Poimgart

Aus Wikipedia
Der Artikl is im Dialekt Niadaboarisch (Doanagengd) gschriem worn.

D Poimgart is a Ast oda a junga Stomm vo am Poimstrauch, dea fian Poimsunnda heagricht is.

Bevoa dass de Poimkatzal vobliadnd, werd a passede Poimgart a(bgsagld, de wia si so nach oan Meta meafach und schee[n reglmassi vazwaegt. Dann wead de Gart foegendamaßn heagricht: Ma suacht in dene Vazwaegunga a middlas Astl - und wenn koa sechas ned vorhandn is, dann bastld ma oans aene - und spießt roude Epfe drauf on. Drum umme wern Zwaegal vom Buchsbaam und vom Segnsbaam ummebundn. An de Zwaeg von da Gart wern bunte Bandl anknipfd: krepppapiarene, stoffena oda, wenn s ganz grouß hergehn soj, aa saedene. Mid sechane Poimgartn ausstaffiat zoegnd de Buama in da Prozession mid in d Kiach. Recht grouß is dann de Andacht maestns ned, wae s hauptsächle damid bschäftigt hand, dass mid da oagna Poimgart vo de vo eahnane Nachbarn rundumadum de Bandl owafischnd, so das s an da oganen hänga blaemd.

Früahras, wia no de oede vorkonziliare Liturgie goedtn had, is am Koasamsta voamiddag aus dem untern Stiggl vo de Poemgartn voa da Kiach herausd a Art Schaeddahaufa aufgrichd worn. De -r- is nacha a(nkendt und des Faea is gwaechd worn, und mit dene a(ngsengdn Stumpm hand de Buama hoamganga. De selln Brandstegga hand dann s ganz Joa iwa am owan Bodn gstandn und hamd aes Abweamiddl gega Blitzschlag und Faea goeddn.