Tobias Seicherl

Aus Wikipedia
Zur Navigation springen Zur Suche springen

Tobias Seicherl is de Haupfigua vo ana täglichn Comicserie ("daily strip"), de wos ob 1930 in da estareichischn, sozialdemokratischn Boulevardzeidung Das Kleine Blatt aus Wean vaeffentlicht wuan is. Tobias Seicherl woa domit da easchte kontinentaleiropäische "Daily Strip".

Da Autor vo dera Comicserie woa da Weana Karikaturist Ladislaus Kmoch (alias Ludwig Kmoch, 1897 - 1971). De Comicserie is auf Weanarisch gschriem[1].

Figuan[VE | Weakln]

Da Tobias Seicherl woa a richtiga Klaabiaga und Spiessa. Sei Hund, da Struppi, woa dageng groteskaweis im Comic de Stimm vo da Vanumft.

"Seicherl" hod auf Weanarisch zwaa Bedeitungen, de wos mitanaunda korrespodian duan. Uaspringlich woa damit nua a "klaans Sieb" gmaant, späda is de Bedeitung "Schwochmatt, Schwächling, Wuascht, Zniachtl" dazuakumma; oisa aana, dea wos kaan Charakta hod, dea wos wia a Siewal ois duach si duachrinna losst und sei Faune imma nochm Wind ausricht.

Da Seicherl woa ba jeda Glengheit aungsoffn und is mitn Spaziasteckn, mit seina Pfeifn und seim Hund Struppi duach Wean spaziat. Sei Beruaf und seine sunstign Lemsumständ san nia ned thematisiat wuan. So woara de ideale Projektionsflächn fia de sozialdemokratischn Lesa, um si iwa de Spiessa obzreagian[2].

Gschicht[VE | Weakln]

De Comicstrip is vo 1930 - 1939 jedn Dog im "Das Kleine Blatt" easchienen. Bis Fruahjoa 1940 no sporadisch. Politisch woa de Serie owa nua vo 1930 - 1934, do hod da Seicherl mitn Hitler sympathisiad. Ob 1934, mit da Eifiahrung vom Ständestoot (austrofaschistische Diktatua) is da Seicherl zwaungslaifig unpolitisch wuan. Am End vo de 1930a Joa hods dann in da Comicserie nationalistische Tendenzn gem.[3]

Da Seicherl woa vau Aufaung aun so beliabt, dass scho ob 1933 Sondabände easchienan san.

Nochn zwatn Wödkriag is vasuacht woan, in Seicherl wiedazbelem. Vo 1958 bis 1961 san in vaschiedanan Weana Zeidungen Seicherl-Serien easchienan. De Serie hod owa nimma aun de friachan Eafoig aunknipfn kena.

Schau aa[VE | Weakln]

Beleg[VE | Weakln]

  1. Ludwig Kmoch (lambiek.net)
  2. Konstantin Kaiser: Die Karrieren des Kleinen Mannes. Hirnschal, Seicherl, Schwejk und Bockerer im Zweiten Weltkrieg. (literaturepochen.at)
  3. Auf der Suche nach österreichischen Comic-Strips (www.raketa.at). Archiviert vom Original am 21. Septemba 2011, obgruafa am 19. Aprui 2012.

Literatua[VE | Weakln]

  • Bernhard Denscher, Humor vor dem Untergang. Tobias Seicherl - Comics zur Zeitgeschichte (1930-1933). ISBN 978-3215051272
  • Gerhard Habarta, Harald Havas: Comic Welten. Geschichte und Struktur der neunten Kunst. Edition Comic Forum Wean, 1992, ISBN 3-900390-61-4
  • N.N.: Tobias Seicherl, RRAAH! Magazin, Nr. 54, 15. Jahrgang, Feba 2001, S. 44-45
  • Andreas C. Knigge: Comic Lexikon, Ullstein, 1988, ISBN 3-548-36554-X