteinfuada).
Nochhoitige Energiegwinnung
[Werkeln | Am Gwëntext werkeln]An Haffa Gugaruz wead aa ois nochwoxanda Rohstoff vawendd. Gugaruz wead ois Energiepflonzn zua Heastejung vo Biokroftstoffn gnutzt und ois Energiegugaruz in Biogasologn.
Zua Hestejung vo Biogas wead de ganze Gugaruzpflanzn gnutzt, wearend fia Bioethanol (Biosprit) nua da Maiskoibm vawendd wead.
Industriella Rohstoff
[Werkeln | Am Gwëntext werkeln]De Gugaruzsteakn sea vuiseiti vawendd: Ois Ausgangsprodukt fia diverse Biokunststoff und ois Fermentationsrohstoff fia Feinchemikalien beispuisweis (fia Antibiotika oda Aspirin).
Wiatschoftliche Bedeitung
[Werkeln | Am Gwëntext werkeln]
Wei Gugaruz in vui Tein vo da Wejd a Grundnoarungsmiddl is, hoda a hohe wiatschoftliche Bedeitung. Dazua kimmt, dass Gugaruz zua nochhoitign Energiegwinnung (Biosprit, Biogas etc.) imma wichtiga wead. Ois Fuadamiddl is da Mais ebmfois wejdweit wichtig.
2009 is laut FAO wejdweit 817,1 Mio. t Gugaruz geantet worn. De foigende Tabejn gibt dazua a Iwasicht:
| Rang | Land | Menge (in t) |
Rang | Land | Menge (in t) | |
|---|---|---|---|---|---|---|
| 1 |  USA
|
333.010.910 | 13 |  Italien
|
7.877.700 | |
| 2 |  Kina
|
163.118.097 | 14 |  Ungarn
|
7.528.380 | |
| 3 |  Brasilien
|
51.232.447 | 15 |  Philippinen
|
7.034.033 | |
| 4 |  Mexiko
|
20.202.600 | 16 |  Egyptn
|
6.800.000* | |
| 5 |  Indonesien
|
17.629.740 | 17 |  Serbien
|
6.396.262 | |
| 6 |  Indien
|
17.300.000 | 18 |  Thailand
|
4.616.119 | |
| 7 |  Frankreich
|
15.299.900 | 19 |  Deitschland
|
4.527.228 | |
| 8 |  Argentinien
|
13.121.380 | 20 |  Vietnam
|
4.381.800 | |
| 9 |  Sidafrika
|
12.050.000 | ... | |||
| 10 |  Ukraine
|
10.486.300 | 30 |  Östareich
|
1.890.503 | |
| 11 |  Kanada
|
9.561.200 | 72 |  Schweiz
|
174.035 | |
| 12 |  Rumänien
|
7.973.258 | Wejd | 817.110.509 |
*) Schätzwert FAO
Zammasetzung im Vagleich
[Werkeln | Am Gwëntext werkeln]| Amaranth | Woazn | Reis | Gugaruz | Eadäpfen | |
|---|---|---|---|---|---|
| Bstondtei (per 100g) | Menge | Betrog | Betrog | Betrog | Betrog |
| Wossa (g) | 11 | 11 | 12 | 76 | 82 |
| Energie (kJ) | 1554 | 1506 | 1527 | 360 | 288 |
| Protein (g) | 14 | 23 | 7 | 3 | 1.7 |
| Fett (g) | 7 | 10 | 1 | 1 | 0.1 |
| Kohlenhydrat (g) | 65 | 52 | 79 | 19 | 16 |
| Ballaststoff (g) | 7 | 13 | 1 | 3 | 2.4 |
| Zucka (g) | 1.7 | 0.1 | >0.1 | 3 | 1.2 |
| Eisn (mg) | 7.6 | 6.3 | 0.8 | 0.5 | 0.5 |
| Mangan (mg) | 3.4 | 13.3 | 1.1 | 0.2 | 0.1 |
| Kalzium (mg) | 159 | 39 | 28 | 2 | 9 |
| Magnesium (mg) | 248 | 239 | 25 | 37 | 21 |
| Phosphor (mg) | 557 | 842 | 115 | 89 | 62 |
| Potoschn (mg) | 508 | 892 | 115 | 270 | 407 |
| Zink (mg) | 2.9 | 12.3 | 1.1 | 0.5 | 0.3 |
| Panthothesaire (mg) | 1.5 | 0.1 | 1.0 | 0.7 | 0.3 |
| Vitamin B6 (mg) | 0.6 | 1.3 | 0.2 | 0.1 | 0.2 |
| Folsaire (µg) | 82 | 281 | 8 | 42 | 18 |
| Thiamin (mg) | 0.1 | 1.9 | 0.1 | 0.2 | 0.1 |
| Riboflavin (mg) | 0.2 | 0.5 | >0.1 | 0.1 | >0.1 |
| Niacin (mg) | 0.9 | 6.8 | 1.6 | 1.8 | 1.1 |
Kunst, Kuitua, Religion
[Werkeln | Am Gwëntext werkeln]
Ois bedeitende Kuiturpflanzn spuit Gugaruz seit prähistorischa Zeit aa in da Kunst, Kuitua und Religion a wichtige Roin.
