Liachtmess

Aus Wikipedia
Ibagob vom Jesuskindl im Tempe (Moasta vo de Pollinga Tofen, anno 1444)

Liachtmess oda Lichtmess, aa Mariä Lichtmess (nei-liturgisch: "Darstellung des Herrn"), is im Kristndum a Fest wo am 2. Feba, em 40. Dog noch Weihnocht gfeiat wead. Da Nama kimmt vom Brauchtum vo da Keaznsegnung und Keaznprozession an dem Dog. Woarscheinli hod dees mit remischn und kejtischn Brauchtum z doa. Reinigungs- bzw. Lichtafestln (Imbolc im Kejtntum und Spurcalia, Februa bzw. Lupercalien ba de Rema) de wo s scho lang vor da Einfiarung vo Mariä Lichtmess im Kristndum (im 5. Joahundat) gebm hod.[1]

Am 2. Feba hom de Rema Facklumzig vaostoidd, um si vo Sindn z reinign. Da Nama Feba geht afs lateinische Wort "februare" zruck, wo saiban und reinign hoaßt.

Noch da jidischn Vorstejung hod a Wei noch da Gebuat vo an Buam 40 Dog ois unrein goitn. Am 40. Dog is de Frau mitm Easchgeboranan in en Tempe kema und hods Kind in Eainnarung ans Pessach-Fest an en Heagod ibagebm. Duach Gejdopfa oda Viechaopfa hod dees Kind wieda ausglest wean miassn. Mitn Jesuskindl hom de Maria und da Josef dees aa aso gmocht. Dees wead an Mariä Lichtmess gfeiat. Liachtmess is oisdann a Dog vo da Reinigung (vo da Maria, deswegn Mariää Lichtmess) und vo da Presentation vom Jesuskindl.

In Bayern wor Liachtmess bis 1912 a gsetzlicha Feiadog.

Liachtmess im Voiksmund[Werkeln | Am Gwëntext werkeln]

Vabroadd is da Spruch, dass im Vagleich zua Wintasunwend da Dog si valengan duat „z Weihnocht um an Hahnatritt, z Neijoar um an Monnaschritt, z Dreikenig um an Hiaschnsprung und z Lichtmess um a ganze Stund’“.

Ma sogt aa, dass ma ob em 2. Feba wieda ba Dogeslicht z Omd essn ko.

Liachtmess is aa da Ofang vom "Bauanjoar", wo de Orbat wieda ofangt. An dem Dog hod aa s Deanstbotnjoar gendd. S Gsindl hod in Rest vom Joareslohn griagt und hod si a neie Deanststej suacha miassn oda mitm oidn Deanstherrn de Fortsetzung vo da Orbat z vaeinboarn. Vom 3. ("Schlengldog") bis zan 5. Feba ("Agathadog") hom de Deanstbotn eanan oanzign Joaresurlaub ghobt und Zeit si a neie Stej z suacha. De Belegschaftn san duacheinanagwiafet worn, Liabschaftn z Bruch ganga. Es wor a Brauch, dass de Deanstbotn z Lichtmess neie Schua griagt hom. So is a da Spruch entstandn „Neie Schua, neie Liab“.

Z Liachtmess hod da Baua no de Hejftn vom Wintafuada fia de Viecha im Stodl hom miassn. Und es gibt an Haffa Bauanregln, wo Sunnaschein z Lichtmess ois schlechts Zeichn ogsegn wead.

Is s z Lichtmess hej und rein,
wead a langa Winter sein.
Wens aba stiamt und schneibt,
is s Fruajoar nimma weit.

Is s z Lichtmess kloar und hej,
kimmts Fruajoar ned so schnej.

Z Liachtmess san friara imma Bofesn bocha worn.

Beleg[Werkeln | Am Gwëntext werkeln]

  1. Joseph Vendriyes: Imbolc, in: RC 41, 1924, S. 241 ff.

Im Netz[Werkeln | Am Gwëntext werkeln]

 Commons: Lichtmess – Sammlung vo Buidl, Videos und Audiodateien