Botswana

Aus Wikipedia
Zur Navigation springen Zur Suche springen
A Koatn vo Botswana.
Nu a Koatn vo Botswana.
D Distriktt vo Botswana.

Botswana, amtle engl. Republic of Botswana, (se)Tswana: Lefatshe la Botswana; Kalanga: Hango yeBotswana, is a vo Land umschlossna Stoot in n sidlinga Afrika. Botswana is topografisch, mid fast 70 Prozent vo da Flechn i da Kalahari-Wejstn, recht eemm. Es grenzt in n Siḏn u Sidoustn mid Sidafrika, in n Westn u Noadn mid Namibia un in n Noadoustn mid Simbabwe zamm. Dej Grenz mid Sambia in n Noadn ba Kazungula vo hejkstns a poa hundat Meeta is niad goud defeniad u ligt mittn in n Sambesi-Fluß.[1]

Wej a mittlgroußs Land mid kamm mejra wej 2,3 milliona Leitn is s oins vo de am wengan bvelkatn Lenda i da Welt. Umma 10 Prozent vo da Bvelkaring lebt i da Haptstod u grejsstn Metropoln Gaborone. Frejas oins vo de ermman Lenda, mid an pro-kopfatn BIP vo umma 70 US-Dollar a Joua i d 1960gana, hod se Botswana dasida gwandlt in a hejchas Mittleikummaland mid oina vo dej am schnellan wachsatn Ekonomin.[2]

Da Homo sapiens hod duat schou vo iwa 200 000 Jouana glebt. Dej Tswana, wou vo de Bantu-Sprouchn sprechatn Velkln kumma, han af Sidn is heitinga Botswana owa ejascht umma 600 n. Chr. eigwandat u hom zejascht amol in Enklavn als Bauan u Hiatn glebt. Af zletzt hom nou aa d Britn an Weḡ douhea gfunna u s Land 1885 zou an Protektorat gmacht u Betschuanaland tauft. Wej s wira entkolonesiat woan is, is s Land en 30. Settemma 1966 min heitinga Nama Botswana a unohangeḡa Repablik von n Commonwealth woan.[3] Dasida is s a representativa Repablik mid reglmaassing demokratischnan Woln un da nidastn Korrupzionsratn vo Afrika seit iwa 20 Jouanan.[4]

D Wiatschaft oda Ekonomi wiad domeniad von n Beagbau, da Vejchahaltung u da Turisterei. Botswana houd mid umma 17,767 US-Dollar pro Kopf 2019 oins vo de amhejchanen BIP i Afrika.[5] Es houcha Burttonazionaleikumma git an Land en recht houchn Lemsstandard un oinn vo de bestn HDI-Wert vo Afrika.[6] Botswana is a Mitglid vo da Afrikanischn Union, da Antwicklingsgmoischaft von n Sidlinga Afrika, en Commonwealth of Nations u de Vaointn Naziona. Es Land hod d HIV-Epidemi hoat troffn un umma 20% Infiziate.[7][8][9]

Galeri[Weakln | Am Quelltext weakln]

Beleg[Weakln | Am Quelltext weakln]