Dialekte in Bayern

Der Artikl is im Dialekt westlichs Nordboarisch gschrim worn.

In Bundeslånd Bayern wern gånz vaschine Dialekte gredt. De drai Haptgruppm vo de owerdaitschn Dialekte (Boarisch, Ostfrenkisch, Alemannisch (zon letztn ghejert aa es Schwebische) lejn'se dou finna und treffa'se dou. Gånz in Westn und in Nordn wern aa schou mittldaitsche Dialekte gredt. Feste Grenzn, wou a Dialektraum afhejert und a ånderer åfångt, git's niat. Ma spricht von Dialektkontinuum, des hoisst, wem'ma schrittwais vo Ort zo Ort gejt, nou endert'se da Dialekt maistns blous a kloans bissl, ower umso grejssere Schritt das'ma måcht, umso stirker unterschain'se de Dialekte. Asserdean git's Iwergångs- und Mischdialekte, und iwer d Zait hom'se a por Dialektraim aa vaschum (es Mittlboarische is nouch Nordn ins Nordboarische aine und nouch Westen ins Ostschwebische aine gwåndert, und es Ostfrenkische nouch Ostn und Sidn ins Nordboarische aine).

Wichte is aa, das bayerisch und bairisch (af Boarisch: boarisch) schraib- und bedaitungsmasse unterschin wern (in da Sprouchwissnschaft und iwerhapps):

• bayerisch: betrifft es Bundeslånd Bayern.
• bairisch: betrifft de boarische Sprouch. Der Tol vo Bayern, wou boarisch gredt wird, hoisst aa Altbayern (ejamol Altbaiern gschrim).

D Dialektraim in Bayern

D Dialektraim wern fir ålle Dialektgruppm nouch de Vawåltungsbezirk oder nouch markante Låndschåftn ågem. Grob vo Nord af Sid und vo Ost af West:

Frenkisch

Owerostfrenkisch:

• Owerfrånkn one es mittlestliche Eck
• Mittlfrånkn one es sidestliche Eck

Owerostfrenkisch mit nordboarische Ainfliss:

• estlichs Mittlfrånkn
• sidwestlichs Owerfrånkn

Unterostfrenkisch:

• Unterfrånkn one en Westn und n Nordn

Rhainfrenkisch (Hessisch):

• westlichs und nerdlichs Unterfrånkn

Ostmittldaitsch

Thiringisch:

• ner d Gechad um Ludwigsstod

Boarisch

Nordboarisch:

• Owerpfålz one en Sidostn und en Stick sidlich vo da Doana
• mittlestlichs Owerfrånkn
• sidestlichs Mittlfrånkn
• Owerbayern nerdlich vo da Oidmui

Nordmittlboarisch:

• nerdlichs Niderbayern
• sid(est)liche Owerpfålz

Mittlboarisch:

• Niderbayern one en Nordn
• Owerbayern sidlich vo da Oidmui
• nordestlichs Schwom af da Leng von Lech
• Rengschburch (a mittlboarische Sprouchinsl)

Sidmittlboarisch:

• sidwestlichs Owerbayern zwischa da Isar, da Åmmer, en Åmmersej und en Stornbercher Sej

Sidboarisch:

• Werdnfölser Lånd

Lechroanisch

Lechroanisch is a Mischdialektgruppm as Sidmittlboarisch und Ostschwebisch

• sidwestlichs Oberbayern zwischa da Åmmer, en Lech und Augschburch (Lechroa)

Schwebisch + Alemannisch

Ostschwebisch:

• Schwom one en Nordostn
• gånz sidlichs Mittlfrånkn

Nideralemannisch:

• Westallgäu und Oberallgäu

De boarischn Dialektregiona in Bayern gnauer

De boarischn Dialekte in Bayern kå'ma gnauer atoln nouch zia Dialektregiona mit Stedt und Låndschåftn.. De druntern Baispülswerter zoing oa typische Lautunga fir d Dialektregiona, des ner iwersichtsmasse und vaoafåcht. Fir Gnauers schauts afn Artikl, wou de boarischn Dialekte gnauer vaglicha wern. Es sidliche Owerbayern (douda Sidmittlboarisch) wird tolwais ånderscht atolt as wej in Kloana Boarischn Sprouchatlas. Grob vo Nord af Sid:

Hiwais: Fir d Stedt und d Låndschåftn han de jewals durtinga Nama ågem.

Nordboarisch:

