Agglomarazion
| Der Artikl is im Dialekt Stod-Soizburgarisch gschriem worn. |
.jpg)
A Agglomarazion oda a Boiungsraum, Boiungsgebiet oda Stodregion (dt.: Agglomeration) is a flächndeckend vabauds Gebied rund um on Kean vo ana gressan Stod, wos iwa d'Gmoagrenzn vo dera Stod aussegehd. Domid is a Agglomarazion eingdli nix ondas ois wia a Stod im geografischn (und ned politischn) Sinn. Entscheidnd is, doss zwischn de oazlna bebaudn Teil vo da Agglomarazion koane gressan Luckn san (ned meah ois wia 200 Meta).
Begriffsuntascheidunga
[Werkeln | Am Gwëntext werkeln]
Es gibd monozentrische und polyzentrische Agglomaraziona. Monozentrisch hoassd, doss gnau oa Stodkean eihdeitig s'Zentrum vo dera Agglomarazion is. A Beispui warad zan Beispui d'Agglomarazion Minga. Polyzentrisch san Agglomaraziona, de wos meahrane Zentren hom, wo ma ned gnau song ko, wejchs's wichtigsde is. A guads Beispui is zan Beispui s'Ruhrgebiet, do ko koana song, des is etz d'Agglomarazion Essn oda d'Agglomarazion Dortmund oda so.
Iwa d'Aggloamarazion ausse gehd d'Metropoiregion. Do drin san a gressane ländliche Gengd in da Näh van vabaudn Gebiet, de owa oiwei no eng mid'n Stodzentrum zommhenga, zan Beispui, wei de meisdn Leit duathi zan Oabatn pendln oda so.
No a gressana Begriff is's Eihzugsgebiet. Do san olle Gengdn dobei, fia de wos a Stod da zentroie Punkt is, wos mid bstimmde Sochn vasoagd wean, de wos ma ned jedn Dog brauchd, (zan Beispui spezioisade Fochgschäftln, Focheazte, a Gricht, Hochschuin und so weida).
Obgrenzung
[Werkeln | Am Gwëntext werkeln]International is's ofd schwierig, doss ma Städtz midanonda vo da Eihwohnazoih hea vagleichd, wei de Vawoitungsgrenzn gonz vaschiedn zong san. Frankreich zan Beispui hod gonz kloane Gmoana, so doss d'Stod Paris zan Beispui in Wiaklikeit nua d'Innenstod umfossd und meah ois wia drei Viadl vo de Leit, de wos im geografischn Sinn in da Stod (oiso Agglomarazion) Paris wohna, koane Parisa im politischn Sinn san, sondan za ondane Städt und Gmoana rundumadum ghean. Fia sowos is da Begriff Agglomarazion a Huif.
Trotzdem bleibd's af internationala Ebane schwaa, doss ma d'Grenzn gnau noch da Definizion ziagd, wei statistische Datn meisdns nua fia gonze Gmoana za Vafigung stenga und se de bebaudn Flächn aussadem dauand endan.
De gressdn Agglomaraziona af da Wejd
[Werkeln | Am Gwëntext werkeln].jpg)
In dera Tabej findd ma olle Agglomaraziona, wo meah ois zehn Milliona Leit wohna. De Datn kimma vo citypopulation.de.