In da Moche-Kuitur in Peru san eppa um 300 n.Chr. goidane Maiskoibm nochweisli gfeatigt worn.
De middlamerikanischn Indiana (z. B. de Azteken) hom an Hauffa Maisgetta vaehrt. Da Mais wor ba eana aa a Symboi fia de Sun, fia de Wejd und fian Menschn. Im Buach Popol-Vuh wead gschriebm, dass da "dritte Mensch" aus Mais gschoffa worn is.
In Amerika is Mais heit a Symboi fia landwirtschoftliche Produktivität und Kuitua. Da Wossaturm z Rochester is dafia genau so a Beispui wia da Corn Palace z Mitchell in Siid-Dakota oda a boa Sain im Capitol z Washington.
Beleg
[Werkeln | Am Gwëntext werkeln]- ↑ Wiktionary on kukuruz
- ↑ Wörterbuch der donauschwäbischen Lebensformen
- ↑ etymonline.com on maize
- ↑ FAO, Faostat Statistik vo da FAO 2009 (Memento des Originals [1] vom 19. Juni 2012 im Internet Archive)
Info: Der Archivlink wurde automatisch eingesetzt und noch nicht geprüft. Bitte prüfe Original- und Archivlink gemäß Anleitung und entferne dann diesen Hinweis., afgruafa am 1. Oktoba 2010
Literatua
[Werkeln | Am Gwëntext werkeln]- Mais. Geschichte und Nutzung einer Kulturpflanze, hrg. von Daniela Ingruber und Martina Kaller-Dietrich, Frankfurt am Main: Brandes & Apsel, 2001.
- J.P. Gay: Maïs, mythe et réalité, Atlantica, 1999, ISBN 2-84394-128-8.
- Maryse Carraretto: Histoires de maïs, d’une divinité amérindienne à ses avatars transgéniques,CTHS, 2005, ISBN 2-7355-0577-4.
Im Netz
[Werkeln | Am Gwëntext werkeln]
Commons: Gugaruz – Oibum mit Buidl, Videos und Audiodateien- "Tracking the Ancestry of Corn Back 9,000 Year's," New York Times, May 25, 2010
- Deutsches Maiskomitee e.V.
- Gugaruz ba Proplanta.de
- Informationen der Cereal Knowledge Bank: Maize
- https://books.google.at/books?id=7AW9BAAAQBAJ&pg=PA111&lpg=PA111&dq=T%C3%BCrkischer+Woaz&source=bl&ots=zRPh6foGMX&sig=vEbBfoJpa34S8_lcsRQOg5Yfuc4&hl=de&sa=X&redir_esc=y#v=onepage&q=T%C3%BCrkischer%20Woaz&f=false%7C Ausm Biachl: Eiropäische Erinnerungen.. iwan tiakischn Woaz in da Schteiamoak.
 |
Dea Artike is ois berig in de Hall of Fame (Ruhmeshoin) aufgnumma worn.
|
|