• (1) nerdliche Owerpfålz, mittlestliches Owerfrånkn: Waldsassen, Tirscharat, Orzberch, Rawatz, Wunsidl, Naistadl, d Wain
  Soiffm, broat/brååt, Loitan, Brejf, bejs, Schnej, tejf, Brouda, goud, Iasl, Huasn, rout, Haus, Zait, Faia, grångg, miaggn, Göld, vül, Hulz, fest, diats, niat, uns
• (2) westliche Owerpfålz, sidestlichs Mittlfrånkn: Kemnath, Eschawo, Auerboch, Sulzboch-Rousnberch, Naimak, Balgrejs
  Soiffm/Soiffa, broat, Loitan, Brejf, bejs, Schnej, tejf, Brouda, gout/guat, Isl/Esl, Husn/Hosn, rout, Haus, Zait, Faia, grångg, miaggn/miagga, Göld, vül, Hulz/Holz, fest, enk/enks, niat, uns.
• (2 Sunderfol) Raum Eichstätt - Stoi (Hülpoltstoi)
  Soiffa, broit, Loitan, Brejf, bejs, Schnej, tejf, Brouda, guat, Esl, Hosn/Housn, rout, Haus, Zait, Faia, grångg, miagga, Göld, vül, Holz, fescht, enk/ees, niat/net, uns
• (3) mittlere Owerpfålz: Hirschau, Vouastraß, Åmberch, Nabburch, Neunburg v.W., Schejsej, Schwandorf, Lengaföld
  Soiffa, broat, Loitan, Brejf, bejs, Schnej, tejf, Brouda, guat, Esl, Hosn, rout, Haus, Zaid, Faia, grångg, miagga, Göld, vül, Holz, fest, deeds/eds, niat/net, uns

Nordmittlboarisch:

• (4) sidliche Owerpfålz, nerdlichs Niderbayern: Rianburch, Kölham, Rengschburch, Roding, Straubing
  Soiffa, broat, Loitan, Brejf, bejs, Schnej/Schnee, tejf, Bruada, guat, Esl, Hosn, rout, Haus, Zait, Faia, grångg, miagga, Göld, vül, Holz, fest, ees, net, uns
• (5) mittlerer Boarischer Wold: Cham, Ketzing, Vejta, Reng
  Soiffa, broat, Loitan, Brejf, bejs, Schnej/Schnee, tuif, Bruada, guat, Esl, Hosn, rout, Haas/Håås, Zäät, Faia, grångg, miagga, Göld/Gejd, vül/vej, Holz/Hoiz, fest, ees, net, uns

Mittlboarisch:

• (6) unterer Boarischer Wold: Wegschoid, Freyung, Drailendereck
  Soaffa, broat, Loatan, Briaf, bees, Schnee, toif, Bruada, guat, Esl, Hosn, reout, Haus, Zait, Faia/Foia, grångg, miagga, Gööd, vüü, Hoiz, fest, ees, net, uns
• (7) Ower- und Niderbayern: Minga, Inglstod, Låndsad, Deggndorf, Båssa (da Grousstol vo Ower- und Niderbayern, sowait niat in 2, 4, 5, 6, 8, 9, 10 afgnumma)
  Soaffa, broat, Loatan, Briaf, bees, Schnee, tiaf, Bruada, guat, Esl, Hosn, rout, Haus, Zait, Faia, grångg, miagga, Gejd, vui/vej, Hoiz, fest, ees, net, uns
• (8) westlichs Owerbayern: Schromhausn, Oachach, Bruck (Firstnfoidbruck), Starnberg, Weilham
  Soaffa, broat, Loatan, Briaf, bees/bääs, Schnää/Schnea, tiaf, Bruada, guat, Esl, Hosn, rood/roat, Haus, Zait, Fair, krånk, miarka, Goid, vui, Hoiz, fescht, ees, ned/net/it, ins/uns

Sidmittlboarisch:

• (9) owerboarischs Ålpmgebejt: Berchtsgoaner Lånd, Cheamgau, Miaschbåch, Tegernsee, Dejz/Doiz
  Soaffa, broat, Loatan, Briaf, bees, Schnee, tiaf, Bruada, guat, Esl, Hosn, rout, Haus, Zait, Faia, grångg/krånk, miagga/miaka, Goid/Gejd, vui/vii, Hoiz, fescht, ees, net, ins
• (9 Sunderfol: Lechroanisch) westlicher Lechroa bis ungfer af Weilheim
  Soaffa, broat, Loatarn, Briaf, beas, Schnea, tiaf, Bruadar, guat, Esl, Hosn, roat, Haus, Zait, Fuir, kchrankch, mürkcha, Gald, vil, Holz, fescht, ees, net/it, ins

Sidboarisch:

• (10) Grafschaft Werdenfels, Isarwinkl: Garmisch-Partakurch, Oberammergau, Mittanwold
  Soaffm, broat, Loatarn, Briaf, beas, Schnea, tiaf, Bruadar, guat, Eisl, Housn, roat, Haus, Zait, Fuir, kchrånkch, mürkchn, Gald/Geld, vil, Hulz, fescht, ees, net/(n)it, ins

Schau ar af

• Boarische Dialekte im Vagleich
• Boarische Sprouch
• Wikipedia:Boarische Umschrift
• Boarische Grammatik
• Bsundaheitn im boarischn Vokabular

Literatur und Weblinks

• Ludwig Zehetner: Das bairische Dialektbuch, Verlag C.H.Beck, München, 1985, ISBN 3406305628

• Ludwig Zehetner: Bairisches Deutsch, Heinrich Hugendubel Verlag/edition vulpes, Kreuzlingen/München/Regensburg, 2005, ISBN 3980702871

• Manfred Renn, Werner König: Kleiner Bayerischer Sprachatlas, Deutscher Taschenbuch Verlag, München, 2006, ISBN 3423033282

• Redader Sprouchatlas vo Bayern

• Förderverein Bairische Sprache und Dialekte e.V. , da boarische Sprouchraum