| n. | Agglomarazion | Leit | Städt, de wos nu dozuaghean (zan Beispui) |
|---|---|---|---|
| 1 | Tokyo | 34.200.000 | Yokohama, Kawasaki |
| 2 | Mexico-Stod | 22.800.000 | Nezahualcoyotl, Ecatepec, Naucalpan |
| 3 | Seoul | 22.300.000 | Bucheon, Goyang, Incheon, Seongnam, Suweon |
| 4 | New York | 21.900.000 | Newark, Paterson |
| 5 | São Paulo | 20.200.000 | Guarulhos |
| 6 | Mumbai | 19.850.000 | Kalyan, Thane, Ulhasnagar |
| 7 | Delhi | 19.700.000 | Faridabad, Ghaziabad |
| 8 | Shanghai | 18.150.000 | |
| 9 | Los Angeles | 18.000.000 | Riverside, Anaheim |
| 10 | Jakarta | 17.150.000 | Bekasi, Bogor, Depok, Tangerang |
| 11 | Osaka | 16.800.000 | Kobe, Kyoto |
| 12 | Kolkata | 15.550.000 | Haora |
| 13 | Kairo | 15.450.000 | Gizeh, Schubra al-Chaima |
| 14 | Manila | 14.850.000 | Kalookan, Quezon City |
| 15 | Karachi | 14.100.000 | |
| 16 | Moskau | 13.750.000 | |
| 17 | Buenos Aires | 13.400.000 | San Justo, La Plata |
| 18 | Dhaka | 13.100.000 | |
| 19 | Rio de Janeiro | 12.100.000 | Nova Iguaçu, São Gonçalo |
| 20 | Paris | 12.100.000 | |
| 21 | London | 11.950.000 | |
| 22 | Peking | 11.950.000 | |
| 23 | Tehran | 11.800.000 | Karadschi |
| 24 | Istanbul | 11.400.000 |
De gressdn Agglomaraziona in Eiropa
[Werkeln | Am Gwëntext werkeln]
In dera Tabj findd ma olle Agglomaraziona in Eiropa, wo meah ois zwoa Milliona Leit wohna. De Datn kimma vo citypopulation.de.
| n. | Agglomarazion | Leit | Städt, de wos nu dozuaghean (zan Beispui) |
|---|---|---|---|
| 1 | Moskau | 13.750.000 | |
| 2 | Paris | 12.100.000 | |
| 3 | London | 11.950.000 | |
| 4 | Istanbul | 11.400.000 | |
| 5 | Madrid | 5.950.000 | |
| 6 | Ruhrgebiet | 5.750.000 | Essn, Dortmund, Duisbuag |
| 7 | Sankt Petersbuag | 4.775.000 | |
| 8 | Berlin | 4.225.000 | |
| 9 | Barcelona | 4.150.000 | |
| 10 | Mailand | 3.525.000 | |
| 11 | Athen | 3.500.000 | |
| 12 | Kiew | 3.325.000 | |
| 13 | Rom | 3.300.000 | |
| 14 | Neapl | 3.100.000 | |
| 15 | Lissabon | 2.925.000 | |
| 16 | Kattowitz | 2.850.000 | |
| 17 | Stuagart | 2.650.000 | |
| 18 | Hambuag | 2.575.000 | |
| 19 | Birmingham | 2.550.000 | |
| 20 | Manchester | 2.475.000 | |
| 21 | Warschau | 2.375.000 | |
| 22 | Budapest | 2.275.000 | |
| 23 | Leeds | 2.125.000 | |
| 24 | Bukarest | 2.050.000 |
De gressdn Agglomaraziona im boarischn Sprochraum
[Werkeln | Am Gwëntext werkeln]
In dera Tabej findd ma olle Agglomaraziona im boarischn Sprochraum, wo meah ois 50.000 Leit wohna. De Datn kimma vo citypopulation.de.
| n. | Agglomarazion | Leit | Städt, de wos no dozuaghean (zan Beispui) |
|---|---|---|---|
| 1 | Minga | 1.940.000 | Dochau, Ottobrunn, Planegg, Fiaschtnfejdbruck, Greawoid |
| 2 | Wean | 1.940.000 | Bodn, Glostaneibuag, Mödling |
| 3 | Augschbuag* | 438.000 | |
| 4 | Graz | 314.000 | |
| 5 | Linz | 279.000 | Draun, Leonding, Onsföin |
| 6 | Soizbuag | 218.000 | Hallein, Freilassing, Wois-Sieznheim |
| 7 | Rengschbuag | 197.000 | |
| 8 | Innschbuck | 190.000 | Hoi in Tiroi |
| 9 | Ingoistod | 155.000 | |
| 10 | Rousnam | 144.000 | |
| 11 | Klognfuat | 103.000 | |
| 12 | Bozn | 100.000 | |
| 13 | Landshuad | 84.100 | |
| 14 | Wöis | 81.000 | Marchtrenk |
| 15 | Villoch | 69.500 | |
| 16 | Weana Neistod | 69.500 | |
| 17 | St. Pötn | 65.700 | |
| 18 | Ambeag | 58.200 | |
| 19 | Steyr | 58.000 | |
| 20 | Bossa | 57.400 | |
| 21 | Weidn in da Owapfoiz | 55.900 | |
| 22 | Starnbeag | 50.800 |
* Augschbuag liegd direkd af da Grenz zan alemannischn Sprochraum.